Ini nga sulat hay gingsulat ni Pablo para sa mga nagatuo sa Roma. Ang iban nagahambay nga gingsulat niya ini sa suyod ng tuyo ka bulan nang yadto siya sa probinsya ng Acaya (Ginghuman 20:2-3).

Isa sa rason kung basì gingsulat niya ini hay para ipasayod sa mga nagatuo sa Roma ang iya plano nga pagbisita sa inda (1:8-15;15:22-33). Ging-isplikar da niya sa inda ang Maayo nga Balità parti sa plano ng Dios nga kaluwasan para sa mga tawo paagi sa pagtuo kay Hesu-Kristo. Ang kabilugan ng ini nga plano hay sa 1:17a, ‘Kay ginapasayod ng Maayo nga Balità nga ibilang nga matarong ng Dios ang mga tawo paagi lang gid sa pagtuo.’

Magtunà sa ini nga bersikulo, si Pablo hay nagtunà sa pag-isplikar parti sa kung pauno ibilang nga matarong ng Dios ang tawo. Una, gingpasayod niya nga ang tanan nga tawo hay makasal-anan, maging Judio o bukon, nganì sigurado gid nga ang tanan hay nabuyag sa Dios para parusahan kung indì sinda maging matarong sa iya panirò. Gingklaro pa gid niya nga wayà ning tawo nga matarong paagi sa pagsunod sa Kasuguan ng Dios, kay wayà gid ning abir isa nga makasunod diri. Ginabilang ng Dios ang tawo nga matarong paagi sa iya pagtuo kay Hesu-Kristo kag wayà na ning iba (3:20-22).

Sa kapitulo 5 hasta 8, ginatudlò ni Pablo ang bag-o nga kabuhì nga matatabò sa abir sin-o nga nagatuo paagi sa iya pagpakig-isa kay Hesu-Kristo. Ang nagatuo hay may maayo nga relasyon sa Dios, kag gingtao sa iya ang Espiritu Santo nga naghilway sa iya sa gahom ng salà.

Sa kapitulo 9 hasta 11, ging-isplikar ni Pablo ang plano ng Dios sa mga Judio kag mga bukon Judio. Ginahambay niya nga ang kadamuan nga mga Judio nga wayà nagbaton kay Kristo hay kabubut-on ng Dios para makabaton da ang mga bukon Judio ning kaluoy kag kaluwasan paagi sa ginghuman ni Kristo. Pero sa ulihi, magabaton kag magatuo da ang mga Judio kay Kristo bilang inda Ginoo kag Manluluwas.

Sa mga ulihi nga kapitulo, igwa ning mga sugò kag bilin si Pablo sa mga nagatuo parti sa inda pagkabuhì, labi na ang inda paghinigugmaanan kag pagbaton sa isa kag isa, kag ang parti sa inda responsibilidad sa mga pinunò ng gobyerno, kag ang pagpangamusta niya sa mga kauturan kay Kristo.