¹ Pag-abot ng adlaw ng Dominggo^a nga aga, maduyom-duyom pa, nagkadto na si Maria nga taga-Magdala sa kuyba nga ginglubungan kay Hesus. Pag-abot niya didto, nakità niya nga wayà na ang sara nga bato sa puwertahan ng lubungan. ² Nganì nagdyagan siya kag nagkadto kay Simon Pedro^b kag sa disipulo nga pinalanggà ni Hesus kag nagbalità, “Gingbuoy ninda ang Ginoo sa lubungan nga kuyba kag wayà kami^c kasayod kung diin ninda siya gingbutang.”

³ Nganì nagluwas kag nagkadto sa lubungan si Pedro kaibahan adtong disipulo. ⁴ Nagdyagan sinda nga duha, pero mas matulin adtong disipulo nga kaibahan ni Pedro, nganì siya ang una nga nakaabot sa lubungan. ⁵ Nagdukò siya kag naglìlì sa suyod. Nakità niya nga yadto nakabutang ang tela nga ginggamit sa paglubong kay Hesus, pero wayà siya magsuyod. ⁶ Malagat-lagat, umabot da si Simon Pedro kag diri-diritso siya nga nagsuyod sa lubungan. Nakità niya nga nakabutang didto ang tela ⁷ patì ang panyò nga gingputos sa uyo ni Hesus. Bukon ini kaibahan sa maayo nga klasi nga tela, kundì nakabuyag sa alihid kag nakalukot ini ning maayo. ⁸ Tapos nagsuyod da ang disipulo nga nauna mag-abot, kag sa iya nakità, nagapati siya. ⁹ (Pero abir tiyad adto, wayà gihaon ninda naiintindihi ang nakasulat sa Kasulatan nga kahinangyan mabanhaw si Hesus.) ¹⁰ Pagkatapos nag-ulì ang duha nga disipulo sa inda lugar.

¹¹ Niyan si Maria nga taga-Magdala hay nagatindog gihapon didto sa luwas ng lubungan nga nagatangis. Mintras nagatangis siya, nagdukò siya kag naglìlì sa suyod ng lubungan nga kuyba ¹² kag nakità niya ang duha nga anghel nga nakaputì ning barò kag nagapungkò sa dati nga gingbutangan ng lawas ni Hesus. Ang isa hay hampig sa uyuhan kag ang isa sa sikwayan. ¹³ Nagpangutana sinda sa iya, “Nang, basì nagatangis ka?”

Nagsabat siya, “Kay gingbuoy ninda ang akon Ginoo kag wayà ako kasayod kung diin ninda siya gingbutang.”

¹⁴ Pagkahambay niya adto, naglingig siya kag nakità niya nga may tawo nga nagatindog, pero wayà niya nakilaya nga si Hesus adto. ¹⁵ Nagsiling si Hesus, “Nang, basì nagatangis ka? Sin-o ang imo ginapangità?”

Ang kalaom ni Maria, siya ang miyugbantay ng lugar nga may mga tanom, nganì naghambay siya, “Nong, kung kamo ang nagbuoy sa iya, tudluan abi sa akon kung diin nindo siya gingbutang kay akon buy-on.”

¹⁶ Gingtawag siya ni Hesus, “Maria.”

Nag-atubang si Maria kag naghambay kay Hesus sa Hebreo nga lingguahe, “Rabboni!” (Ang gusto hambayon ‘Maistro’.)

¹⁷ Hambay ni Hesus, “Ayaw ako maghawiri kay wayà pa ako makabalik sa akon Amay. Kadto sa akon mga kauturan kag balitai nga mabalik na ako sa akon Amay nga indo da Amay, sa akon Dios nga indo da Dios.”

¹⁸ Nganì nagkadto si Maria nga taga-Magdala sa mga disipulo kag nagbalità, “Nakità nakon ang Ginoo!” Kag ginghambay da sa inda ang mga gingbilin sa iya ni Hesus.

¹⁹ Pagkagab-i, nang adto da nga adlaw ng Dominggo, nagtipon-tipon ang mga disipulo ni Hesus sa bayay. Nakatrangka ang puwertahan ng bayay nga inda ginatipunan kay nahadlok sinda sa mga pinunò ng Judio. Gulpi lang nga nag-abot si Hesus kag nagtindog sa tungà ninda. Hambay niya sa inda, “Ang katawhayan yarà sa indo.” ²⁰ Pagkahambay niya adto, gingpakità niya ang iya mga kamot kag ang iya kilid sa inda. Nganì nalipay gid ang mga disipulo nang makità ang Ginoo.

²¹ Nagsiling liwat si Hesus sa inda, “Ang katawhayan yarà sa indo. Kung pauno nga gingsugò ako ng akon Amay, ginasugò ko da kamo.” ²² Pagkahambay niya adto, ginghuyupan niya sinda kag naghambay, “Batuna nindo ang Espiritu Santo, ²³ agud ang sin-o man nga balitaan nindo nga ginapatawad sinda sa mga kasal-anan, gingpatawad na da ng Dios. Pero ang sin-o man nga hambayan nindo nga wayà sinda ginapatawad sa mga kasal-anan, wayà da gingpatawad ng Dios.”

²⁴ Pero si Tomas nga may hayò nga ‘Kapid’, isa sa 12 nga disipulo hay bukon ninda kaibahan nang nagpakità si Hesus. ²⁵ Nganì gingbalitaan siya ng iba nga disipulo, “Nakità namon ang Ginoo!”

Nagsabat si Tomas, “Indì ako magpati, mintras indì ko mismo makità kag matuslok ng akon tudlò ang ging-agihan ng langsang sa iya mga kamot, kag matandog ng akon payad ang iya kilid.”

²⁶ Pagkaligad ng wayo ka adlaw, nagtipon-tipon liwat sa suyod ng bayay ang mga disipulo kag kaibahan ninda si Tomas. Abir nakatrangka ang puwertahan, pero gulpi lang nga nagsuyod si Hesus kag nagtindog sa inda tungà. Hambay niya sa inda, “Ang katawhayan yarà sa indo.” ²⁷ Pagkatapos hambay niya kay Tomas, “Siroa ang akon mga kamot kag tuslukan ang imo tudlò sa akon pilas. Kag tanduga ng payad ang akon kilid. Ayaw magduda, magtuo ka na.”

²⁸ Hambay ni Tomas, “Ikaw ang akon Ginoo kag ang akon Dios!”

²⁹ Tapos naghambay si Hesus, “Tomas, nagatuo ka na ba kay nakità mo ako? Pakamaayuhon ang mga nagatuo sa akon abir wayà ninda ako makità.”

³⁰ Kadamò pa gid ang mga makatitingaya nga ginghuman ni Hesus nga nakità ng iya mga disipulo, nga wayà gingsulatan sa ini nga libro. ³¹ Pero gingsulat ko ini nga mga bagay agud magtuo kamo nga si Hesus ang Kristo^d, ang Ongà ng Dios. Kag paagi sa indo pagtuo, makabaton kamo ning kabuhì nga wayà katapusan kay kamo hay may relasyon sa iya^e.