¹ Niyan, kay gingbilang na kita nga matarong paagi sa aton pagtuo, may maayo na kita nga relasyon sa Dios. Ini hay natabò tungod sa ginghuman ng aton Ginoo nga Hesu-Kristo. ² Paagi da sa iya, nakakapalapit kita sa Dios; kag paagi sa pagtuo, naagihan naton ini nga pagpakamaayo ng Dios kag nagakalipay kita sa paglaom nga makaibahan kita sa iya himayà. ³ Kag bukon lang inà, kundì nagakalipay da kita sa aton mga pag-antos, kay sayod naton nga paagi sa pag-antos maging matiniison kita. ⁴ Kag kung maging matiniison kita, nalilipay ang Dios sa aton. Kag kung ang Dios nalilipay sa aton, may paglaom kita nga maayo ang aton paabuton. ⁵ Kag indì puydi nga indì ta mabaton ang aton ginalauman kay gingpabatyag ng Dios ang iya subra nga paghigugmà sa aton tagipusuon, paagi sa Espiritu Santo nga gingtao sa aton.

⁶ Nang wayà kita ning kusog para makalikaw sa parusa, sa tamà nga oras namatay si Kristo para sa aton nga mga makasal-anan. ⁷ Bihirà sa isa ka tawo nga gusto mamatay para sa matarong nga tawo. Siguro igwa gida ning gusto nga mamatay para sa maayo nga tawo. ⁸ Pero gingpakità ng Dios ang iya paghigugmà sa aton nang namatay si Kristo para sa aton abir kita hay makasasalà pa. ⁹ Kag tungod gingbilang na kita niyan nga matarong ng Dios paagi sa dugò^a ni Kristo, igwa gid kita ning kasiguruhan paagi kay Kristo nga makaluwas kita sa parusa ng Dios. ¹⁰ Nang una, mga kaaway kita ng Dios, pero paagi sa pagkamatay ng iya Ongà, naibalik na ang aton relasyon sa iya. Kag niyan nga may maayo na kita nga relasyon sa Dios, sigurado nga luwason niya kita sa paabuton nga parusa paagi sa kabuhì ni Kristo. ¹¹ Kag bukon lang inà, kundì nagakalipay kita niyan tungod sa Dios paagi sa aton Ginoong Hesu-Kristo. Paagi sa iya, nabalik na ang aton maayo nga relasyon sa Dios.

¹² Ang salà nag-abot sa kalibutan kay gingsuway ni Adan ang sugò ng Dios, kag ang iya salà hay nagresulta ng kamatayon. Nganì nag-abot ang kamatayon sa tanan nga tawo, kay ang tanan hay nakasalà. ¹³ Kay bago gingtao ng Dios ang Kasuguan, yari na sa kalibutan ang salà. Pero wayà ning panabton ang tawo sa salà kung wayà ang Kasuguan. ¹⁴ Pero magtunà kay Adan hasta kay Moises, naggahom na ang kamatayon sa mga tawo abir pa sa mga wayà nakasalà pareho ng pagsuway ni Adan sa sugò ng Dios.

Si Adan hay kapareho ni Kristo^b nga magaabot. ¹⁵ Pero ining duha hay bukon pareho, kay ang regalo ng Dios hay bukon kapareho sa resulta ng salà. Matuod gid nga ang salà ng isa ka tawo hay nagdaya ning kamatayon sa madamò nga tawo, pero subra pa gid diri ang pagpakamaayo ng Dios nga imaw ang regalo nga nag-abot sa madamò nga tawo paagi sa isa ka tawo nga si Hesu-Kristo. ¹⁶ Ang regalo ng Dios hay bukon kapareho sa resulta ng salà ni Adan. Ang salà ni Adan hay nagresulta ning parusa, pero tungod sa regalo ng Dios, abir madamò ang aton ginghuman nga salà, gingbilang kita nga matarong ng Dios. ¹⁷ Kung tungod sa salà ng isa ka tawo, naggahom na ang kamatayon sa tanan, daw ano pa gid kadakò ang maging resulta ng ginghuman ng isa ka tawo nga si Hesu-Kristo! Kay ang mga tawo nga nagabaton ng dakò nga pagpakamaayo kag regalo ng Dios nga ibilang sinda nga matarong, hay magakaigwa ning kabuhì kag magaharì kaibahan ni Kristo sa iya gingharian.

¹⁸ Nganì tungod sa isa ka salà nga ginghuman, ang tanan nga tawo hay ginghusgahan nga parusahan. Imaw da, tungod sa isa ka matarong nga ginghuman, gingbilang nga matarong ng Dios ang tanan nga tawo,^c kag taw-an sinda ning kabuhì. ¹⁹ Tungod sa isa ka tawo nga wayà nagtuman sa Dios, madamò ang naging makasasalà. Imaw da, paagi sa pagtuman ng isa ka tawo, madamò ang ibilang nga matarong ng Dios. ²⁰ Gingtao ng Dios ang Kasuguan agud makità ng mga tawo nga nagapakadamò ang inda pagsuway. Pero abir nagdugang ang salà, nagdugang pa gid ang pagpakamaayo ng Dios. ²¹ Nganì matuod nga naggahom ang salà sa tanan nga tawo kag nagresulta ning kamatayon sa tanan. Pero niyan nagagahom ang pagpakamaayo ng Dios, gingbilang na niya kita nga matarong kag nagaresulta ini ning kabuhì nga wayà katapusan. Tanan ini hay tungod sa ginghuman ni Hesu-Kristo nga aton Ginoo.