¹ Pagsubat nga daan ng adlaw, ang mga pinunò nga parì kaibahan ang mga miyugdumaya, ang mga manunudlò ng Kasuguan kag ang tanan nga miyembro sa Kurti ng mga Judio, hay nagmiting para magplano kung pauno ang humanon kay Hesus. Ginggapos ninda si Hesus kag gingdaya agud itugyan kay Pilato nga gobernador. ² Gingpangutana siya ni Pilato, “Ikaw ba ang harì ng mga Judio?”

Nagsabat si Hesus sa iya, “Ikaw ang naghambay.”

³ Madamò ang mga akusasyon ng mga pinunò nga parì kuntra kay Hesus. ⁴ Nganì gingpangutana siya liwat ni Pilato, “Wayà ba ikaw ning may maisabat sa ini nga mga akusasyon? Madamò gid ang inda akusasyon kuntra sa imo!”

⁵ Pero wayà gid nagsabat si Hesus, nganì natingaya gid si Pilato.

⁶ Kada Pista ng Pagligad ng Anghel^a ang ginahuman ni Pilato hay magpaluwas ning isa ka priso sunò sa ginapangayò ng mga tawo. ⁷ May isa ka priso didto nga ginatawag si Barrabas. Ini nga tawo gingpriso kaibahan adtong mga nakapatay pagrebeldi ninda kuntra sa gobyerno. ⁸ Madamò nga mga tawo ang nagpalapit kay Pilato. Kag gingpangayò ninda nga humanon niya liwat ang nagamnan niya kada Pista. ⁹ Nagpangutana siya sa inda, “Gusto ba nindo nga buhian ko ang harì ng mga Judio para sa indo?” ¹⁰ Nasayuran gid ni Pilato nga naili ang mga pinunò nga parì, nganì gingtugyan ninda si Hesus sa iya.

¹¹ Pero gingsuysuyan ng mga pinunò nga parì ang mga tawo nga si Barrabas lang ang inda pangayuon nga paluwason, bukon si Hesus. ¹² Gingpangutana liwat ni Pilato ang mga tawo, “Ano ang akon humanon sa tawo nga indo ginatawag nga harì ng mga Judio?”

¹³ Nagsinggit sinda, “Ilangsang siya!”

¹⁴ Naghambay si Pilato sa inda, “Basì, ano ba nga salà ang iya nahuman?”

Pero gingtuduhan pa gid ninda ang pagsinggit, “Ilangsang siya sa krus!”

¹⁵ Nganì tungod gusto ni Pilato papaburan ang mga tawo, gingpaluwas niya si Barrabas para sa inda. Tapos gingpabunay niya si Hesus kag gingtugyan sa mga sundalo agud ilangsang sa krus.

¹⁶ Gingdaya ng mga sundalo si Hesus sa suyod ng ginaistaran ng gobernador nga ginatawag, ‘Pretoryo’ kag gingtawag ninda ang tanan nga batalyon ng mga sundalo nga magtipon didto. ¹⁷ Kag gingbutangan ninda si Hesus ning kapa nga maron. Tapos ginghumanan ninda ning korona nga tunukon kag gingsuksok sa iya uyo. ¹⁸ Pagkatapos ginatiaw-tiawan ninda siya ginakamusta-kamusta nga ang hambay, “Mabuhay, ang Harì ng mga Judio!” ¹⁹ Kag sige ang inda pukoy ng patpat sa iya uyo kag gingpil-an da ninda siya. Gingluhud-luhuran ninda siya nga daw nagarespito. ²⁰ Pagkatapos ng inda pag-insulto, ging-uba ninda ang kapa nga maron kag gingsuksukan ninda liwat siya ng iya barò. Tapos gingdaya ninda siya sa luwas agud ilangsang sa krus.

²¹ Nang nagapanaw sinda, nasumpong ninda ang isa ka tawo nga halin sa baryo. Ang iya pangayan hay si Simon nga taga-Cirene, nga tatay ni Alejandro kag ni Rufo. Ging-ahat gid siya ng mga sundalo nga magpas-an ng krus ni Hesus. ²² Pagkatapos gingdaya ninda si Hesus sa lugar nga ginatawag, ‘Golgota’ (nga gusto hambayon, ‘Lugar ng Tuy-an nga Uyo’). ²³ Pag-abot ninda didto, gingtaw-an ninda si Hesus ning inumon nga may halò nga mira^b, pero wayà gid mag-inom si Hesus. ²⁴ Pagkatapos ginglangsang ninda siya sa krus kag gingparte ninda ang iya barò paagi sa palabunutan agud masayuran kung ano nga parte ang mabuoy ng kada isa. ²⁵ Mga alas nuybe nang aga, ginglangsang ninda si Hesus sa krus. ²⁶ Ang nakasulat sa karatula sa krus nga ginabintang kuntra sa iya hay, ‘Ang Harì ng mga Judio.’ ²⁷ May duha da didto nga tulisan nga ginglangsang sa krus, ang isa hampig sa tuo ni Hesus kag ang isa hay sa waya. ²⁸ [Sa ini nga paagi natuman ang nakasulat sa Kasulatan, ‘Gingtratar siya nga isa sa mga kriminal.’]^c

²⁹ Ang mga tawo nga nagapang-agi didto nagaliong-liong nga ginainsulto si Hesus. Hambay ninda, “Hay-y-y-y! Ikaw nga nagahambay nga gubaon mo ang templo kag sa suyod ng tuyo ka adlaw patindugon mo liwat, ³⁰ panaog dirà sa krus kag luwason ang imo kaugalingon!”

³¹ Pareho da ng pag-insulto ng mga pinunò nga parì kag mga manunudlò ng Kasuguan. Naghambay sinda sa isa kag isa, “Hay-y-y-y! Gingluwas niya ang iban, pero indì niya kaya nga luwason ang iya kaugalingon! ³² Siruon ta abi niyan kung makapanaog sa krus ang Kristo nga Harì ng Israel, agud magpati kita sa iya.”

Patì ang mga ginglangsang kaibahan niya hay ginainsulto da siya.

³³ Nang alas 12 na, nagduyom sa bilog nga dutà hasta sa alas tres. ³⁴ Nang alas tres nang hapon, nagsinggit si Hesus ning makusog, “Eloi, Eloi lema sabaktani?” (Ang gusto hambayon ini hay, ‘Dios ko, Dios ko, basì gingpabay-an mo ako?’)

³⁵ Pagkabatì adto, ang iban nga nagatindog didto naghambay, “Pamatì, ginatawag niya si Elias.” ³⁶ Adto nga daan may isa ka tawo nga nagdyagan, nagbuoy ning espongha kag ginglum-oy niya sa sukà. Gingtakod niya ini sa punta ng kuhit kag gingdawat kay Hesus agud supsupon niya. Naghambay siya, “Siruon ta abi kung maabot si Elias para buy-on siya sa krus.”

³⁷ Nagsinggit ning makusog si Hesus kag nabugtò ang iya ginhawa.

³⁸ Adto da nga oras, nagisì ang malapad kag madakmoy nga kurtina sa suyod ng templo halin sa ibabaw paubos. ³⁹ Nang makità ng kapitan ng mga sundalo nga nagatindog sa atubangan ng krus kung pauno nabuy-an ning ginhawa si Hesus, naghambay siya, “Matuod gid nga ini nga tawo hay Ongà ng Dios!”

⁴⁰ Sa malayo-layò may mga babayi da nga nakakità sa nagakatabò: sina Salome, Maria nga taga-Magdala, kag si Maria nga nanay ni Joses kag ni Jacobos nga sultirito. ⁴¹ Ini nga mga babayi hay nagasunod kag nagaserbisyo kay Hesus, tunà nang yadto pa siya sa Galilea. Kag may madamò pa nga mga babayi nga nagtukad da sa Jerusalem nga kaibahan niya.

^42,43 Nang namatay si Hesus hay Adlaw nga Inugpreparar, kay ang pagtunod ng adlaw imaw na ang Adlaw nga Inugpahuway^d. Nganì nagpamuguso si Jose kag nagkadto kay Pilato agud pangayuon ang lawas ni Hesus kay hapon na. Siya hay taga-Arimatea, nga miyembro ng Kurti ng mga Judio, ginarespito kag nagahuyat sa paghaharì ng Dios. ⁴⁴ Pagkabatì ni Pilato nga si Hesus hay patay na, natingaya siya. Nganì gingpatawag niya ang kapitan ng mga sundalo kag gingpangutana kung matuod ba nga patay na siya. ⁴⁵ Nang nabatian ni Pilato ang gingbalità ng kapitan, gingtugutan niya si Jose nga buy-on ang lawas. ⁴⁶ Nganì nagbakay si Jose ning mahay kag maayo nga klasi nga tela. Tapos gingpatunton niya ang lawas ni Hesus sa krus kag gingpasamburan ning tela. Gingpabutang niya ang lawas sa kuyba nga lubungan nga gingbuhuan sa alihid ng bakuyod. Kag gingpapaligid niya ang mabahoy nga bato para masarhan ang puwertahan ng lubungan. ⁴⁷ Nakità nina Maria nga taga-Magdala kag Maria nga nanay ni Joses kung sa diin ginglubong si Hesus.