¹ Nang nagapaluwas na si Hesus sa templo, ang isa niya nga disipulo naghambay, “Maistro, tan-awa ang kaayo-ayo nga templo nga himò sa kamahay-mahay nga mga bato.”

² Naghambay si Hesus sa iya, “Nakità mo ba inà nga mabahoy nga templo nga himò sa madagkò nga mga bato? Inà nga mga bato hay pangtumbahon sa paabuton kag wayà gid ning may mabilin nga nagapamagtumbaw.”

³ Nang nagapungkò si Hesus paatubang sa templo didto sa Bakuyod nga may mga tanom nga Olibo, nagpalapit sina Pedro, Santiago^a, Juan kag Andres kag nagpangutana sa iya nang sinda na lang. ⁴ Hambay ninda, “Balitai kami kung san-o matabò ang mga bagay nga imo ginghambay. Kag ano baya ang tandà kung san-o nga daan ini tanan matabò?”

⁵ Nganì naghambay si Hesus sa inda, “Magbantay kamo nga wayà ning may makapatayang sa indo. ⁶ Kay madamò ang magaabot kag magahambay ang kada isa sa inda, ‘Ako imaw ang Kristo’, kag madamò ang inda mapatayang. ⁷ Kung makabatì kamo ng mga gira nga malapit sa indo kag makasayod kamo nga sa iban nga nasyon nagagira da, ayaw kamo mahadlok. Dapat gid ini tanan matabò, pero bukon pa ini ang katapusan. ⁸ Magainaway ang mga nasyon kag magainaway ang mga gingharian. May matabò nga mga linog sa iba-iba nga mga lugar kag may magaabot nga mga kagutom. Ini nga mga bagay hay daw pareho ng una nga kasakit nga nababatyagan nang maongà.

⁹ “Magbantay kamo, kay pangdakupon kamo kag itugyan sa Korte ng mga Judio. Latiguhon kamo sa mga sinagoga^b. Magaatubang kamo sa mga gobernador kag sa mga harì tungod sa indo pagtuman sa akon. Kag didto mabalitaan nindo sinda parti sa akon. ¹⁰ Dapat iwali ang Maayo nga Balità sa tanan nga nasyon, bago mag-abot ang katapusan. ¹¹ Kung pangdakupon kamo kag itugyan sa korte, ayaw kamo magkabayaka kung ano ang indo isabat, kay sa oras nga kahinangyan kamo maghambay, hambayon lang nindo ang ginatao sa indo ng Espiritu Santo. Kay bukon kamo ang magahambay kundì ang Espiritu Santo paagi sa indo. ¹² Sa inà nga mga adlaw, may mga tawo nga magpapatay ng inda mga maguyang kag mga manghod. May mga tatay nga magpapatay ng inda mga ongà. Kag may mga ongà nga magabatò sa inda mga ginikanan kag ipapatay ninda. ¹³ Mahahangit sa indo ang tanan kay kamo hay akon mga tagasunod. Pero ang nagatiis sa pagtuman sa akon hasta sa katapusan imaw lang ang maluwas.

¹⁴ “Kung makità na nindo ang kalain-lain nga imahen^c nga yarà sa templo ng mga Judio nga indì niya dapat tindugan, (kamo nga nagabasa, intindihon gid nindo kung ano ang gusto hambayon ini), ang mga yarà sa Judea dapat magkadto nga daan sa kabukiran. ¹⁵ Ang tawo nga matabuan nga yarà sa luwas ng iya bayay indì na dapat magsuyod para magbuoy ning abir ano. ¹⁶ Ang matabuan nga yarà sa iya uma indì na dapat magbalik para magbuoy ning iya barò. ¹⁷ Makaluluoy ang mga naganabdos kag ang mga nagapasuso sa adto nga mga adlaw kay mahugaan gid sinda sa pagpanaw nga daan. ¹⁸ Magpangamuyò kamo nga indì ini matabò sa tiglalamig. ¹⁹ Kay sa adto nga mga adlaw magaabot ang kahugaan nga wayà pa gid natabò halin sa pagtunà nang ginghuman ng Dios ang kalibutan hasta sa niyan, kag wayà pa ning may matabò nga pareho adto abir san-o. ²⁰ Kung wayà patag-ura ng Ginoo ang mga adlaw nga magaabot, indì gid maluwas ang mga tawo. Pero tungod sa kaluoy niya sa iya mga gingpilì, patag-uron niya adto nga mga adlaw.

²¹ “Kung may maghambay sa indo, ‘Yari na ang Kristo’ o ‘Yadto siya’, ayaw kamo magpati. ²² Kay magaabot ang bukon matuod nga mga kristo kag ang bukon matuod nga mga miyugbalità ng mensahe ng Dios. Magahuman sinda ning mga milagro kag makatitingaya nga mga bagay para patayangon kung puydi abir pa ang mga gingpilì ng Dios. ²³ Nganì magbantay kamo! Bago pa matabò ini nga mga bagay, ginahambay ko na ini nga daan sa indo.

²⁴ “Pagkatapos ng mga kahugaan sa adto nga mga adlaw, ang adlaw magaduyom, ang bulan indì na magahayag, ²⁵ kag ang mga bituon sa langit magakahuyog. Ang mga bagay^d sa kalangitan pagahubugon. ²⁶ Tapos makità ng mga tawo ako nga Ongà ng Tawo, nga nagasakay sa mga panganod, nga nagaabot sa kalibutan, nga may madakò nga gahom kag himayà. ²⁷ Suguon ko ang akon mga anghel agud tipunon ang akon mga gingpilì halin sa tanan nga lugar ng kalibutan.

²⁸ “Magtu-on kamo ng leksyon parti sa kahoy nga igos. Kung ang iya mga sanga nagasalingsing kag nagausbod na, sayod na nindo nga tinguyanon^e. ²⁹ Imaw da, kung makità nindo nga nagakatabò na ini nga mga bagay nga akon ginabalità sa indo, sayod nindo nga madalì na lang ako mag-abot. ³⁰ Sa matuod lang, magakatabò ini tanan bago mamatay ang mga tawo sa ini nga tiyempo. ³¹ Maduduyà ang langit kag ang kalibutan, pero ang akon mga hambay hay magapadayon gid.

³² “Kung parti sa adto nga adlaw o sa oras, wayà gid ning may nakakasayod abir ang mga anghel sa langit o ako nga Ongà ng Dios, kundì ang Amay lang gid sa langit. ³³ Nganì mag-alisto kamo kag magbantay, kay wayà kamo makasayod kung san-o maabot adto nga adlaw. ³⁴ Pareho da ini sa tawo nga nagkadto sa malayò nga lugar. Paghalin niya sa iya bayay, gingtao niya sa iya mga ulipon ang otoridad, kag kada isa sa inda hay may trabaho. Kag gingsugò niya ang bantay sa puwertahan nga magbantay. ³⁵ Nganì magbantay kamo kay wayà kamo makasayod kung san-o mabalik ang tag-iya ng bayay; puydi sa manayumsom, sa hanagob, sa aga-aga, o sa pagsubat ng adlaw. ³⁶ Basì kung gulpi lang ang iya pag-abot kag maabutan niya kamo nga nagakatuyog. ³⁷ Ang ginahambay ko sa indo hay ginahambay ko da sa tanan: Magbantay kamo!”