¹ Nagtudlò si Hesus paagi sa isa ka parabola, “Ako ang matuod nga bayagon nga ubas kag ang akon Amay ang miyugdipara sa ubasan. ² Ang kada sanga nga wayà nagabunga hay iya gina-utod kag ang kada sanga nga nagapamunga hay iya ginalimpyuhan, agud mas magabuyaboy pa gid ang bunga. ³ Kamo hay daw pareho sa mga sanga nga nalimpyuhan na paagi sa akon mga hambay nga gingtudlò sa indo. ⁴ Magpabilin kamo sa akon kag ako da sa indo. Ang mga sanga indì makabunga, puyra lang kung magapabilin sa bayagon. Imaw da kamo, indì kamo makabunga puyra lang kung kamo magpabilin sa akon.

⁵ “Ako ang bayagon nga ubas, kamo ang mga sanga. Ang abir sin-o nga nagapabilin sa akon kag ako da sa iya, imaw ang magapamunga ning buyaboy. Kay kung buyag kamo sa akon, indì kamo makakahuman ning abir ano. ⁶ Pero kung wayà nagapabilin ang tawo sa akon, ipilak siya. Pareho sa sanga nga layà, tipunon kag pagkatapos ipilak ini sa kalayo agud masunog. ⁷ Kung nagapabilin kamo sa akon kag ginapangabuhì nindo ang akon mga ginatudlò, abir ano ang gusto nindo nga pangayuon, itatao ini para sa indo. ⁸ Kung magpamunga kamo ning buyaboy, ang akon Amay hay madayaw ng mga tawo. Paagi diri masasayuran ninda nga kamo hay akon mga disipulo.

⁹ “Kung pauno ang paghigugmà ng akon Amay sa akon, tiyad da inà ang akon paghigugmà sa indo. Magpabilin kamo sa akon agud indo mabatyagan ang akon paghigugmà. ¹⁰ Kung ginatuman nindo ang akon mga sugò, padayon nindo nga mabatyagan ang akon paghigugmà. Pareho ng akon pagtuman sa mga sugò ng akon Amay, padayon ko da nga mabatyagan ang iya paghigugmà. ¹¹ Ginasiling ko ini nga mga bagay sa indo agud mabatyagan da nindo ang akon kalipay kag makumplito ang indo kalipay.

¹² “Imaw ini ang akon sugò sa indo, maghigugmaanan kamo sa isa kag isa pareho ng akon paghigugmà sa indo. ¹³ Wayà na ning paghigugmà nga mas subra pa sa paghigugmà ng isa nga tawo nga nagasakripisyo ng iya kabuhì para sa iya mga amigo. ¹⁴ Kamo ang akon matuod nga mga amigo kung ginatuman nindo ang akon ginasugò sa indo. ¹⁵ Indì ko na kamo pagtawagon nga mga ulipon kay ang ulipon hay wayà makasayod kung ano ang ginahuman ng iya amo. Kundì ginatawag ko kamo nga mga amigo kay ang tanan nga nabatian ko sa akon Amay hay gingpasayod ko sa indo. ¹⁶ Bukon kamo ang nagpilì sa akon kundì ako ang nagpilì sa indo. Gingsugò ko kamo para magpanaw kag magtudlò sa mga tawo, agud makapamunga kamo ning bunga nga nagapadayon. Kung tiyad ini, anuman ang indo pangayuon sa akon Amay sa akon pangayan, itatao gid niya ini sa indo.^{a 17} Ginahambay ko liwat sa indo, imaw ini ang akon sugò: maghigugmaanan kamo sa isa kag isa.”

¹⁸ Naghambay pa gid si Hesus sa iya mga disipulo, “Kung nahahangit sa indo ang mga tawo nga wayà relasyon sa Dios, dapat nindo masayuran nga sa akon anay sinda nahahangit bago sa indo. ¹⁹ Kung pareho kuntà kamo ng mga tawo nga wayà relasyon sa Dios, palanggaon gid ninda kamo. Pero bukon na kamo pareho ninda kay gingpilì ko kamo agud ibuyag sa inda, nganì nahahangit sinda sa indo. ²⁰ Dumduma nindo ang akon ginghambay sa indo, ‘Wayà ning ulipon nga mas mataas sa iya amo.’ Kung gingpasakitan ako ninda, papasakitan da ninda kamo. Kung gingtuman ninda ang akon gingtudlò, tumanon da ninda ang indo itudlò! ²¹ Pero papasakitan ninda kamo kay may relasyon kamo sa akon kag wayà ninda nakikilaya ang nagsugò sa akon. ²² Kung wayà ako nagkari sa inda para ihambay ang mensahe ng akon Amay, wayà kuntà sinda nagkasalà maski indì magtuo sa akon. Pero niyan wayà na sinda ning maibalibad sa inda salà. ²³ Ang abir sin-o nga nahahangit sa akon hay nahahangit da sa akon Amay. ²⁴ Kung wayà ako naghuman sa inda ng makatitingaya nga wayà ning abir sin-o nga nakahuman, wayà kuntà sinda nagkasalà maski wayà gingbaton sa akon. Abir nakità na gid ninda ang akon mga ginghuman, pero nahangit pa gihapon sinda sa akon kag sa akon da Amay. ²⁵ Pero natabò ini agud matuman ang nakasulat sa inda Kasulatan, ‘Nahangit sinda sa akon abir wayà ning kabangdanan.’^b

²⁶ “Pero suguon ko ang akon kabaylo para sa indo halin sa akon Amay agud magbulig^c sa indo. Siya ang Espiritu Santo nga magatudlò ng kamatuuran parti sa Dios. Pag-abot niya, magapamatuod siya parti sa akon. ²⁷ Kag kamo hay magapamatuod da parti sa akon kay kaibahan ko kamo tunà nang nagpanudlò ako sa mga tawo ng mga mensahe parti sa Dios.”