¹ Nagpadayon pa gid si Hesus sa pagsiling, “Ginahambay ko ini tanan sa indo agud indì maduyà ang indo pagtuo sa akon. ² Kay palayason kamo ng indo mga kasimanwa sa mga sinagoga. Maabot ang oras nga madamò sa inda ang magpangpatay sa indo kag magahunahunà nga nagaserbisyo sinda sa Dios. ³ Himuon ninda ini tanan sa indo kay wayà ninda nakikilaya ako o ang akon Amay. ⁴ Ginahambay ko ini agud pag mag-abot ang oras nga humanon ninda ini tanan sa indo, madumduman nindo ang akon gingsiling dati sa indo.

“Wayà ko kamo anay gingbalitai ng ini nga mga bagay kay kaibahan pa nindo ako. ⁵ Pero niyan mabalik na ako sa nagsugò sa akon. Wayà gid ning abir isa sa indo ang nagpangutana kung sa diin ako makadto. ⁶ Niyan tungod sa mga bagay nga akon gingsiling sa indo, napunò gid ning kalisod ang indo tagipusuon. ⁷ Pero ginahambay ko sa indo ning matuod ang akon paghalin hay para sa indo kaayuhan. Kay kung indì ako maghalin, indì mag-abot sa indo ang kabaylo ko para magbulig^a sa indo. Pero kung maghalin ako, suguon ko siya sa indo. ⁸ Kag kung mag-abot siya, pamatuuran niya sa mga tawo nga wayà relasyon sa Dios nga salà ang inda pang-intindi parti sa kasal-anan, sa akon pagiging matarong kag sa paabuton nga paghukom sa mga tawo. ⁹ Parti sa kasal-anan, pamatuuran niya nga makasal-anan sinda kay wayà sinda nagtuo sa akon. ¹⁰ Parti sa akon pagiging matarong, pamatuuran niya nga matarong ako kay makadto na ako sa akon Amay kag indì na ninda ako makità. ¹¹ Kag parti sa paghusga sa mga tawo, pamatuuran niya nga matatabò gid ini kay ginghusgahan na ang Pinunò^b nga nagagahom sa mga tawo nga wayà relasyon sa Dios.

¹² “Madamò pa ang akon ihambay sa indo, ugaling indì pa nindo ini maintindihan niyan. ¹³ Pag mag-abot ang Espiritu Santo, siya ang magatudlò ng kamatuuran parti sa Dios. Kag buligan niya kamo nga maintindihan ang tanan nga kamatuuran. Indì siya maghambay sa iya lang sarili, kundì ang ihahambay niya sa indo hay kung ano lang ang iya mabatian sa akon kag ipasayod da niya kung ano ang matatabò sa paabuton. ¹⁴ Padunggan niya ako kay ipaintindi niya sa indo ang akon mga gingpanudlò kag gingpanghuman. ¹⁵ Kay ang tanan nga bagay sa akon Amay hay sa akon da. Nganì ginghambay ko nga ipasayod ng Espiritu sa indo ang akon mga gingpanudlò.”

¹⁶ Naghambay pa gid si Hesus sa iya mga disipulo, “Matag-od na lang ang oras kag indì na nindo ako makità. Pero pagkatapos ng matag-od nga oras, makikità nindo ako liwat.”

¹⁷ Nganì nagpinangutan-an sa isa kag isa ang iban niya nga mga disipulo, “Ano baya ang gusto niya silingon, ‘Matag-od na lang ang oras kag indì na nindo ako makità. Pero pagkatapos ng matag-od nga oras, makikità nindo ako liwat’ kag ‘kay makadto na ako sa akon Amay’?” ¹⁸ Hambay pa ninda, “Ano baya ang gusto niya nga silingon, ‘Matag-od ang oras’? Indì naton ini maintindihan kung ano ang gusto hambayon!”

¹⁹ Sayod ni Hesus nga gusto kuntà ninda magpangutana, nganì naghambay siya, “Dì ba, ang gusto nindo nga ipangutana hay kung ano ang gusto ko nga hambayon, ‘Matag-od na lang ang oras kag indì na nindo ako makità. Pero pagkatapos ng matag-od nga oras, makikità nindo ako liwat’? ²⁰ Sa matuod lang, mauwang kamo pero magakalipay gid ang mga tawo nga wayà relasyon sa Dios. Magatangis kamo sa kalisod, pero ang indo kalisod hay maduduyà kag mabayluhan ning kalipay. ²¹ Pareho ng babayi nga paungaon, nagaantos ning kasakit siya kay nag-abot na ang iya oras. Pero pagkatapos niya naiongà ang iya lapsag, indì na niya madumduman ang kasakit. Nalilipay siya kay naiongà na ang isa ka lapsag sa kalibutan. ²² Pareho da ini sa indo, nalilisod gid kamo niyan pero mapakigkità ako sa indo liwat kag mapupunò gid ang indo tagipusuon ning kalipay. Kag wayà gid ning bisan sin-o nga makaagaw sa indo ini nga kalipay. ²³ Pag-abot nang adto nga adlaw, indì na kahinangyan nga sa akon kamo magpangayò ning abir ano. Sa matuod lang, anuman ang indo pangayuon sa akon Amay, itatao gid niya ini sa indo kay may relasyon kamo sa akon.^{c 24} Hasta niyan wayà pa kamo ning ginapangayò sa Dios nga Amay paagi sa akon pangayan. Pangayò kamo sa iya agud makabaton kamo kag para makumplito ang indo kalipay.

²⁵ “Ginghambay ko ini sa indo paagi sa mga parabola. Pero maabot ang oras nga indì na ako maghambay ning parabola kundì ipasayod ko na sa indo ning klaro ang parti sa akon Amay. ²⁶ Nang adto nga adlaw, kamo na mismo ang mangayo sa iya paagi sa akon pangayan. Indì na kahinangyan nga ako pa ang magpangayò sa akon Amay para sa indo. ²⁷ Ang akon Amay mismo ang nagahigugmà sa indo kay naghigugmà kamo sa akon kag nagpati nga ako hay naghalin sa Dios. ²⁸ Naghalin ako sa akon Amay kag nagkari ako diri sa kalibutan. Niyan mahalin na ako diri sa kalibutan kag mabalik na ako sa akon Amay.”

²⁹ Nagsiling ang iya mga disipulo, “Niyan klaro na gid ang imo mga ginahambay sa amon kag bukon na paagi sa mga parabola! ³⁰ Niyan sayod namon nga nasasayuran mo gid ang tanan nga bagay kag abir nganì wayà kami nagapangutana, sayod mo ang amon ginahunahunà. Paagi diri nagapati kami nga ikaw hay halin sa Dios.”

³¹ Nagsiling si Hesus, “Nagatuo na ba kamo niyan? ³² Madalì na lang nga oras kag imaw na gid ini, nga kamo hay magakabuyag-buyag kag magbalik ang kada isa sa indo lugar. Bayaan nindo ako nga mag-isa, pero bukon ako mag-isa kay kaibahan ko ang akon Amay.

³³ “Ginahambay ko ini sa indo agud magkaigwa kamo ning katawhayan sa pakig-isa sa akon. Makakaagi kamo ning mga kahugaan sa kalibutan, pero tibayi ang indo kaugalingon! Naperdi ko na ang mga paagi ng kalibutan nga kuntra sa kagustuhan ng Dios.”