¹ Niyan, ano ang aton mahahambay? Magpadayon pa ba kita sa pagpakasalà agud magdugang pa gid ang pagpakamaayo ng Dios sa aton? ² Indì na gid! Indì puydi nga magpadayon kita sa pagpakasalà kay ginabilang kita nga patay na parti sa salà. ³ Sayod gid nindo nga nang pagbawtismo sa aton sa pagpakig-isa kay Kristo Hesus, ang gusto ini hambayon nga kaibahan da kita sa iya kamatayon. ⁴ Nganì namatay kag ginglubong na ang aton malain nga kinaugalì kaibahan sa iya, nang pagbawtismo sa iya kamatayon, agud magakabuhì kita sa bag-o nga kabuhì nga kapareho sa pagkabanhaw kay Kristo paagi sa makatitingaya nga gahom ng Dios nga Amay.

⁵ Kag kung kaisa kita kay Kristo sa iya kamatayon, sigurado gid nga magkaigwa kita ning bag-o nga kabuhì pareho ng natabò sa iya nang gingbanhaw siya. ⁶ Sayod naton nga ang aton dati nga makasasalà nga kinaugalì hay ginglangsang na sa krus kaibahan ni Kristo, agud indì na maggahom ang aton makasasalà nga kinaugalì sa aton. Imaw inà nga indì kita dapat maulipon ng salà. ⁷ Kay kung patay na ang tawo, hilway na siya sa gahom ng salà. ⁸ Kag kung namatay kita kaibahan ni Kristo, nagatuo kita nga mabuhì da kita kaibahan niya. ⁹ Kay sayod naton nga tungod si Kristo hay nabanhaw, indì na puydi nga mamatay siya liwat. Wayà na ning gahom ang kamatayon sa iya. ¹⁰ Namatay siya ning makaisa lang gid para sa mga salà ng mga tawo, kag indì na gid ini maliwat. Buhì siya niyan kag ang iya kabuhì para sa Dios. ¹¹ Nganì, tungod sa indo pagpakig-isa kay Kristo Hesus, kabiga nindo nga ang indo kaugalingon patay na sa salà, kag niyan nagakabuhì kamo para sa Dios.

¹² Nganì, indì na nindo pagtuguti nga maggahom ang salà sa indo lawas agud indì na kamo magtuman ng iya kinaugalì nga handom. ¹³ Ayaw nindo paggamita ang abir ano nga parte ng indo lawas para maghuman ning malain, kundì ipasakop nindo ang indo lawas sa Dios, agud gamiton niya ang indo lawas para maghuman ning matarong. Himua nindo ini bilang mga tawo nga gingbuhì liwat halin sa kamatayon kag gingtaw-an ning bag-o nga kabuhì. ¹⁴ Ang salà hay indì dapat maggahom sa indo, kay wayà na kamo sa idayom ng Kasuguan, kundì yarà na sa idayom ng pagpakamaayo ng Dios.

¹⁵ Niyan, tungod kita wayà na sa idayom ng Kasuguan kundì sa idayom na ng pagpakamaayo ng Dios, magpakasalà pa ba kita? Indì na gid! ¹⁶ Dapat nindo masayuran nga kung maulipon kita ng tawo, nagatuman gid kita sa iya. Mga ulipon kita ng abir ano nga aton ginatuman. Nganì kung nagahuman kita ning salà, mga ulipon kita ng salà kag ang resulta ini hay kamatayon. Pero kung nagatuman kita sa Dios, mga ulipon kita ng Dios kag ang resulta ini hay maging matarong kita. ¹⁷ Nang una, mga ulipon kamo ng salà. Pero salamat sa Dios kay niyan halin na gid sa tagipusuon ang indo pagtuman sa mga kamatuuran nga gingtudlò sa indo. ¹⁸ Ginghilway na kamo ng Dios sa gahom ng salà, kag niyan naging ulipon kamo ng matarong nga pagkabuhì. ¹⁹ Ginagamit ko bilang halimbawà ang parti sa pagkaulipon kay maluya ang indo pang-intindi. Nang una gingpagamit nindo ang tanan nga parte ng indo lawas bilang mga ulipon ng salà paagi sa paghuman ng malaw-ay nga mga butang kag kalainan. Kag ang resulta mas labi pa gid kamo nga naging malain. Pero niyan, itugyan nindo ang indo bilog nga lawas bilang mga ulipon ng matarong nga pagkabuhì. Kag ang resulta naging diosnanon kamo. ²⁰ Nang mga ulipon pa kamo ng salà, ang matarong nga pagkabuhì wayà sa indo. ²¹ May kaayuhan ba kamo nga nabuoy sa indo pagkabuhì nang una nga niyan ginakahuyà na nindo? Ang resulta adto hay imaw ang kamatayon. ²² Pero niyan ginghilway na kamo sa salà kag mga ulipon na kamo ng Dios. Kag ang indo nabuoy hay imaw ang diosnanon nga pagkabuhì. Ang resulta ini hay ang kabuhì nga wayà katapusan. ²³ Kay ang bayad sa salà hay ang kamatayon, pero ang regalo ng Dios hay kabuhì nga wayà katapusan tungod sa aton pagpakig-isa kay Kristo Hesus nga aton Ginoo.