¹ Kita nga malig-on na sa pagtuo, dapat magpasensya kag magbulig sa mga kaibahan ta nga maluya pa. Bukon lang ang magpalipay sa aton sarili ang aton isipon, ² kundì ang kada isa sa aton hay magpalipay sa iban nga mga nagatuo, para sa inda kaayuhan kag sa ikalig-on ng inda pagtuo. ³ Abir nganì si Kristo hay wayà nagkabuhì para lang mapalipay ang iya sarili. Kundì sunò sa nakasulat sa Kasulatan, “Ang mga pag-insulto ng mga tawo sa imo hay nabatyagan ko.”^{a 4} Ang tanan nga gingpasulat sa Kasulatan nang una hay gingsulat para magtudlò sa aton. Kay paagi sa Kasulatan, kita hay nakakatiis sa mga kahugaan, kag nagatibay ang aton paglaom sa paabuton.

⁵ Kabay pa nga ang Dios nga nagatao sa aton ning pagtiis sa mga kahugaan kag nagapakusog sa aton, imaw ang magabulig sa indo nga magkaisa kamo bilang mga tagasunod ni Kristo Hesus, ⁶ agud magkaisa kamo para magdayaw sa Dios kag Amay ng aton Ginoo nga Hesu-Kristo.

⁷ Gingbaton kamo ni Kristo, nganì batuna da nindo ang isa kag isa agud madayaw ang Dios. ⁸ Ang rason kung basì gingsugò si Hesus para magserbisyo sa mga Judio hay bukon lang para ipakità nga ang Dios masaligan sa pagtuman ng iya mga pangakò nang una sa inda mga kalulo-lulohan, ⁹ kundì para ipakità da sa mga bukon Judio ang kaluoy ng Dios, agud magdayaw da sinda sa Dios. Kay nakasulat sa Kasulatan,

¹³ Kabay pa nga ang Dios nga nagatao ning paglaom imaw da ang magtao sa indo ning kalipay kag katawhayan tungod sa indo pagtuo sa iya, agud paagi sa gahom ng Espiritu Santo magadugang pa gid ang indo paglaom.

¹⁴ Mga kauturan, nasisiguro ko gid nga maayo kamo nga mga tawo. Nasisiguro ko da nga madamò na ang indo natun-an parti sa pagtuo, kag kaya na nindo magtudlò sa isa kag isa. ¹⁵ Pero nagsulat gihapon ako sa indo nga may pagkaprangka parti sa pila ka butang nga dapat ipadumdom sa indo. Tungod sa kaluoy ng Dios nga gingtao sa akon, ¹⁶ nga maging miyugserbisyo ako ni Kristo Hesus para sa mga bukon Judio. Nagaserbisyo ako sa inda bilang parì paagi sa pagtudlò ng Maayo nga Balità halin sa Dios, agud maging halad sinda nga iya magustuhan, nga maging iya katawuhan nga limpyuhon paagi sa Espiritu Santo. ¹⁷ Kag tungod nakipag-isa na ako kay Kristo Hesus, puydi ako makapahambog ng akon nahuman sa pagserbisyo sa Dios. ¹⁸ Kag wayà ako ning iban nga ipahambog kundì ang mga ginghuman ni Kristo paagi sa akon, nga ang mga bukon Judio hay nagasunod na sa iya paagi sa akon mga pagtudlò kag mga hinimuan, ¹⁹ sa bulig ng mga milagro kag makatitingaya nga mga butang--kag ini tanan hay paagi sa gahom ng Espiritu Santo. Ang resulta gingpasayod ko ang Maayo nga Balità parti kay Kristo abir diin ako nagkadto, kag naglibot pa nganì ako halin sa Jerusalem hasta sa Iliricum. ²⁰ Ginahandom ko lang gid nga magpasayod sa mga lugar nga ang mga tawo hay wayà pa makabatì ng Maayo nga Balità parti kay Kristo, kay indì ko gusto nga magbutang ning pundayson nga nabutangan na ng iban. ²¹ Pareho ng nakasulat sa Kasulatan,

²² Nganì indì pa ako makakarà dirà sa indo tungod sa akon ministeryo diri. ²³ Pero niyan, tungod natapos ko na ang akon trabaho sa ini nga mga lugar, kay pila na ka tuig ang akon handom nga makakarà dirà sa indo, ²⁴ siguro magakità na gid kita. Kay ang akon plano maagi ako dirà sa indo kung magpa-Espania ako. Gusto ko nga malipay sa pagpakig-imaw sa indo dirà, abir sa madalì lang nga tiyempo. Bago ako magpa-Espania, mabuligan nindo ako sa akon mga kahinangyanon sa akon pagbiyahe. ²⁵ Pero niyan makadto anay ako sa Jerusalem agud ihatod ang bulig para sa mga tawo ng Dios didto. ²⁶ Kay ang mga nagatuo sa Macedonia kag Acaya hay nagbuluntaryo nga magtao ning bulig sa mga pubre nga mga tawo ng Dios didto sa Jerusalem. ²⁷ Gusto ninda nga humanon ini. Kung sa bagay may utang nga buot sinda sa mga tawo ng Dios sa Jerusalem. Kay paagi sa inda, ang mga bukon Judio hay nakakaparte ning mga espirituhanon nga pagpakamaayo kaibahan ninda tungod sa Maayo nga Balità. Nganì dapat nga buligan ng mga bukon Judio ang mga tawo ng Dios sa Jerusalem sa inda materyal nga mga kahinangyan. ²⁸ Pagkatapos nga maitao ko sa inda ini nga mga bulig, maagi ako dirà sa indo bago ako magpa-Espania. ²⁹ Kag nagapati ako nga sa pag-abot ko dirà, madamò nga mga pagpakamaayo halin kay Kristo ang mabaton naton sa isa kag isa.

³⁰ Nganì mga kauturan, tungod kay Hesu-Kristo nga aton Ginoo, kag tungod sa paghigugmà nga gingtao ng Espiritu Santo sa aton, nagapangabay ako nga buligan nindo ako sa pagpangamuyò ning hugot sa Dios para sa akon. ³¹ Pangamuyò kamo nga indì ako mauno ng mga wayà nagatuo sa Judea, kag pangamuyò da kamo nga malipay ang mga tawo ng Dios sa Jerusalem sa bulig nga akon day-on sa inda. ³² Pagkatapos, kung itugot ng Dios, makarà ako dirà sa indo nga punò ning kalipay, kag makapahuway ako kaibahan nindo. ³³ Kabay pa ang Dios nga nagatao ning katawhayan hay yarà sa indo tanan. Kabay pa!