16
Mga Pagpangamusta ni Pablo
1 Niyan gusto ko nga ipakilaya sa indo ang aton utod nga si Febe. Miyugserbisyo siya nga nagabulig sa mga nagatuo sa Cencrea. 2 Batuna nindo siya bilang indo utod sa Ginoo kag imaw gid ini ang dapat nindo humanon bilang mga tawo ng Dios. Buligan nindo siya sa iya mga kahinangyan, kay madamò ang iya nabuligan. Ako nganì hay nabuligan da niya.
3 Ikamusta nindo ako sa mag-asawa nga sina Priscila kag Aquilo. Ini sinda hay kaibahan ko da nga nagaserbisyo kay Kristo Hesus. 4 Namiligro na ang inda kabuhì para lang sa akon; kag bukon lang ako ang nagapasalamat sa inda, kundì ang tanan da nga nagatuo nga bukon Judio. 5 Kamusta da sa mga nagatuo nga nagatipona didto sa inda bayay para magsamba sa Dios.
Nagapangamusta da ako sa akon palanggà nga amigo nga si Epeneto. Siya ang nauna nga nagtuo kay Kristo sa probinsya ng Asya. 6 Kamusta da kay Maria. Nagpangabudlay siya ning tudo-tudo para sa indo. 7 Kamusta da sa akon mga kapareho nga Judio nga sina Andronico kag Junio. Ini sinda hay kaibahan ko nga napriso. Kilaya gid sinda ng mga apostol, kag una pa sinda sa akon nga naging Kristyano.
8 Nagapangamusta da ako sa akon palanggà nga amigo sa Ginoong Ampliato. 9 Kamusta da kay Urbano nga kaibahan namon nga nagaserbisyo kay Kristo, kag sa akon palanggà nga amigo nga si Estaquis. 10 Kamusta da kay Apeles. Abir madamò ang iya naagihan nga mga pagtilaw, wayà gid siya nagtalikod kay Kristo. Kamusta da sa panimayay ni Aristobulo, 11 kay Herodion nga akon kapareho nga Judio, kag sa mga nagatuo sa Ginoo sa panimayay ni Narciso.
12 Nagapangamusta da ako kana Trifena kag Trifosa. Ini sinda hay mahugod nga nagaserbisyo sa Ginoo. Kamusta da sa aton palanggà nga amiga nga si Persida, siya hay nagserbisyo gid ning tudo para sa Ginoo.
13 Nagapangamusta da ako kay Rufo. Ini siya hay bantog nga nagaserbisyo sa Ginoo.b Kamusta da sa iya nanay, nga ang pagkabig niya sa akon hay pareho gid sa iya ongà. 14 Kamusta da kana Asincrito, Flegonte, Hermes, Patrobas, Hermas, kag sa tanan nga mga kauturan kay Kristo nga kaibahan ninda. 15 Kamusta kana Filologo, Julia, Nereo, kag sa iya manghod nga babayi, kay Olimpas, kag sa tanan ga mga tawo ng Dios nga kaibahan ninda.
16 Magkinamustahan kamo bilang mag-utod kay Kristo.c Ang tanan nga iglesya nga kay Kristo nagapangamusta dirà sa indo.
Katapusan nga mga Laygay
17 Mga kauturan kay Kristo, mag-andam kamo sa mga tawo nga ginahalinan ng pagkawatak-watak kag ginakuntra ang mga pagpanudlò nga gingtudlò sa indo. Likawi nindo sinda. 18 Ang mga tawo nga nagahuman inà hay wayà nagaserbisyo kay Kristo nga aton Ginoo, kundì ang inda lang gustod ang inda ginasunod. Paagi sa inda maayo nga mga paghambay kag mga pagpadayaw-dayaw, ginapatayang ninda ang mga tawo nga madalì magpati. 19 Bantog gid ang indo pagtuman kay Kristo, nganì nalilipay gid ako. Gusto ko nga maging mayad kamo kung parti sa paghuman ning maayo, pero ignorante kung parti sa paghuman ning malain. 20 Ang gahom ni Satanas hay madalì na lang nga siraon ng Dios nga nagatao sa aton ning katawhayan. Ipaperdi niya si Satanas sa indo!
Kabay pa nga pakamaayuhon kamo ng aton Ginoong Hesus.
21 Ang akon kaibahan nga nagaserbisyo nga si Timoteo hay nagapangamusta da sa indo, patì si Lucio, si Jason, kag si Sosipatro nga akon kapareho nga mga Judio.
22 (Ako si Tercio, ang nagsulat ng ining sulat ni Pablo, hay nagapangamusta da sa indo, bilang isa sa mga tagasunod ng Ginoo.)
23 Ginakamusta da kamo ni Gayo nga ginadayunan ko kag didto da nagatipon ang mga nagatuo sa iya bayay para magsamba sa Dios. Si Erasto nga tresurero ng siyudad kag ang aton utod nga si Cuarto hay nagapangamusta da sa indo.
24 [Kabay pa nga pakamaayuhon gid kamo tanan ng aton Ginoong Hesu-Kristo. Kabay pa.]e
Pagdayaw sa Dios
25 Dayawon ta ang Dios nga makapalig-on sa indo pagtuo sunò sa Maayo nga Balità nga akon ginapasayod sa indo. Ining Maayo nga Balità nga parti kay Hesu-Kristo hay madugay na nga wayà gingpasayura, 26 pero gingpasayod na ini niyan paagi sa mga gingpasulat sa mga propeta.f Ini hay sunò sa sugò ng wayà ning kamatayon nga Dios, agud ang tanan nga mga bukon Judio hay magtuo kag magtuman sa iya.
27 Paagi kay Hesu-Kristo, dayawon ta hasta sa wayà katapusan ang Dios nga imaw lang ang nakakasayod ng tanan! Kabay pa.