¹ Isipa nindo ako! Dì ba hilway ako? Dì ba apostol^a ako? Dì ba nagpakità mismo sa akon si Hesus nga aton Ginoo? Kag dì ba nagtuo kamo tungod sa akon pagpangabudlay? ² Bisan ang iban wayà nagakilaya sa akon bilang apostol, apostol gid ako sa indo tungod kamo mismo ang ebidensya, kay paagi sa akon kamo hay may relasyon na sa Ginoo.

³ Imaw ini ang ginasabat ko sa mga tawo nga nagapangsirà sa akon. ⁴ Wayà ba ako ning poder nga magpangayò ng akon pagkaon sa mga tawo nga nakakabaton ng akon pagpanudlò? ⁵ Kag wayà ba ako ning poder para magdaya ng asawa nga nagatuo sa mga pagbiyahe ko pareho ng ginahuman ng iban nga mga apostol, kag ng mga manghod ng Ginoo, kag ni Pedro^b? ⁶ Ano, kami lang ba ni Bernabe ang kahinangyan nga magpangabudlay para sa amon pagpangabuhì? ⁷ May sundalo ba nga siya mismo ang nagagastos ng iya pagserbisyo? May tawo ba nga nagatanom nga wayà nagapuyos ng bunga ng iya tinanom? Kag may nagaalilà ba ning mga kambing nga wayà nagainom ning gatas sa iya ginaalilà?

⁸ Ining akon ginahambay hay bukon lang sa tawhanon nga panghunahunà, kundì imaw da ini ang ginatudlò ng Kasuguan ni Moises. ⁹ Kay nakasulat sa Kasuguan, “Ayaw magtabuni ang babà ng baka mintras ginagamit sa paggiok agud makakaon.”^c Nagakabayaka lang ba sa baka ang Dios? Wayà! ¹⁰ Syempre, ini hay parti sa aton ang iya ginahambay. Halimbawà, ang mga nagaarado kag nagagiok hay nagalaom sa patubas, tungod nagapaabot da sinda nga may parte sa ani. ¹¹ Kag para sa amon, nagpugas kami sa indo ng espirituhanon nga mga binhì; dakò na gid ba nga bagay kung magpaabot kami nga magtao kamo ning mga bagay nga kahinangyan namon sa adlaw-adlaw? ¹² Kung ang iban nga mga manunudlò hay may poder sa pagpaabot ini halin sa indo, mas labi na gid kami.

Pero bisan may poder kami sa pagpaabot ng bulig halin sa indo, wayà kami nagpangayò sa indo. Gingtiis namon ang tanan, agud wayà ning makapugong sa pagwali ng Maayo nga Balità parti kay Kristo. ¹³ Sayod gid nindo nga ang mga nagaserbisyo sa templo hay dirà da nagabuoy ng inda pagkaon, kag ang mga nagaserbisyo sa altar hay nagabuoy da ng inda parti sa mga karne nga ginahalad diri? ¹⁴ Sa ini da nga paagi, nagsugò ang Ginoo nga ang mga miyugwali ng Maayo nga Balità hay dapat nga magbaton ning bulig sa mga nakabaton ng Maayo nga Balità, agud mabuhì sinda.^d

¹⁵ Pero wayà ko paggamita ang akon poder nga inà. Kag wayà da ako nagasulat niyan agud ipasayod sa indo nga taw-an nindo ako. Maayo pa nga mamatay ako kaysa sa humanon ko inà. Siguruhon ko nga wayà ning bisan sin-o nga makabuoy ng akon ginapahambog nga wayà ning bayad sa akon pagwali ng Maayo nga Balità. ¹⁶ Kung sa bagay, wayà ko ginapahambog ang akon pagwali ng Maayo nga Balità, kay gingtugyan na ng Ginoo ini nga responsibilidad sa akon. Kung indì ko iwali ang Maayo nga Balità, kaluluoy ako! ¹⁷ Kung nagawali ako nga halin sa akon kabubut-on, magapaabot ako ning premyo. Pero kung bukon halin sa akon kabubut-on, magatuman gihapon ako kay imaw ini ang trabaho nga gingsalig sa akon ng Dios. ¹⁸ Ano niyan ang premyo nga akon mabaton? Ang ginaisip ko nga premyo hay ang kalipay nga wayà ako nagapabayad sa akon pagwali ng Maayo nga Balità, agud indì ko magamit ko ang akon poder sa ini nga premyo sa pagpangabudlay para sa Maayo nga Balità.

¹⁹ Kay bisan wayà ning may nagaulipon sa akon, ako hay daw nagapaulipon sa tanan, agud madamò pa gid ang akon madaya nga magtuo kay Kristo. ²⁰ Imaw inà nga kung kaibahan ko ang mga Judio nagakabuhì ako pareho ng Judio, agud madaya ko sinda para magtuo kay Kristo. Nganì bisan bukon ako sakop sa Kasuguan ng mga Judio, kung kaibahan ko ang mga nagapasakop sa Kasuguan, ginasunod ko ini, agud madaya ko sinda sa pagtuo. ²¹ Kag imaw da kung kaibahan ko ang mga bukon Judio nga wayà nagasunod sa Kasuguan nga para sa Judio, wayà da ako nagasunod sa Kasuguan, agud magtuo sinda kay Hesus nga Ginoo. Bukon ini gusto hambayon nga wayà ko ginasunod ang mga sugò ng Dios, kay ang matuod, ginasunod ko ang mga sugò ni Kristo. ²² Kung kaibahan ko ang mga nagatuo nga maluya ang pagtuo, nagapakigbagay ako sa inda, agud mapatibay ko sinda sa Ginoo. Nagapakigbagay ako sa tanan bisan ano ang inda kamutangan, agud sa bisan ano nga paagi maluwas ko ang iban sa inda. ²³ Ginahuman ko ini tanan tungod sa Maayo nga Balità, agud makabaton ako ng mga pagpakamaayo kaibahan ng mga nagatuo diri.

²⁴ Sa aton pagsunod sa Ginoo pareho kita sa mga miyugdyagan. Sa palumbaan, sayod gid nindo nga madamò ang nagalakot, pero isa lang ang makakabaton ng premyo. Nganì pakaayuha nindo ang indo pagdyagan, agud makabaton kamo ng premyo. ²⁵ Ang kada miyugkanam hay nagapraktis gid ning maayo nga may pagdisiplina sa iya kaugalingon, agud makabaton siya ng premyo. Pero ang premyo nga iya mababaton hay indì magdugay. Kita nga mga nagatuo hay makabaton ng premyo nga indì gid maduyà. ²⁶ Imaw inà nga sa akon pagserbisyo sa Ginoo, diritso gid ang akon dyagan pakadto sa katapusan. Kag kung ako hay pareho sa boksingero, wayà ako nagasumbag sa hangin. ²⁷ Nganì kung may mga malain nga handom sa akon lawas, ginatinguhà ko gid nga pugungon ini kay basì kung pagkatapos ko matudluan ang mga tawo, ako pa ang indì makabaton ng premyo halin sa Dios.