¹ Pagkatapos naghambay si Hesus sa inda paagi sa mga parabola, “May isa ka tawo nga nagpatanom ning ubas sa iya dutà. Gingpakurayan niya ini, kag nagpahuman siya ning buhò sa mabahoy nga bato para pugaan ning bunga ng ubas. Nagpaugdok da siya ning isa ka lantawan. Pagkatapos, gingsuhuyan niya ang mga bantay kag nagkadto siya sa malayò nga lugar. ² Nang tiyempo na ng pagpamupò ning ubas, gingsugò niya ang isa ka ulipon para magbuoy ng iya parti sa mga bantay. ³ Pero pag-abot niya didto, gingdakop ninda siya kag gingbunay kag gingpabalik nga wayà gid ning daya. ⁴ Gingsugò naman ng tag-iya ang isa pa nga ulipon, pero ginglampusan ninda siya sa uyo kag gingpakahuy-an. ⁵ Nagsugò pa gid siya ning isa pa nga ulipon kag inda ini gingpatay. Madamò pa gid ang gingsugò ng tag-iya. Ang iban gingbunay ninda kag ang iban gingpatay. ⁶ Sa katapusan, wayà na siya ning ulipon nga masugò. Nganì gingsugò niya ang iya pinalanggà nga ongà kay nagahunahunà siya, ‘Tahuron ninda ang akon ongà.’ ⁷ Pero pagkakità ng mga bantay sa iya ongà, naghambay sinda sa isa kag isa, ‘Yari na ang manunublì. Kari patyon ta agud maging aton ang iya panublion.’ ⁸ Nganì gingdakop ninda siya kag gingpatay. Gingpilak ninda ang iya lawas sa luwas ng tanuman ng ubas.

⁹ “Ano baya ang humanon ng tag-iya ng tanuman? Sigurado gid nga kadtuon niya ang mga bantay kag pamatyon. Kag pabantayan niya sa iban ang iya tanuman.” ¹⁰ Naghambay pa si Hesus, “Wayà ba nindo ini mabasahi nga nakasulat sa Kasulatan,

¹² Nasayuran ng miyugdumaya ng mga Judio nga sinda gid ang ginapatamaan ng adto nga parabola. Nganì gusto ninda nga dakupon si Hesus, pero nahadlok sinda sa mga tawo. Nganì gingpabay-an na lang ninda siya kag nagpanaw sinda.

¹³ Gingsugò ninda ang pila ka mga Pariseo^b kag pila ka mga miyembro ng grupo ni Herodes agud maakusar ninda si Hesus paagi sa iya paghambay. ¹⁴ Nganì nagkadto sinda kay Hesus kag nagpangutana, “Maistro, nasayuran namon nga matuod ang imo ginahambay. Kay wayà ka nagapadaya-daya sa mga tawo abir sin-o pa sinda, kundì kung ano ang kamatuuran parti sa kabubut-on ng Dios sa mga tawo imaw gid ang imo ginatudlò. Ano baya sa imo, ginatugutan ba ng Kasuguan nga kita nga mga Judio hay magbayad ning mga buhis sa Emperador ng Roma? Dapat ba kita magbayad o indì?”

¹⁵ Pero nasayuran na ni Hesus nga may malain sinda nga intensyon, nganì naghambay siya sa inda, “Basì baya ginatilawan nindo ako nga dakupon paagi sa ini nga pangutana? Day-a sa akon ang kuwarta kay siruon ko.”

¹⁶ Nganì gingday-an siya ning isa ka bilog. Tapos nagpangutana siya sa inda, “Kay sin-o ini hitsura kag pangayan?”

Nagsabat sinda, “Sa Emperador.”

¹⁷ Naghambay si Hesus sa inda, “Kung imaw, itao nindo sa Emperador ang sa Emperador, kag sa Dios ang sa Dios.”

Kag natingaya gid sinda sa iya.

¹⁸ Pagkatapos may mga miyembro sa grupo ng mga Judio nga maimpluwensiya^c ang nagpalapit kay Hesus. Ini nga mga tawo hay wayà nagapati nga may pagkabuhì liwat. ¹⁹ Nagpangutana sinda, “Maistro, nagsulat si Moises sa aton nga kung mamatay ang lyaki kag buhì ang iya asawa nga wayà makaongà, dapat ang iya manghod ang mag-asawa sa bayaw agud makaongà siya para sa iya maguyang nga namatay. ²⁰ Halimbawà, igwa ning pito nga magmanghod nga lyaki. Ang kamaguyangan nag-asawa, kag namatay nga wayà ning ongà. ²¹ Nganì ging-asawa ang bayaw ng masunod nga manghod. Pero namatay da siya nga wayà ning ongà. Tapos ging-asawa naman ang bayaw ng ikatuyo kag imaw da ang natabò, ²² hasta sa ikapito. Namatay sinda tanan nga wayà gid makaongà. Sa katapusan ang babayi namatay da. ²³ Niyan, kung mag-abot na ang pagkabuhì liwat, kay sin-o gid siya asawa; kay sinda nga pito hay naasawa niya?”

²⁴ Nagsabat si Hesus sa inda, “Salà gid kamo kay wayà kamo nakaintindi ng mga nakasulat sa Kasulatan kag ng gahom ng Dios. ²⁵ Kay pag mabuhì liwat ang mga patay, indì na mag-asawa ang lyaki kag imaw da ang babayi kay pareho na sinda ng mga anghel sa kalangitan. ²⁶ Kung parti sa mga patay nga mabuhì liwat, wayà ba nindo nabasa ang gingsulat ni Moises parti sa nagadayab nga kahoy nga mababà: naghambay ang Dios kay Moises, ‘Ako ang Dios ni Abraham, ang Dios ni Isaac, kag ang Dios ni Jacob’?^{d 27} Ang Dios bukon Dios ng mga patay, kundì Dios ng mga buhì. Nganì salà gid kamo.”

²⁸ May isa ka manunudlò ng Kasuguan didto nga nakabatì ng inda diskusyon. Nabatian niya nga maayo ang sabat ni Hesus. Nganì nagpalapit siya kag nagpangutana, “Ano gid baya ang pinakaimportante nga ginasugò ng Dios?”

²⁹ Nagsabat si Hesus, “Ang pinakaimportante nga ginasugò hay imaw ini: ‘Pamatì kamo, mga Israelita! Ang Ginoo nga aton Dios imaw lang ang Ginoo. ³⁰ Nganì higugmaon nindo ang Ginoo nga indo Dios sa bilog nindo nga tagipusuon, sa bilog nindo nga kabubut-on, sa tanan nindo nga hunahunà kag sa tanan nindo nga kusog.’^{e 31} Ang ikaduha nga pinakaimportante nga ginasugò hay imaw naman ini: ‘Higugmaon nindo ang indo isigkatawo pareho ng paghigugmà nindo sa indo kaugalingon.’^f Wayà na ning ginasugò nga mas importante pa diri sa duha.”

³² Naghambay ang manunudlò ng Kasuguan sa iya, “Tamà ka, maistro! Matuod ang imo ginghambay nga may isa lang nga Dios kag wayà na ning iban pa. ³³ Kag higugmaon mo ang Dios sa bilog nga tagipusuon, sa tanan nga pang-intindi, kag sa tanan nga kusog; kag higugmaon mo ang isigkatawo pareho ng paghigugmà mo sa imo kaugalingon. Ining duha hay mas importante sa tanan nga halad nga ginasunog kag sa iban pa nga mga sakripisyo.”

³⁴ Pagkabatì ni Hesus nga tamà ang iya sabat, naghambay siya sa iya, “Malapit ka na sa paghaharì ng Dios.”

Pagkatapos adto wayà na gid ning may nangahas nga magpangutana kay Hesus.

³⁵ Nang nagapanudlò si Hesus sa templo, nagpangutana siya, “Basì nagahambay ang mga manunudlò ng Kasuguan nga ang Kristo hay sa inapo lang ni David? ³⁶ Si David mismo naghambay paagi sa Espiritu Santo,

Naluyag magpamatì kay Hesus ang madamò gid nga mga tawo. ³⁸ Sa iya mga pagpanudlò naghambay siya, “Mag-andam kamo sa mga manunudlò ng Kasuguan nga gusto maglibot-libot nga nagabarò ning maayo. Gusto ninda nga tahuron kag abi-abihon sinda sa mga lugar nga bakyanan kag baligyaan. ³⁹ Sa mga sinagoga^j o sa mga pista, ginapilì gid ninda ang mga pungkuan nga para sa mga kilaya. ⁴⁰ Ginaubos ninda buoy ang mga kagamitan ng mga babayi nga bayo kag ginatabon-tabunan lang ninda ang inda malain nga ginahuman paagi sa mahabà nga mga pagpangamuyò. Ini nga mga tawo hay magabaton ng mas dakò nga parusa.”

⁴¹ Nagpungkò si Hesus sa atubangan ng ginabutangan ning kuwarta didto sa templo kag ging-obserbahan niya ang mga tawo nga nagabutang ng inda mga kuwarta. Madamò nga mga manggaranon ang nagabutang ning dakò nga mga kantidad. ⁴² May nagpalapit nga pubre nga babayi nga bayo kag nagbutang ning duha nga sinsilyo. ⁴³ Gingtawag ni Hesus ang iya mga disipulo kag naghambay sa inda, “Sa matuod lang, mas madakò ang gingbutang ng ini nga pubre nga bayo kaysa tanan nga nagtao. ⁴⁴ Kay sinda madamò ang kuwarta kag ang inda gingtao hay ang bukon na ninda kahinangyan. Pero ang bayo, bisan pubre siya, gingtao niya ang tanan nga iya ginasaligan nga pangabuhian.”