¹ Pagkatapos naghalin si Hesus sa Capernaum, nagkadto siya sa mga lugar nga sakop ng Judea, kag nagtabok siya sa Subà ng Jordan. Madamò nga mga tawo ang nagtipon didto liwat sa iya kag gingtudluan niya sinda pareho ng permi niya nga ginahuman.

² May mga Pariseo^a nga nagkadto da didto. Gusto ninda nga magpangità ning paagi agud maakusar ninda siya. Nganì nagpangutana sinda kay Hesus, “Ginatugutan ba ng Kasuguan nga buyagan ng lyaki ang iya asawa?”

³ Gingsabat sinda ni Hesus paagi sa isa ka pangutana, “Ano ba ang gingsugò sa indo ni Moises?”

⁴ Nagsabat sinda, “Nagsugot si Moises nga makahuman ang lyaki ning papiles ng pagbinuyagan, pagkatapos puydi na niya mabuyagan ang iya asawa.”

⁵ Naghambay si Hesus sa inda, “Kay matugas ang indo uyo, nganì gingsulat ni Moises sa indo ini nga sugò. ⁶ Pero halin sa pagtunà ng kalibutan, ‘Ginghuman sinda ng Dios nga lyaki kag babayi.^{b 7} Imaw ini ang rason nga bayaan ng lyaki ang iya tatay kag nanay kag mag-iba sa iya asawa, ⁸ kag sinda nga duha maging isa ka lawas.^c’ Bukon na sinda duha kundì isa. ⁹ Nganì indì dapat buyagon ng tawo ang ging-isa ng Dios.”

¹⁰ Pag-abot ninda sa bayay, nagpangutana naman ang mga disipulo parti didto nga bagay. ¹¹ Naghambay si Hesus sa inda, “Kung magbuyag ang lyaki sa iya asawa kag mag-asawa ng iban, nagapangawatan siya kag nakasalà sa iya una nga asawa. ¹² Kag kung buyagan ng babayi ang iya asawa kag mag-asawa ng iban nga lyaki, nagapangawatan siya.”

¹³ May mga tawo nga nagdaya ng inda mga ongà kay Hesus agud itungtong niya ang iya mga kamot sa inda. Pero gingsabyaw ng iya mga disipulo ang mga nagdaya sa inda. ¹⁴ Pagkakità ni Hesus sa natabò, nahangit siya kag naghambay sa iya mga disipulo, “Pabay-i lang nindo ang mga ongà nga magpalapit sa akon. Ayaw nindo sinda pagpunggi kay ang mga pareho sa inda hay imaw ang ginaharian ng Dios. ¹⁵ Sa matuod lang, ang bisan sin-o nga indì magbaton sa paghaharì ng Dios nga pareho sa tiyad ini nga mga ongà nga nagabaton nga daan, indì gid makasuyod sa paghaharì ng Dios.” ¹⁶ Tapos gingkugos niya ang mga ongà, gingtungtong niya ang iya mga kamot sa inda kag gingbendisyunan sinda.

¹⁷ Nang mapanaw na kuntà si Hesus, may isa ka tawo nga nagdyagan palapit sa iya kag nagluhod. Tapos nagpangutana ang tawo, “Maayo nga maistro, ano baya ang akon humanon agud makabaton ako ning kabuhì nga wayà katapusan?”

¹⁸ Nagsabat si Hesus sa iya, “Basì naghambay ka nga maayo ako? Nagapati ka ba nga ako hay Dios? Kay wayà gid ning bisan sin-o nga maayo kundì ang Dios lang. ¹⁹ Parti sa imo pangutana, nasayuran mo naman ang nakasulat sa mga Sugò, ‘Ayaw magpatay, ayaw magpangawatan, ayaw magpangawat, ayaw magtistigo ning pinusong, ayaw magpangluko, tahura ang imo tatay kag nanay.’^d ”

²⁰ Nagsabat siya kay Hesus, “Maistro, ini tanan gingtuman ko tunà nang ongà pa ako.”

²¹ Gingsirò siya ni Hesus nga may pagpalanggà kag gingsilingan, “Isa pa nga bagay ang kuyang sa imo. Magpaulì ka kag ibaligyà ang imo mga pagkabutang, kag ipanao mo ang kuwarta sa mga pubre. Sa ini nga paagi, maging manggaranon ka sa langit. Pagkatapos magbalik ka kag magsunod sa akon.” ²² Naglain gid ang iya hitsura nang nabatian niya adto kag naghalin siya nga malisod kay madamò ang iya manggad.

²³ Nang makahalin na ang tawo, nagsirò si Hesus sa palibot kag naghambay sa iya mga disipulo, “Mahugà gid para sa mga manggaranon nga magsuyod sa paghaharì ng Dios.”

²⁴ Natingaya ang mga disipulo sa iya ginghambay. Nganì nagpadayon siya sa paghambay, “Mahugà gid ang magsuyod sa paghaharì ng Dios! ²⁵ Mas malupos pa nga mag-agi ang hayop nga kamelyo sa buhò ng dayom kaysa magsuyod ang manggaranon sa paghaharì ng Dios.”

²⁶ Natingaya gid sinda kag naghambay sa isa kag isa, “Kung tiyad inà, sin-o lang ang maluwas?”

²⁷ Gingsirò sinda ni Hesus kag naghambay, “Kung sa mga tawo lang imposibli gid ini, pero posibli sa Dios; kay ang tanan nga bagay hay puydi sa Dios.”

²⁸ Naghambay si Pedro sa iya, “Hay kami, gingbayaan namon ang tanan kag nagnunot sa imo.”

²⁹ Naghambay si Hesus sa inda, “Sa matuod lang, wayà ning tawo nga nagbilin ng iya bayay, mga maguyang kag mga manghod, nanay, tatay, mga ongà, o mga uma tungod sa akon kag sa Maayo nga Balità, ³⁰ nga indì makabaton ning ginatos pa gid nga bayos sa ini nga tiyempo: mga bayay, mga maguyang kag mga manghod, mga nanay, mga ongà, mga uma, kag patì sa subra nga mga pagpasakit tungod sa pagtuo. Kag sa paabuton nga tiyempo makabaton ning kabuhì nga wayà katapusan. ³¹ Madamò nga mga tawo ang importante niyan nga sa ulihi hay bukon kahinangyan, kag madamò nga bukon kahinangyan niyan nga sa ulihi hay importante.”

³² Mintras nagapanaw sina Hesus patukad sa Jerusalem, nag-una siya sa inda. Ginakuybaan ang iya mga disipulo kag ginahadlukan naman ang iban nga nagasunod sa iya. Gingbuyag niya liwat ang 12 nga apostol kag gingbalitaan niya kung ano ang matabò sa iya. ³³ Naghambay siya sa inda, “Pamatì kamo! Nagapatukad kita sa Jerusalem kag didto itugyan ako nga Ongà ng Tawo sa mga pinunò nga parì kag mga manunudlò ng Kasuguan, kag sintinsyahan ninda ako nga patyon. Kag itugyan ninda ako didto sa mga bukon Judio. ³⁴ Insultuhon ninda ako, pilaan, latiguhon kag patyon. Pero sa ikatuyo ka adlaw mabuhì ako liwat.”

³⁵ Nagpalapit sa iya sina Juan kag Santiago ^e nga mga ongà ni Zebedeo kag naghambay, “Maistro, may pangayuon kuntà kami sa imo.”

³⁶ Naghambay si Hesus sa inda, “Ano ang indo pangayuon sa akon?”

³⁷ Nagsabat sinda, “Kung magharì ka na sa imo mahimayaon nga gingharian, papungkuon mo kami nga duha sa imo alihid; ang isa sa imo tuo, kag ang isa sa imo waya.”

³⁸ Pero naghambay si Hesus sa inda, “Wayà kamo kasayod kung ano ang indo ginapangayò. Maagwanta ba nindo ang mga kahugaan nga akon agwantahon? Kag matitiis da ba nindo ang kamatayon nga akon tiison?”

³⁹ Nagsabat sinda, “Huo, kaya namon.”

Naghambay si Hesus sa inda, “Maagwanta nindo ang mga kahugaan nga akon agwantahon kag matiis da ang kamatayon nga akon tiison. ⁴⁰ Pero bukon ako ang nagapilì kung sin-o ang papungkuon sa akon tuo kag waya, kay igwa na ning gingpreparar para didto.”

⁴¹ Pagkabatì ng napuyò nga disipulo kung ano ang inda gingpangayò, nahangit gid sinda kana Santiago kag Juan. ⁴² Nganì gingtawag sinda tanan ni Hesus kag ginghambayan, “Sayod nindo nga ang mga miyugdumaya sa ini nga kalibutan may otoridad sa inda mga sinakupan kag pagusto lang sinda kung ano ang humanon sa inda. ⁴³ Pero bukon tiyad inà sa indo. Kay kung sin-o sa indo ang gusto nga maging pinakaimportante, dapat maging kabulig nindo. ⁴⁴ Kag kung sin-o sa indo ang gusto nga maging pinunò, dapat maging ulipon ng tanan. ⁴⁵ Kay bisan pa nganì ako nga Ongà ng Tawo wayà nagkari diri sa kalibutan agud serbisyuhan, kundì magserbisyo kag magtao ng akon kabuhì agud matubos ang tanan nga mga tawo.”

⁴⁶ Nag-abot sina Hesus sa Jerico kag nang nagapaluwas na siya sa banwa kaibahan ng iya mga disipulo kag ng madamò nga mga tawo, may isa ka buta didto nga si Bartimeo, ongà ni Timeo nga nagapungkò kag nagapalimos sa alihid ng karsada. ⁴⁷ Pagkabatì niya nga nagaagi si Hesus nga taga-Nazaret, nagsinggit siya, “Hesus, inapo ni David nga harì, kaluy-i ako!”

⁴⁸ Madamò nga mga tawo ang nagsabyaw sa iya nga maghipos. Pero gingtuduhan pa gid nganì niya ang pagsinggit, “Lahì ni David, kaluy-i ako!”

⁴⁹ Nagduyog si Hesus kag naghambay, “Day-a nindo siya diri sa akon.”

Nganì gingtawag ninda ang buta, kag naghambay sinda, “Magkalipay ka, tindog kay ginapatawag ka ni Hesus.”

⁵⁰ Gingpilak niya ang iya barò nga pang-ibabaw, naglukso kag nagkadto siya kay Hesus.

⁵¹ Nagpangutana si Hesus sa iya, “Ano ang gusto mo nga humanon ko para sa imo?”

Nagsabat ang buta, “Maistro, gusto ko nga makakità liwat.”

⁵² Tapos gingsilingan siya ni Hesus, “Panaw na; ang imo pagtuo ang nag-ayo^f sa imo.”

Adto nga daan nakakità siya kag nagnunot kay Hesus sa karsada.