¹ Duha na lang ka adlaw bago mag-abot ang Pista ng Pagligad ng Anghel^a kag Pista ng Tinapay nga wayà ning Pangpaalsa. Ang mga pinunò nga parì kag ang mga manunudlò ng Kasuguan hay may plano nga patyon si Hesus. Nganì nagapangità sinda ning paagi kung pauno ninda madakop si Hesus nga pasekrito. ² Naghambay sinda, “Indì lang naton itamà sa pista kay basì kung magkagulo ang mga tawo.”

³ Nang yadto sina Hesus sa Betania, mintras nagakaon siya sa bayay ni Simon nga kitungon dati, may isa ka babayi nga nag-abot. May daya siya ning maisot nga tibod, punò ning kamahay kag maayo nga klasi nga pahumot. Ini nga pahumot hay halin sa mahumot nga tanom nga ginatawag ‘nardo’. Pagpalapit niya kay Hesus, ging-utod niya ang liog ng tibod kag gingbubuan niya ning pahumot ang uyo ni Hesus. ⁴ May mga tawo didto nga nahangit kag naghambay, “Taya! Basì baya ginauyakan lang niya ang pahumot? ⁵ Puydi kuntà inà maibaligyà sa kantidad nga bali isa ka tuig nga suweldo^b kag itao sa mga pubre.” Kag ginghambayan ninda ning masakit ang babayi.

⁶ Pero naghambay si Hesus sa inda, “Basì ginagulo nindo siya? Pabay-i lang nindo siya. Maayo gid ang iya ginghuman sa akon! ⁷ Ang mga pubre hay permi nindo kaibahan kag puydi kamo makabulig sa inda abir san-o nga gusto nindo, pero ako hay bukon nindo permi kaibahan. ⁸ Ini nga babayi naghuman ng iya kaya para sa akon. Gingbubuan niya ning pahumot ang akon lawas sa pagpreparar ng akon lubong. ⁹ Sa matuod lang, abir diin iwali ang Maayo nga Balità sa bilog nga kalibutan, ang iya ginghuman sa akon hay ibalità da agud madumduman siya.”

¹⁰ Pagkatapos si Judas Iskariote, nga isa sa 12 nga apostol, hay nagkadto sa mga pinunò nga parì agud planuhon kung pauno itugyan sa inda si Hesus. ¹¹ Pagkabatì ini ninda, nalipay gid sinda kag nagpangakò nga taw-an siya ning kuwarta. Nganì tunà adto, nagapangità siya ning paagi kung pauno niya itugyan si Hesus sa inda.

¹² Nag-abot ang una nga adlaw ng Pista ng Tinapay nga wayà ning Pangpaalsa. Imaw ini ang adlaw nga ginapatay ang karnero para sa Pista ng Pagligad ng Anghel. Nganì nagpangutana ang mga disipulo ni Hesus sa iya, “Sa diin ang gusto mo magpreparar ning ihapon para sa Pista ng Pagligad ng Anghel?”

¹³ Gingsugò niya ang iya duha nga disipulo. Hambay niya, “Kadto kamo didto sa siyudad ng Jerusalem. Pag-abot nindo didto, may masumpong kamo nga tawo nga nagadaya ning maisot nga bangà nga may tubì. Sunòd kamo ¹⁴ sa bayay nga iya suyuran kag magpangutana kamo sa tag-iya ng bayay, ‘Nagapapangutana ang maistro kung diin ang kuwarto nga iya kaunan kaibahan ng iya mga disipulo para magkaon sa Pista ng Pagligad ng Anghel.’ ¹⁵ Ipakità niya sa indo ang malapad nga kuwarto sa ibabaw nga kumplito ning mga gamit kag preparado na. Didto kamo magpreparar ng aton ihapon.”

¹⁶ Nagpanaw ang duha nga disipulo kag pag-abot ninda sa siyudad, nakità ninda ang tanan sunò sa ginghambay ni Hesus sa inda. Kag didto ninda gingpreparar ang ihapon para sa Pista ng Pagligad ng Anghel.

¹⁷ Nang manayumsom na, nag-abot si Hesus kag ang 12 nga apostol sa bayay. ¹⁸ Mintras nagakaon sinda, naghambay si Hesus, “Sa matuod lang, isa sa indo nga kaibahan ko diri sa pagkaon ang magatraidor sa akon.”

¹⁹ Pagkabatì ninda, nalisod gid sinda kag kada isa sa inda nagpangutana sa iya, “Bukon ako, dì ba?”

²⁰ Naghambay si Hesus sa inda, “Isa sa indo sa 12, nga magasawsaw ning tinapay sa hambawan kaibahan ko ang magatraidor sa akon. ²¹ Ako nga Ongà ng Tawo hay pagapatyon sunò sa gingsulat, pero makaluluoy gid ang tawo nga magatraidor sa akon. Maayo pa sa iya nga wayà natawo.”

²² Mintras nagakaon sinda, nagbuoy si Hesus ning tinapay. Gingpasalamatan niya ang Dios, kag gingpangbuak-buak ang tinapay. Pagkatapos gingtao niya sa iya mga disipulo kag naghambay, “Kaon kamo, imaw ini ang akon lawas.”

²³ Kag nagbuoy siya ning tasa, nagpasalamat sa Dios kag gingtao sa inda. Kag sinda tanan hay nag-inom. ²⁴ Naghambay si Hesus, “Ini ang akon dugò nga mabubò para sa kasugtanan agud mapatawad ang madamò nga mga tawo. ²⁵ Sa matuod lang, indì na ako mag-inom liwat ini nga ilimnanon nga halin sa ubas hasta sa adlaw nga magainom ako ning bag-o nga klasi ng ilimnanon sa paghaharì ng Dios sa mga tawo.”

²⁶ Pagkatapos nagkanta sinda ning pagdayaw sa Dios kag nagkadto sa Bakuyod nga may tanom nga mga Olibo.

²⁷ Naghambay si Hesus sa inda, “Bayaan ako nindo tanan, kay nakasulat sa Kasulatan, ‘Patyon ko ang miyugbantay kag magapananayang ang mga karnero.’ ²⁸ Pero pagkatapos nga mabuhì ako liwat, mauna ako sa indo didto sa Galilea.”

²⁹ Naghambay si Pedro kay Hesus, “Abir sinda tanan bayaan ka, ako indì gid!”

³⁰ Naghambay si Hesus sa iya, “Sa matuod lang, niyan sa gab-i bago magtuktuyaok ang suyog ning pangaduha, indì mo ako pagkilay-on ning tuyo ka beses.”

³¹ Pero nagpilit pa gid si Pedro nga nagahambay, “Indì gid ako maghambay nga wayà ta ikaw makilaya, abir patyon pa ninda ako kaibahan ka.”

Imaw da ang ginghambay ng tanan nga disipulo.

³² Pagkatapos nagkadto sinda sa lugar nga ginatawag, ‘Getsemani’. Pag-abot ninda didto, naghambay si Hesus sa iya mga disipulo, “Magpungkò kamo diri mintras nagapangamuyò ako.” ³³ Gingdaya niya sina Pedro, Santiago^c kag Juan sa una-unahan. Dakò gid ang kalisod ni Hesus. ³⁴ Kag naghambay siya sa inda, “Daw mamatay ako kay tudo gid ang akon kalisod. Pabilin kamo diri kag magpamuyaw.”

³⁵ Tapos nagkadto pa gid siya sa unahan, naghapà siya sa dutà kag nagpangamuyò nga kung puydi lang, ipalampas ang oras ng iya kamatayon. ³⁶ Nagpangamuyò siya, “Abba^d Amay, ang tanan nga bagay hay posible sa imo. Nganì buy-a ini nga kahugaan sa akon. Pero bukon ang akon kagustuhan kundì ang imo kagustuhan ang dapat matuman.”

³⁷ Nagbalik siya sa iya tuyo nga disipulo kag naabutan niya sinda nga nagakatuyog. Naghambay siya kay Pedro, “Simon, nagakatuyog ka ba? Indì ka ba makapapuyaw abir isa lang ka oras?” ³⁸ Naghambay pa gid siya sa inda, “Magpamuyaw kamo kag magpangamuyò para indì kamo maperdi ng panulay. Gusto ng indo espiritu nga magtuman ng akon gingbilin sa indo ugaling maluya ang indo lawas.”

³⁹ Nagpanaw liwat si Hesus sa unahan kag nagpangamuyò. Imaw da gihapon ang iya pangamuyò. ⁴⁰ Pagkatapos nagbalik siya liwat sa iya mga disipulo kag naabutan na naman niya sinda nga nagakatuyog kay mabug-at na gid ang inda mga mata. Kag wayà sinda kasayod kung ano ang inda isabat sa iya.

⁴¹ Sa ikatuyo nga pagbalik niya sa inda, naghambay siya, “Nagakatuyog pa ba gihapon kamo kag nagapahuway? Tamà na inà! Nag-abot na ang oras nga ako nga Ongà ng Tawo hay itao sa mga makasal-anan. ⁴² Bangon kamo! Siroa, yarà na ang tawo nga nagtraidor sa akon.”

⁴³ Mintras nagahambay pa si Hesus, nag-abot si Judas nga isa sa 12 nga apostol. Kaibahan niya ang madamò nga mga tawo nga may daya nga mga sundang kag mga pamakang. Gingsugò sinda ng mga pinunò nga parì, mga manunudlò ng Kasuguan kag mga miyugdumaya ng mga Judio. ⁴⁴ Bago sinda nag-abot, gingbilinan na ng nagtraidor nga si Judas ang mga madakop kung ano ang iya isinyas: ‘Ang tawo nga akon haruan imaw ang indo ginapangità. Dakpa kag day-a nindo siya kag bantayan gid ning maayo.’

⁴⁵ Nganì pag-abot ni Judas didto, nagdiritso siya kay Hesus kag naghambay, “Maistro!” Kag gingharuan niya siya. ⁴⁶ Nganì gingdakop ninda si Hesus. ⁴⁷ Pero ang isa sa mga kaibahan ni Hesus hay naggabot ng iya sundang kag ginglabò ang ulipon ng Pinakapunò ng mga parì kag nautod ang iya talinga. ⁴⁸ Naghambay si Hesus sa mga nagdakop, “Basì! Tulisan ba ako nga kahinangyan gid nga magdaya pa kamo ning mga sundang kag mga pamakang sa pagdakop sa akon? ⁴⁹ Adlaw-adlaw yadto ako sa templo nga nagatudlò kag yadto da kamo, pero wayà nindo ako pagdakpa. Pero kahinangyan nga matabò ini agud matuman ang mga nakasulat sa Kasulatan parti sa akon.”

⁵⁰ Kag gingbayaan siya ng tanan niya nga disipulo kag nagdyagan sinda palayò.

⁵¹ May isa ka sultirito didto nga nagsunod kay Hesus nga nagatapis lang ng tela^e. Nadakop kuntà siya ninda, ⁵² ugaling nakahuyagpos siya, nganì nabilin ang tela kag nagdyagan siya nga nakauba.

⁵³ Gingdaya ninda si Hesus sa Pinakapunò ng mga parì. Didto nagatipon ang mga pinunò nga parì, ang mga miyugdumaya ng mga Judio, kag ang mga manunudlò ng Kasuguan. ⁵⁴ Si Pedro nagsunod da pero malayo-layò kay Hesus. Nagsuyod siya sa dya-ag ng Pinakapunò ng mga parì kag nagpungkò kaibahan ng mga guwardya malapit sa kalayo agud magpainit-init. ⁵⁵ Ang mga pinunò nga parì kag ang tanan nga miyembro ng Korte ng mga Judio hay nagpangità ning mga ibidinsya kuntra kay Hesus agud ipapatay ninda siya, pero wayà gid sinda ning may nakità. ⁵⁶ Madamò ang nagtistigo ning pinusong kuntra sa iya, pero wayà nagapareho ang inda mga balità.

⁵⁷ May mga tawo pa gid didto nga nagtistigo ning pinusong kuntra kay Hesus. Naghambay sinda, ⁵⁸ “Nabatian namon siya nga naghambay, ‘Gubaon ko ini nga templo nga gingpatindog ng mga tawo kag sa suyod ng tuyo ka adlaw patindugon ko ang iban nga templo nga bukon mga tawo ang magahuman.’” ⁵⁹ Bisan ano ang ginghambay ninda, ang inda mga balità hay wayà nagapareho.

⁶⁰ Nagtindog sa tungà ang Pinakapunò ng mga parì kag nagpangutana kay Hesus, “Wayà ka ba ning mairason sa ini nga mga akusasyon kuntra sa imo?”

⁶¹ Wayà gid nagsabat si Hesus. Nganì gingpangutana siya liwat ng Pinakapunò ng mga parì, “Ikaw ba ang Kristo nga Ongà ng Dios nga ginadayaw ng mga tawo?”

⁶² Nagsabat si Hesus sa iya, “Huo, ako! Kag makità nindo ako nga Ongà ng Tawo, nagapungkò hampig sa tuo ng Makagagahom nga Dios kag makità da nindo ako kaibahan ng mga panganod halin sa langit nga nagaabot diri sa kalibutan.”

⁶³ Pagkabatì adto ng Pinakapunò ng mga parì, ginggisì niya ang iya barò sa kahangit kag naghambay, “Indì na kahinangyan ng mga testigo! ⁶⁴ Nabatian nindo ang iya pag-insulto sa Dios, ano ba ang indo disisyon?”

Kag gingdisisyunan ninda nga angay gid siya patyon.

⁶⁵ Ang iban sa inda nagpilà kay Hesus. Gingtabunan ninda ang iya hitsura kag gingsumbag. Tapos naghambay sinda, “Pintua kung sin-o ang nagsumbag sa imo?” Pagkatapos gingtinampa siya ng mga guwardya.

⁶⁶ Nang yadto pa si Pedro sa dya-ag, nag-agi ang isa sa mga ulipon nga babayi ng Pinakapunò ng mga parì. ⁶⁷ Pagkakità niya kay Pedro nga nagapainit-init malapit sa kalayo, gingsirò niya siya ning maayo kag naghambay, “Kaibahan ka da ni Hesus nga taga-Nazaret.”

⁶⁸ Pero wayà siya nag-akò, “Wayà ko masayuri kag maintindihi kung ano ang imo ginahambay.” Tapos nagkadto siya sa puwertahan paluwas.^f

⁶⁹ Didto nakità naman siya ng ulipon nga babayi kag naghambay liwat sa mga tawo didto, “Ini nga tawo hay isa sa mga kaibahan ni Hesus.” ⁷⁰ Pero wayà gihapon nag-akò si Pedro.

Malagat-lagat naghambay ang mga tawo didto kay Pedro, “Sigurado gid nga kaibahan ka niya kay taga-Galilea ka da!”

⁷¹ Pero nagsumpà gid si Pedro nga nagahambay, “Abir mamatay pa ako, wayà ko gid nakilaya ang tawo nga indo ginahambay!”

⁷² Adto nga daan nagtuktuyaok ning pangaduha ang suyog kag nadumduman ni Pedro ang ginghambay ni Hesus sa iya, “Bago magtuktuyaok ang suyog ning pangaduha, indì mo ako kilayahon ning tuyo ka beses.” Nganì nagtangis kag nagdanguyngoy si Pedro.