¹ Imaw nganì inà, indì na parusahan ng Dios ang mga nagpakig-isa kay Kristo Hesus. ² Kay pagkatapos nga kita nagpakig-isa na kay Kristo Hesus, nagagahom na sa aton ang Espiritu Santo nga nagatao ning kabuhì. Nganì hilway na kita sa salà kag kamatayon nga naggahom sa aton. ³ Ang Kasuguan indì makabuoy ning gahom ng salà sa aton kabuhì, kay maluya ang aton lawasnon nga kinaugalì, nganì indì kita makasunod sa Kasuguan. Gingsugò ng Dios ang iya Ongà nga maging tawo pareho sa aton, agud maging halad para sa aton salà. Kag sa iya pagkamatay, gingsirà ng Dios ang gahom ng salà. ⁴ Ginghuman niya ini agud matabò ang matarong nga ginapangayò ng Kasuguan sa aton nga wayà na nagakabuhì sunò sa gusto ng aton lawasnon nga kinaugalì, kundì sunò sa gusto ng Espiritu Santo. ⁵ Kay ang abir sin-o nga nagakabuhì sunò sa lawasnon nga kinaugalì hay wayà ning iban nga ginahunahunà, kundì kung ano ang nagustuhan nga mga butang ng iya lawasnon nga kinaugalì. Pero ang abir sin-o nga nagakabuhì sunò sa pagtuytoy ng Espiritu Santo, ginahunahunà lang ang nagustuhan nga mga butang ng Espiritu Santo. ⁶ Kung ang hunahunà ng tawo hay permi lang ang lawasnon nga kinaugalì, ang resulta imaw ang kamatayon nga wayà katapusan. Pero kung ang mga butang nga gusto ng Espiritu Santo imaw lang ang iya ginahunahunà, makakabaton siya ning kabuhì kag katawhayan. ⁷ Kay ang tawo nga ang ginahunahunà lang hay ang lawasnon nga kinaugalì ginabilang nga kaaway ng Dios. Wayà siya nagasunod sa Kasuguan ng Dios, kag ang matuod, indì siya makasunod diri. ⁸ Ang mga tawo nga nagasunod ng inda lawasnon nga kinaugalì indì gid makapalipay sa Dios. ⁹ Pero kamo wayà na sa paggahom ng indo lawasnon nga kinaugalì, kundì nagagahom na ang Espiritu sa indo kay nagaistar ang Espiritu ng Dios sa indo. Ang tawo nga wayà sa iya ang Espiritu ni Kristo, wayà siya ning relasyon kay Kristo. ¹⁰ Pero tungod si Kristo hay yarà sa indo, abir mamatay ang indo lawas tungod sa salà, mabuhì gihapon ang indo espiritu kay gingbilang nga matarong kamo ng Dios. ¹¹ Niyan, tungod ang Espiritu ng Dios nga nagbanhaw kay Hesus nagaistar sa indo, ang Dios nga nagbanhaw kay Kristo imaw da ang magatao ning kabuhì sa indo mga lawas nga may kamatayon. Kag humanon niya ini paagi sa iya Espiritu nga nagaistar sa indo.

¹² Nganì mga kauturan, kahinangyan sundon naton ang Dios, kag dapat isikway ta ang aton pagkabuhì sa lawasnon nga kinaugalì. ¹³ Kay kung magkabuhì kamo sunò sa indo lawasnon nga kinaugalì, mamamatay kamo hasta sa wayà katapusan. Pero kung paagi sa Espiritu Santo hay isikway nindo ang malain nga mga himò ng indo lawas, mabubuhì kamo hasta sa wayà katapusan.

¹⁴ Ang mga ginatuytuyan ng Espiritu ng Dios imaw ang matuod nga mga ongà ng Dios. ¹⁵ Kay ang Espiritu nga indo nabaton hay bukon para maging ulipon kamo nga nagakahadlok pareho ng indo nabatyagan nang una, kundì nakabaton kamo ng Espiritu nga naging mga ongà kamo ng Dios. Niyan, makakatawag na kita sa Dios, “Amay.”^{a 16} Ang Espiritu Santo kaibahan ng aton espiritu ang nagapamatuod nga kita hay mga ongà ng Dios. ¹⁷ Kag tungod kita hay mga ongà na ng Dios, mga manunublì kita ng mga pagpakamaayo nga itatao ng Dios para sa iya mga ongà. Mga manunublì da kita kaibahan ni Kristo. Kay kung nagaantos kita niyan pareho kay Kristo nang una, magaabot ang adlaw nga padunggan da kita kaibahan niya.

¹⁸ Kung sa akon lang, ang mga pag-antos arinyan hay indì gid maikompara sa mataas nga padungog nga itatao sa aton sa langit. ¹⁹ Kay nagahuyat gid nga may madakò nga handom ang tanan nga ginghuman ng Dios sa paabuton nga tiyempo pag ipakilaya ng Dios kung sin-o ang iya mga ongà. ²⁰ Kay wayà makaabot sa tanan nga ginghuman ng Dios sa iya plano nga para sa inda. Natabò ini bukon sunò sa inda gusto kundì tungod nga imaw ini ang kabubut-on ng Dios. Pero may paglaom pa, ²¹ kay magaabot ang adlaw nga ang mga ginghuman ng Dios hay indì na malunot, kundì maging kaibahan ang mga ongà ng Dios nga mahilway nga mabutang sa mataas nga padungog nga itatao sa aton. ²² Sayod naton nga hasta niyan ang tanan nga ginghuman ng Dios hay nagaugayong sa kasakit pareho ng nababatyagan nga kasakit ng nagaongà. ²³ Pero bukon lang sinda, kundì kita da nga nakabaton ng Espiritu Santo nga imaw ang una nga regalo ng Dios, hay nagaugayong da sa aton kabubut-on mintras nagapaabot gid kita sa adlaw nga bag-uhon ng Dios ang aton mga lawas kag ampunon niya kita nga iya mga ongà. ²⁴ Naluwas na kita kag nagalaom na nga makumpleto ini nga kaluwasan. Ang paglaom hay indì matawag nga paglaom kung yarà na ang ginalauman. Kay sin-o ba ang magalaom kung yarà na? ²⁵ Pero kung nagalaom kita sa butang nga wayà pa sa aton, nagahuyat kita nga may pagtiis.

²⁶ Bukon lang ang paglaom ang nagabulig sa aton, kay ang Espiritu Santo da hay nagabulig sa aton mga kaluyahon. Kay wayà kita makasayod kung ano gid ang aton dapat ipangamuyò, nganì ang Espiritu Santo imaw ang nagapangabay sa Dios para sa aton paagi sa mga pag-agunta nga indì mamitlang. ²⁷ Kag siya nga nakakasayod ng suyod ng tagipusuon ng tawo, imaw da ang nakakasayod ng hunahunà ng Espiritu Santo. Kay nagapangabay ang Espiritu Santo sa Dios para sa iya mga tawo, kag ini hay sunò sa kabubut-on ng Dios.

²⁸ Sayod naton nga nagahuman ang Dios sa tanan nga nagakatabò para sa kaayuhan ng mga nagahigugmà sa iya, nga imaw ang iya mga gingtawag sunò sa iya plano. ²⁹ Kay tunà pa nang una, sayod na ng Dios kung sin-o ang iya maging mga ongà. Kag gingplano na niya nga daan para maging kapareho sinda sa iya Ongà nga si Hesus, agud siya ang maging panganay sa madamò nga mga kauturan. ³⁰ Kag sayod na ng Dios kung sin-o ang iya maging mga ongà, nganì gingtawag niya sinda; kag sinda nga iya gingtawag, iya da gingbilang nga matarong; kag ang iya gingbilang nga matarong, hay iya da gingpadunggan.

³¹ Niyan, kung hunahunaon ta ini nga mga butang, makahambay kita nga ang Dios hay nagaapin gid sa aton, kag wayà ning may makaperdi sa aton. ³² Wayà niya ging-awaan ang iya Ongà, kundì ginghalad niya para sa aton tanan. Kung gingtao niya ang iya Ongà, sigurdo gid nga itatao da niya sa aton ang tanan nga butang, kaibahan ang iya Ongà. ³³ Wayà ning may makaakusar sa aton nga mga gingpilì ng Dios, nga kita hay mga makasasalà gihapon, kay ang Dios mismo ang nagahambay nga kita hay gingbilang na nga matarong. ³⁴ Wayà na ning may makahambay nga dapat kita parusahan, kay si Kristo Hesus mismo ang gingparusahan kag namatay para sa aton. Kag bukon lang inà, gingbanhaw siya kag niyan yadto siya sa tuo ng Dios nga nagapangabay sa iya para sa aton. ³⁵ Wayà ning may makabuyag sa aton sa paghigugmà ni Kristo. Abir mag-agi kita sa mga kahugaan tungod sa mga problema, o kalisod, o kung ginapasakitan kita tungod sa aton pagtuo, o kung wayà kita ning may makaon, o kung wayà kita ning may maibarò, o kung yarà kita sa peligro, o kung abir patyon pa kita; nasisiguro ta gid nga ginahigugmà pa gihapon kita ni Kristo. ³⁶ Sayod naton ini tanan kay ini ang nakasulat sa Kasulatan,