¹ Pagkatapos nang Adlaw nga Inugpahuway, nang manayumsom na, si Maria nga taga-Magdala, si Maria nga nanay ni Santiago^a kag si Salome hay nagbakay ning pahumot kay makadto sinda sa kuyba nga ginglubungan para pahiran ang lawas ni Hesus. ² Aga pa gid ng Una nga adlaw ng simana, nagkadto sinda sa kuyba nga lubungan. ^3,4 Mintras nagapanaw sinda, nagpinanguntan-an sinda, “Sin-o baya ang aton pangabayon nga magpaligid ng bato nga nagasara sa lubungan?” (Kay subra kabahoy ang bato.) Pero pag-abot ninda didto, nakità ninda nga napaligid na ang bato. ⁵ Nganì nagsuyod sinda sa lubungan kag nakità ninda ang isa ka sultirito nga nakabarò ning putì nga nagapungkò hampig sa tuo. Kag hinadlukan gid sinda.

⁶ Tapos naghambay ang sultirito sa inda, “Ayaw kamo mahadlok! Sayod ko nga ginapangità nindo si Hesus nga taga-Nazaret nga ginglangsang sa krus. Wayà na siya diri! Nabuhì na siya liwat! Siroa nindo ang gingbutangan sa iya.

⁷ “Panaw kamo, balitai nindo ang iya mga disipulo labi na gid si Pedro, nga nauna na si Hesus sa indo didto sa Galilea. Didto nindo siya makità sunò sa iya ginghambay sa indo.”

⁸ Nganì nagluwas ang mga babayi sa kuyba kag nagdyagan nga nagapangurog kay subra gid ang inda katingaya. Wayà sinda nagbalità abir kay sin-o kay ginahadlukan gid sinda.^b

⁹ [Nagkadto ang mga babayi kay Pedro kag sa iya mga kaibahan kag gingbalitaan ning matag-od parti sa ginghambay sa inda. ¹⁰ Pagkatapos adto, gingsugò ni Hesus ang iya mga tagasunod sa bilog nga kalibutan agud iwali ninda ang balità nga banal kag indì maduduyà para sa kaluwasan nga wayà katapusan. Kabay pa.]

⁹ [Aga pa gid nang una nga adlaw ng simana, nabanhaw si Hesus. Una gid siya nagpakità kay Maria nga taga-Magdala, nga dati anay may pito nga malain nga mga espiritu nga gingpalayas ni Hesus. ¹⁰ Nagkadto si Maria sa mga tagasunod ni Hesus nga nagakalisod kag nagatinangis, kag gingbalitaan niya sinda. ¹¹ Pero wayà sinda nagpati sa iya gingbalità nga nabuhì si Hesus kag nagpakità sa iya.

¹² Pagkatapos adto, nagpakità si Hesus nga iba ang hitsura sa iya duha nga tagasunod nang nagapakadto sinda sa baryo. ¹³ Nganì nagbalik sinda sa Jerusalem kag gingbalitaan ninda ang iban nga mga kaibahan nga si Hesus hay nagpakità sa inda. Pero wayà da sinda nagpati.

¹⁴ Nang ulihi nagpakità naman si Hesus sa onse nga apostol mintras nagakaon sinda. Gingsabyaw niya sinda kay wayà sinda ning pagtuo kag matugas ang inda mga uyo, kay wayà sinda nagapati sa gingbalità ng mga nakakità sa iya nga nabuhì siya liwat. ¹⁵ Kag naghambay si Hesus sa inda, “Kadto kamo sa bilog nga kalibutan kag iwali ang Maayo nga Balità sa tanan nga tawo. ¹⁶ Ang abir sin-o nga magtuo kag magpabawtismo maluwas, pero ang indì magtuo parusahan ng Dios. ¹⁷ Kag ini nga mga milagro ang makikità sa mga tawo nga nagatuo sa akon: paagi sa akon pangayan magapalayas sinda ning malain nga mga espiritu; magahambay sinda ning iban nga mga lingguahe nga wayà ninda nasayuri; ¹⁸ kung makahawid sinda ning mga sawa o makainom ning abir ano nga hilò indì sinda maano; kag kung itungtong ninda ang inda mga kamot sa may mga sakit, magaayo.”

¹⁹ Pagkatapos maghambay si Hesus sa inda, gingdaya siya palangit kag nagpungkò hampig sa tuo ng Dios. ²⁰ Kag nagwali ang iya mga tagasunod abir diin nga lugar. Gingbuligan sinda ng Ginoo kag gingpamatuuran ang gingwali ng mga tagasunod paagi sa mga milagro nga inda ginghuman. Kabay pa.]