¹ Pagkatapos adto, nagpakità liwat si Hesus sa mga disipulo didto sa alihid ng Dagat ng Tiberias^a. Tyad ini ang natabò: ² Magkaibahan sina Simon Pedro,^b si Tomas nga ang hayò hay ‘Kapid’, si Natanyel nga taga-Kana nga sakop sa probinsya ng Galilea, ang mga ongà ni Zebedeo kag duha pa nga disipulo. ³ Nagsiling si Simon Pedro sa inda, “Mapalawod ako.”

Nagsabat sinda, “Manunot kami.” Nganì nagsakay sinda sa baruto kag nagpalawod. Pero wayà gid sinda ning may nabuoy sa bilog nga gab-i.

⁴ Nang pasubaton na ang adlaw, nagatindog si Hesus sa baybay pero wayà siya makilaya ng mga disipulo. ⁵ Nganì hambay ni Hesus sa inda, “Mga amigo, igwa ba kamo ning buoy?”

Nagsabat sinda, “Wayà gid!”

⁶ Siling niya, “Taktakan nindo ang pukot hampig sa tuo ng baruto kag makakabuoy kamo.” Nganì gingtaktak ninda ang pukot kag sa kadamò ng tuyoy, hayos indì na ninda ini kaya batakon.

⁷ Nganì hambay ng disipulo nga pinalanggà ni Hesus kay Pedro, “Ang Ginoo adto!” Pagkabatì adto ni Simon Pedro, gingsuksok niya ang iya barò kay nakauba siya mintras nagatrabaho kag lumumpat sa tubì kag lumangoy pakadto sa takas. ⁸ Ang iban nga disipulo nga yadto sa baruto hay nagbugsay papiliw kag ginaguyod ang pukot nga kadamò ning tuyoy kay bukon sinda malayo sa baybay, mga 60 lang ka dupa ang kalayò.

⁹ Pagkaabot ninda sa takas, nakità ninda nga igwa ning baga nga may isdà nga ginaihaw kag igwa da ning tinapay.

¹⁰ Siling ni Hesus sa inda, “Magdaya kamo diri ning pila ka bilog nga isdà nga indo nabuoy.” ¹¹ Nganì nagbalik si Simon Pedro sa baruto kag nagbulig sa pagbira ng pukot pabaybay. Puno gid ang pukot ning kadagkò nga tuyoy, ini hay 153 tanan. Abir tiyad adto kadamò ang isdà, wayà gid nagisì ang pukot.

¹² Hambay sa inda ni Hesus, “Karna kamo mamahaw kita.” Wayà gid may nagpangahas abir isa sa mga disipulo nga magpangutana kung sin-o siya. Kay kilaya ninda nga siya ang Ginoo. ¹³ Nagpalapit si Hesus, gingbuoy niya ang tinapay kag gingtao sa inda, imaw da ang inihaw nga isdà. ¹⁴ Imaw ini ang pangtuyo ka beses nga nagpakità si Hesus sa mga disipulo pagkatapos nga nabuhì siya liwat.

¹⁵ Mintras nagapamahaw sinda, gingpangutana ni Hesus si Simon Pedro, “Simon, ongà ni Juan, ginahigugmà mo ba ako labaw pa sa paghigugmà ng imo mga kaibahan sa akon?”

Nagsabat siya, “Huo, Ginoo, sayod mo nga ginahigugmà ko gid ikaw.”

Hambay ni Hesus, “Pakauna ning maayo ang akon mga karnero.”^c

¹⁶ Sa pangaduha ka beses nagpangutana liwat si Hesus, “Simon, ongà ni Juan, ginahigugmà mo ba ako?”

Nagsabat siya, “Huo, Ginoo, sayod mo nga ginahigugmà ko gid ikaw.”

Hambay ni Hesus, “Diparaha ning maayo ang ako mga karnero.”

¹⁷ Pangtuyo ka beses nagpangutana si Hesus, “Simon, ongà ni Juan, ginahigugmà mo ba ako?”

Nalisod si Pedro kay tuyo na gid ka beses siya gingpangutana ni Hesus, ‘Ginahigugmà mo ba ako?’ Nganì nagsabat siya kay Hesus, “Ginoo, sayod mo ang tanan nga bagay. Sayod mo nga ginahigugmà ko gid ikaw.”

Hambay ni Hesus, “Pakauna ning maayo ang akon mga karnero. ¹⁸ Sa matuod lang, nang batà ka pa, ikaw ang nagahugot ng imo sarili nga sinturon^d kag nagapanaw ka kung diin mo gusto. Pero pag guyang mo, pagaunaton mo ang imo mga butkon. Tapos iban ang magapos sa imo kag day-on ka sa lugar nga indì mo gusto kadtuan.” ¹⁹ (Ginghambay ini ni Hesus agud ipasayod kay Pedro kung pauno siya mamatay kag kung pauno niya mapadunggan ang Dios paagi sa iya kamatayon.)

Pagkatapos adto, hambay ni Hesus sa iya, “Magsunod ka sa akon.”^e

²⁰ Naglingig si Pedro kag nakità niya nga nagasunod sa inda ang disipulo nga pinalanggà ni Hesus. Siya adtong nagapungkò hampig sa alihid ni Hesus nang nagaihapon sinda kag nag-islog pa gid siya kay Hesus, naghilig sa iya dughan kag nagpangutana, ‘Ginoo, sin-o adto ang magatraidor sa imo?’ ²¹ Niyan, pagkakità ni Pedro sa iya, nagpangutana siya kay Hesus, “Ginoo, pauno ini nga tawo, ano ang matatabò sa iya?”

²² Nagsabat si Hesus, “Kung gusto ko nga mabuhì siya hasta nga magbalik ako diri sa kalibutan, wayà ka na ning labot. Basta ikaw, magsunod sa akon!” ²³ Nganì nabantog ang balità sa mga kauturan nga ini nga disipulo hay indì mamatay. Pero bukon tiyad adto ang ginghambay ni Hesus parti sa iya, kundì, ‘Kung gusto ko nga mabuhì siya hasta nga magbalik ako, wayà ka na ning labot.’

²⁴ Ako ining disipulo nga nagapamatuod kag nagsulat ng ini nga mga bagay. Sayod namon nga matuod ang akon ginabalità.

²⁵ Kadamò pa gid ang mga gingpanghuman ni Hesus. Kung isulat ini tanan, para sa akon, indì mag-igò ang mga libro nga masusulat abir pa sa bilog nga kalibutan.