¹ Mga kauturan, nang una indì ako makatudlò sa indo pareho ng mga tawo nga ginatuytuyan ng Espiritu Santo, kundì mga tawo nga nagakabuhì sa inda tawhanon nga kinaugalì kag mga ongà pa sa pagtuo kay Kristo. ² Imaw inà nga malupos lang gid ang akon mga pagpanudlò, kay indì pa nindo kaya ang madayom nga mga pagpanudlò. Kag bisan nganì niyan indì pa gid kamo makaintindi. ³ Kay hasta niyan, nagakabuhì pa kamo sunò sa handom ng indo tawhanon nga kinaugalì tungod naiili pa kamo kag nagainaway. Ining indo ginahuman hay nagapamatuod lang nga pareho pa gihapon kamo sa mga tawo diri sa kalibutan. ⁴ Kay may nagahambay, “Ako hay kay Pablo,” kag igwa da nagahambay, “Ako hay kay Apolos.” Dì ba pareho lang gid kamo sa mga tawo diri sa kalibutan, kay nagainiya-iya kamo?

⁵ Kung sa bagay sin-o gid si Apolos? Kag sin-o gid si Pablo? Mga miyugserbisyo lang da kami ng Ginoo nga iya ginggamit agud magtuo kamo. Ang kada isa sa amon hay nagahuman lang ng trabaho nga gingtao ng Ginoo sa amon. ⁶ Ako ang nagtanom, kag si Apolos ang nagbunyag, pero ang Dios imaw ang nagapatubò. ⁷ Bukon importante ang nagatanom kag ang nagabunyag. Ang Dios lang gid ang importante kay siya ang nagapatubò. ⁸ Ang nagatanom kag ang nagabunyag hay pareho lang ang handom, kag kada isa sa inda hay bayusan ng Dios sunò sa inda pagpangabudlay. ⁹ Ako kag si Apolos hay nagabinuligan sa pagpangabudlay para sa Dios. Kamo hay pareho ng uma nga ginapauma sa amon ng Dios.

Kamo hay pareho ng pagpatindog nga iya ginapatindog. ¹⁰ Kag sunò sa kaluoy ng Dios, gingtugutan niya ako bilang eksperto nga arkitekto nga imaw ang nagtukod ng pundasyon. Pagkatapos, ang iban naman nga miyugpatindog hay imaw ang nagapadayon sa pagtrabaho diri. Pero kahinangyan gid nga siguruhon ng kada miyugpatindog nga madahan siya sa pagpatindog. ¹¹ Kay indì puydi nga magbutang ning iban pa nga pundasyon puyra sa gingbutang na, nga imaw si Hesu-Kristo. ¹² May mga tawo nga tamà ang inda ginatudlò. Sinda hay pareho sa nagapadayon sa pagpatindog sa pundasyon, nga ang ginagamit nga mga materyales hay bulawan, pilak, o mga mamahayon nga mga bato. Ang iban hay wayà ning puyos ang inda mga ginatudlò. Pareho sinda sa mga tawo nga ang inda ginagamit sa pagpatindog hay kahoy, kugon, kag uhot. ¹³ Pero sa Adlaw nga Paghusga, masasayuran kung ano nga klasi ng mga materyales ang ginggamit ng kada isa, kay pagatistingon ini sa kalayo. Ang gusto hambayon, ipasayod kung ano nga resulta ng mga trabaho ng kada isa ¹⁴ Kung ang gingpatindog sa pundasyon hay indì masunog, magabaton ang nagpatindog ning premyo. ¹⁵ Pero kung masunog, wayà gid siya ning may mabaton nga premyo; pero maluwas ang iya kaugalingon. Ang iya halimbawà hay maging pareho sa tawo nga nakaluwas sa bayay nga nasunog, pero wayà gid siya ning may nadaya.

¹⁶ Dì ba templo kamo ng Dios kag ang Espiritu ng Dios nagaistar sa indo? ¹⁷ Nganì ang abir sin-o nga magsirà ng templo ng Dios, parusahan siya ng Dios tungod ang templo ng Dios hay banal. Kag ang templo nga inà hay wayà ning iban kundì kamo mismo.

¹⁸ Ayaw pagdayaa ang indo kaugalingon. Kung igwa sa indo nagahunahunà nga mayad siya sa ini nga tiyempo, dapat ibaliwayà lang niya inà nga kamayad agud maging mayad siya sa panirò ng Dios. ¹⁹ Kay para sa Dios, ang ginakabig nga kamayad sa ini nga kalibutan hay kalukuhan lang. Kay nakasulat sa Kasulatan, “Ginadakop ng Dios ang mga mayad sa inda kadayà.”^{a 20} Kag nakasulat pa gid, “Nasayuran ng Ginoo nga ang mga ginarason ng mga tawo nga mayad hay wayà ning puyos.”^{b 21} Nganì indì dapat nga magpahambog ang abir sin-o parti sa tawo, kay kami tanan hay para sa indo kaayuhan. ²² Ako si Pablo, si Apolos, kag si Pedro^c hay para sa indo tanan. Bisan ini nga kalibutan, kag ang indo kabuhì kag kamatayon, kag ang nagakatabò niyan kag sa paabuton, ini tanan hay para sa indo kaayuhan. ²³ Kag kamo, hay kay Kristo kag si Kristo hay sa Dios.