¹ Mga kauturan, gusto ko nga madumduman nindo ang natabò sa aton mga kalulo-lulohan nga kaibahan ni Moises. Gingtuytuyan sinda tanan ng Dios paagi sa panganod, kag gingbuligan niya sinda tanan sa inda pagpanaw sa uga nga dutà patabok sa Puya nga Dagat.^{a 2} Paagi sa adto nga panganod kag dagat, daw gingbawtismuhan sinda tanan bilang mga tagasunod ni Moises. ³ Nagkaon sinda tanan ng pagkaon nga gingtao ng Dios paagi sa iya gahom.^{b 4} Kag nag-inom sinda tanan ng inumon nga gingpatubod ng Dios, kay nag-inom sinda ng tubì halin sa bukon ordinaryo nga bato halin sa Dios.^c Adtong bato nga nagnunot sa inda hay si Kristo mismo. ⁵ Pero bisan gingbuligan sinda tanan ng Dios, kadamuan sa inda hay wayà gid napalipay ang Dios. Nganì nagkayat ang inda mga patay nga lawas didto sa malangkag nga lugar.

⁶ Natabò ang mga ini sa inda agud magpaandam sa aton nga indì kita maghinandom sa paghuman ning mga malain pareho ng inda mga ginghandom. ⁷ Indì kamo magsamba sa mga dios-diosan pareho ng ginghuman ng iban sa inda. Kay nakasulat sa Kasulatan, “Nagkinaon sinda kag nag-ininom, kag nagpagusto pangalipay sa inda pagsamba sa dios-diosan.”^{d 8} Kag indì gid kita magsunod sa ginghuman ng iban sa inda nga nagahuman ning imoral nga pakipag-relasyon. Nganì gingparusahan sinda ng Dios kag 23,000 ang nagkamatay sa isa lang ka adlaw.^{e 9} Kag indì naton pagtistingon ang Kristo pareho ng ginghuman ng iban sa inda. Nganì gingpakagat niya sinda sa mga sawa kag nagkamatay sinda.^{f 10} Kag indì kamo magnireklamo pareho ng ginghuman ng iban sa inda. Nganì gingpaday-an sinda ng Dios ning anghel nga miyugpamatay para patyon sinda.^g

¹¹ Ini nga mga natabò sa inda hay nagatao ning paandam sa aton. Kag gingsulat ini nga mga nagkatabò agud magpaandam da sa aton nga nagakabuhì sa tiyempo nga madalì na lang mag-abot ang katapusan.

¹² Nganì kung nagahunahunà kamo nga ang indo pagtuo hay malig-on na, mag-andam kamo kay basì kung makasalà da kamo. ¹³ Wayà ning pagtilaw nga nagaabot sa indo nga wayà da nagaabot sa iban nga mga tawo. Pero masaligan ang Dios, kay indì niya kamo pagtugutan nga tistingon ning subra sa indo kaya. Kag pag mag-abot ang pagtilaw sa indo, magahuman siya ning paagi agud tiison nindo ini.

¹⁴ Nganì, mga pinalanggà ko, indì gid kamo magsamba sa mga dios-diosan. ¹⁵ Nagahambay ako sa indo kay kamo hay nakakaintindi. Nganì isip-isipa nindo ang akon ginahambay sa indo. ¹⁶ Kung magtipon-tipon kita para magkumyunyon, nagainom kita sa tasa ng pagpasalamat sa Dios, dì ba paagi diri nagapakig-isa kita sa dugò ni Kristo? Kag may tinapay da kita nga ginabuak-buak kag ginakaon, dì ba paagi diri nagapakig-isa kita sa lawas ni Kristo? ¹⁷ Kita, bisan madamò, hay isa lang ka lawas tungod isa lang ka tinapay ang ginakaon naton tanan.

¹⁸ Tan-awa nindo ang namat-an ng tribo nga mga Israelita. Ang mga nagakaon ng mga halad hay nagalakot sa ginahuman sa altar nga ginahalad nga hayop sa Dios. ¹⁹ Ano ang gusto ko hambayon paagi sa ini nga pagkompara ng mga paghalad? May puyos ba ang mga dios-diosan kag ang pagkaon nga ginahalad sa inda? Wayà! ²⁰ Ang gusto ko hambayon hay sa mga demonyo kag bukon sa Dios ang mga ginahalad ng mga tawo nga wayà nagatuo sa Dios. Kag indì ko gusto nga maglakot kamo sa mga demonyo. ²¹ Indì puydi nga mag-inom kamo sa tasa ng Ginoo kag sa tasa ng mga demonyo. Kag indì puydi nga magkaon kamo sa pinggan ng Ginoo kag sa pinggan ng mga demonyo. ²² Gusto ba naton magpangimon ang Ginoo? Kay kung mahangit na siya, nasayuran naton nga indì gid kita makalikaw sa iya parusa.

²³ Kag niyan may magahambay, “Puydi ako maghuman ning bisan ano.” Pero ang ginahambay ko, bukon tanan nga mga butang hay mapupuslan nindo. Nganì bisan ginatugot sa akon ang maghuman ning bisan ano, pero bukon tanan hay makapatibay sa iban. ²⁴ Ayaw nindo paghunahuaa ang indo lang kaugalingon nga kaayuhan, kundì hunahunaa da nindo ang kaayuhan ng iban.

²⁵ Kauna nindo ang bisan ano nga ginabaligyà nga karne sa tindahan nga wayà na pangutana kung inà hay ginghalad sa mga dios-diosan o wayà, agud indì kamo pag-isturbuhon ng indo konsinsya. ²⁶ Kay nakasulat sa Kasulatan, “Ang kalibutan kag ang tanan nga igwa diri hay sa Ginoo.”^h

²⁷ Kung may wayà nagatuo nga mag-imbitar sa indo nga magkaon sa inda, kag gusto da nindo nga magkadto, kauna nindo ang bisan ano nga gingpreparar para sa indo nga wayà na pangutana kung inà ba hay ginghalad sa mga dios-diosan o wayà, agud indì kamo pag-isturbuhon ng indo konsinsya. ²⁸ Pero kung may naghambay sa indo nga inà nga pagkaon hay ginghalad sa mga dios-diosan, ayaw nindo pagkauna, tungod sa inà nga tawo nga naghambay sa indo, agud indì kamo pag-isturbuhon ng indo konsinsya. ²⁹ Bukon ang indo kaugalingon nga konsinsya ang akon gusto hambayon kundì ang konsinsya ng iban nga tawo. Niyan maghambay kamo, “Basì pugungon ko ang akon gusto tungod sa konsinsya ng iban? ³⁰ Kung ginapasalamatan ko sa Dios ang akon ginakaon, basì abi pakalainon ako tungod sa pagkaon nga akon ginapasalamatan?”

³¹ Ini ang akon sabat sa indo: bisan ano ang indo humanon, abir magkaon o mag-inom, himua nindo ang tanan sa katuyuan nga madayaw ang Dios, ³² agud indì gid kamo mabasoy ng mga Judio o ng mga Griego, o ng mga nagatuo sa Dios. ³³ Patuyari lang nindo ang akon ginahuman: permi ako nagapangità ning paagi nga mabuligan ko ang tanan nga tawo sa tanan ko nga ginahuman. Wayà ako nagapangità ng akon kaugalingon nga kaayuhan kundì ang kaayuhan ng iban, agud maluwas sinda.