11
Ang Malipayon nga Pagsuyod ni Hesus sa Jerusalem
(Mateo 21:1-11; Lucas 19:28-40; Juan 12:12-19)
1 Nang malapit na sina Hesus sa Jerusalem kag nag-abot sa mga baryo ng Betfage kag Betania nga sakop ng Bakuyod nga may mga tanom nga Olibo, gingpauna ni Hesus ang iya duha nga disipulo 2 kag gingbilinan, “Mag-una kamo didto sa suyod ng baryo. Pagsuyod nindo, may makità nga daan kamo ning batà nga asno nga nakahigot. Wayà pa gid ini masakyi. Baskara nindo ang higot kag day-on diri. 3 Kung may magpangutana sa indo, ‘Basì ginahuman nindo inà?’ hambayon nindo, ‘Kahinangyan ini ng Ginoo pagkatapos iulì da ini nga daan.’ ”
4 Nganì nagpanaw sinda kag pag-abot ninda didto sa baryo nakità ninda ang batà nga asno sa alihid ng dayan nga nakahigot sa puwertahan ng isa ka bayay. Nganì gingbaskad ninda ang higot. 5 Mintras ginabaskad ninda may mga nagatindog didto nga nagpangutana sa inda, “Hoy, ano ang indo ginahuman dirà? Basì ginabaskad nindo ang higot ng asno?”
6 Gingsabat ninda ang mga tawo sunò sa gingbilin ni Hesus sa inda. Nganì gingpabay-an sinda ng mga tawo. 7 Pagkatapos adto gingdaya ng duha nga disipulo ang batà nga asno kay Hesus. Pag-abot didto, ginghapinan ninda ini ng inda mga barò nga pang-ibabaw kag gingsakyan ni Hesus pakadto sa Jerusalem. 8 Madamò nga mga tawo ang nagbuskad ng inda mga barò nga pang-ibabaw sa karsada, kag ang iban nagbutang ning mga sanga nga may dahon nga inda ging-utod halin sa bakuyod. 9 Ang nagauna kay Hesus kag ang nagasunod hay nagasinggit, “Hosanna!a Ginapakamaayo ng Ginoo ang iya gingsugò! 10 Ginapakamaayo ng Dios ang paabuton nga gingharian ng inapo ni David nga aton kalulo-lulohan! Hosanna sa pinakamataas gid sa tanan!”
11 Pag-abot ni Hesus sa Jerusalem, nagsuyod siya sa templo. Nagpanglikità siya sa tanan nga bagay didto sa suyod. Pagkatapos, tungod madalì na lang magtunod ang adlaw, nagluwas siya kag nagkadto sa Betania kaibahan ang 12 nga apostol.
Gingsumpà ni Hesus ang Kahoy nga Igos
(Mateo 21:18-19)
12 Pagkaaga, paghalin ninda sa Betania pabalik pa-Jerusalem, nagutom si Hesus. 13 Nakakità siya sa malayò ning kahoy nga igos nga malabog ang dahon. Nganì gingpalapitan niya kung may bunga. Pero wayà siya ning may nakità nga bunga kundì puro lang dahon kay bukon pa tiyempo nga tigbubunga. 14 Naghambay si Hesus sa igos, “Tunà niyan wayà na ning tawo nga makakaon ng imo bunga!”
Nabatian ng iya mga disipulo ang iya ginghambay.
Gingpalayas ang mga Miyugbaligyà sa Templo
(Mateo 21:12-17; Lucas 19:45-48; Juan 2:13-22)
15 Pag-abot ninda sa Jerusalem, nagsuyod si Hesus sa templo. Gingpalayas niya didto ang mga tawo nga nagapangbaligyà kag nagapamakay sa suyod ng templo. Gingpangbaliskad niya ang mga lamisa ng mga miyugbaylo ning kuwarta kag ang mga pungkuan ng mga miyugbaligyà ng mga salampati nga inughalad. 16 Indì siya magtugot nga mag-agi sinda nga may daya nga mga inugbaligyà sa suyod ng templo. 17 Kag gingtudluan niya sinda. Hambay niya, “Dì ba nakasulat sa Kasulatan, ‘Tawagon ang akon bayay nga pangamuyuan para sa tanan nga nasyon’? Pero kamo! Ginghuman nindo nga panaguan ng mga tulisan.”
18 Nabatian ng mga pinunò nga parì kag ng mga manunudlò ng Kasuguan adtong ginghuman ni Hesus. Nganì nagpangità sinda ning paagi agud patyon siya. Pero ginadlukan sinda sa iya kay natingaya gid ang mga tawo sa iya mga ginapanudlò.
19 Nang manayumsom na, nagluwas si Hesus kag ang iya mga disipulo sa siyudad.
Ang Leksyon parti sa Kahoy nga Igos
(Mateo 21:20-22)
20 Pagkaaga, nang pabalik na sinda pa-Jerusalem, didto da sinda nag-agi sa karsada nga inda ging-agihan dati kag nakità ninda ang kahoy nga igos nga nalayà kag patay na. 21 Nadumduman ni Pedro ang natabò, nganì naghambay siya kay Hesus, “Maistro, siroa ang kahoy nga igos nga imo gingsumpà! Layà na!”
22 Nagsabat si Hesus sa inda, “Magtuo kamo sa Dios! 23 Sa matuod lang, ginahambay ko sa indo nga ang abir sin-o nga maghambay sa ini nga bukid, ‘Maghalin ka kag maglukso sa dagat’, kag kung wayà siya nagapangduha-duha kundì nagatuo nga ini matabò, matuman inà sunò sa iya ginghambay. 24 Nganì ginahambay ko sa indo nga abir ano ang indo pangayuon sa Dios sa pangamuyò, magtuo kamo nga nabaton na nindo, kag mabaton gid ini nindo. 25 Kag kung nagapangamuyò kamo, patawara anay nindo ang mga nakahuman ning salà sa indo, agud ang indo mga salà patawaron da ng indo Amay sa langit.” 26 [Kay kung wayà kamo nagapatawad sa iban, indì da kamo patawaron ng indo Amay sa kalangitan.b
Ang Pangutana parti sa Awturidad ni Hesus
(Mateo 21:23-27; Lucas 20:1-8)
27 Nag-abot liwat sina Hesus sa Jerusalem. Mintras nagapanaw siya sa templo, nagpalapit sa iya ang mga pinunò nga parì, mga manunudlò ng Kasuguan kag mga miyugdumaya ng mga Judio. 28 Nagpangutana sinda kay Hesus, “Ano ba ang imo otoridad sa paghuman ng mga bagay nga imo ginahuman diri sa templo? Kag sin-o ang nagtao sa imo ning otoridad para humanon ini?”
29 Nagsabat si Hesus sa inda, “May ipangutana da ako sa indo. Sabata anay nindo ako, pagkatapos sabaton ko da kamo kung ano ang akon otoridad para humanon ini nga mga bagay. 30 Kay sin-o ba naghalin ang otoridad ni Juan sa pagbawtismo, sa Dios ba o sa tawo? Sabata nindo ako!”
31 Nagdiniskusyon sinda kung ano ang inda isabat, “Kung maghambay kita, ‘Halin sa Dios’, mahambay siya, ‘Basì wayà kamo nagpati kay Juan?’ 32 Pero kung maghambay kita, ‘Halin sa tawo’, mahangit sa aton ang mga tawo.” (Nahadlok sinda sa mga tawo kay nagapati sinda nga si Juan hay matuod nga miyugbalità ng mensahe ng Dios.) 33 Nganì nagsabat sinda kay Hesus, “Wayà kami makasayod.”
Kag naghambay si Hesus sa inda, “Indì ko da kamo pagbalitaan kung kay sin-o otoridad ginahuman ko ini nga mga bagay.”