¹ Nganì dapat kabigon nindo kami nga mga miyugserbisyo ni Kristo nga ginasaligan ng Dios nga magbalità ng kamatuuran nga wayà gingpasayod nang una. ² Niyan, ang mga miyugserbisyo nga ginasaligan dapat magpakità nga masaligan gid sinda.

³ Sa akon, baliwayà kung ano ang paghusga nindo o ang paghusga ng tawo sa akon. Ako da mismo hay wayà nagahusga sa akon sarili. ⁴ Kung sa bagay, malimpyo ang akon konsinsya, pero indì gusto hambayon nga wayà na ako ning salà sa akon ginahuman. Ang Ginoo lang gid ang makahambay kung tamà o bukon ang akon ginahuman. ⁵ Nganì ayaw kamo maghusga sa wayà pa mag-abot ang tamà nga tiyempo. Huyata nindo ang pag-abot ng Ginoo. Imaw inà ang oras nga ipakità niya ang tanan nga sekrito sa kaduyom kag ipasayod ang mga motibo ng mga tawo. Pagkatapos ang kada isa hay magabaton ning pagdayaw nga halin sa Dios.

⁶ Mga kauturan, ginggamit ko nga halimbawà para sa indo ang akon kaugalingon kag si Apolos, para matun-an nindo nga indì kamo magsubra sa nakasulat sa Kasulatan. Agud indì nindo ipahambog ang isa kag maghambay nga mas maayo ang isa kaysa sa iban. ⁷ Basì nagahunahunà kamo nga mas maayo gid kamo kaysa sa iban? Ano ang gingbaton nindo nga bukon naghalin sa Dios? Kag kung sa Dios naghalin, basì ginapahambog nindo nga daw sa indo gid?

⁸ Nagahunahunà kamo nga wayà na kamo ning kuyang, nga manggaranon na kamo kag nagaharì na kamo, bisan kami hay wayà pa! Kabay pa nagaharì na kamo, agud makaharì da kami kaibahan nindo! ⁹ Kay ginaisip ko, kami nga mga apostol hay gingbutang ng Dios sa pinakamababà nga kamutangan, pareho sa mga tawo nga sentensyado na nga patyon kag ginasirò kami ng kalibutan nga imaw ang tanan nga anghel kag tanan nga tawo. ¹⁰ Tungod sa amon pagserbisyo kay Kristo, nagahambay ang mga tawo nga mga buang kami. Pero kamo, nagahunahunà nga mga mayad tungod yarà kamo kay Kristo. Kami hay mga maluya sa abilidad; pero kamo, nagahunahunà nga makusog! Ginadayaw kamo ng mga tawo, pero kami hay ginapakahuy-an lang ninda. ¹¹ Hasta nganì niyan ginaagwanta lang namon ang kagutom kag kauhaw, kag ginakuyang pa kami ning barò. Ginatinampuyong kami ng mga tawo, kag nagasaylo-saylo kami ning istaran kay wayà kami ning sarili nga bayay. ¹² Nagatrabaho gid kami kag nagapangabudlay para lang mabuhì. Pag ginahambayan kami ning malain ng mga tawo, ginapangamuyò namon nga kaluuyan pa gid sinda ng Dios. Kag pag ginapangsakit kami ng mga tawo, ginatiis lang namon. ¹³ Pag ginapakahuy-an kami, pero nagasabat kami ning madahan. Hasta niyan, sa hunahunà ng mga tawo sa kalibutan daw basura kami, pinakamakaluluoy nga klasi ng mga tawo.

¹⁴ Wayà ko ini gingsulat para pakahuy-an kamo, kundì gusto ko nga tudluan kamo bilang pinalanggà ko nga mga ongà. ¹⁵ Kay bisan kadamo-damò ang mga nagatudlò sa indo parti kay Kristo Hesus, isa lang gid ang indo tatay sa pagtuo kag inà hay wayà ning iban kundì ako. Mga ongà ko kamo sa pagtuo kay Kristo Hesus tungod ako ang nagdaya sa indo ng Maayo nga Balità. ¹⁶ Nganì nagapangabay gid ako sa indo nga patuyari nindo ako. ¹⁷ Imaw inà nga ginasugò ko dirà sa indo si Timoteo nga akon palanggà kag masaligan nga ongà sa Ginoo, agud magpadumdom siya sa indo ng akon mga paagi sa pagkabuhì bilang tagasunod ni Kristo. Ini nga mga paagi hay akon da ginatudlò sa tanan nga mga nagatuo abir diin nga lugar.

¹⁸ Ang iban sa indo nagapahambog na, kay kalaom ninda indì na ako magkarà dirà. ¹⁹ Pero kung itugot ng Ginoo, makarà ako dirà nga daan. Kag siruon ko gid kung may gahom ng Espiritu o kung mahangin lang maghambay inà nga mga tawo nga mahambog. ²⁰ Kay ang matuod, kung ang Dios imaw ang nagaharì sa aton kabuhì, masayuran da inà ng iban paagi sa gahom ng Dios sa aton kag bukon sa aton mga hambay lang. ²¹ Nganì magpilì kamo kung ano ang indo gusto pag-abot ko dirà: disiplinahon ko kamo o higugmaon nga may kabuot nga tagipusuon?