¹ Niyan, mga kauturan ko kay Kristo, kung parti sa mga butang ng Espiritu Santo, gusto ko nga masayuran nindo ini. ² Nasayuran nindo nga nang wayà pa kamo nagatuo sa Dios, gingpinatayang kag gingtinuytuyan kamo agud magsamba sa mga dios-diosan nga wayà ning kabuhì. ³ Nganì gusto ko nga masayuran nindo nga wayà ning tawo nga ginatuytuyan ng Espiritu ng Dios nga maghambay nga “Sumpaon si Hesus!” Kag wayà da ning tawo nga makahambay nga “Si Hesus ang Ginoo,” kung wayà siya ginatuytuyi ng Espiritu Santo.

⁴ Iba-iba ang mga abilidad, pero isa lang ka Espiritu ang ginahalinan ini. ⁵ Iba-iba ang paagi sa pagserbisyo, pero isa lang nga Ginoo ang aton ginaserbisyuhan. ⁶ Iba-iba ang ginapahuman ng Dios sa aton, pero isa lang nga Dios ang nagahuman ng tanan sa aton tanan. ⁷ Ang kada isa hay ginataw-an ng Dios nga nagapakità nga ang Espiritu hay yarà sa iya, agud makabulig siya sa iya kapareho nga nagatuo. ⁸ Ang iban ginataw-an ng Espiritu ning abilidad sa paghambay parti sa kamatuuran ng Dios, kag ang iban ginataw-an ng pareho nga Espiritu ning abilidad sa paghambay parti sa kamayad ng Dios. ⁹ May igwa da ginataw-an ng pareho nga Espiritu ning dakò gid nga pagtuo, kag igwa da ginataw-an ng pareho nga Espiritu ning abilidad sa pagpang-ayo ng mga nagamasakit. ¹⁰ Ang iban ginataw-an ning gahom sa paghuman ning mga milagro; ang iban, abilidad sa pagbalità ng mensahe halin sa Dios; kag ang iban hay abilidad sa pagkasayod kung ano ba ang nagagahom sa isa ka tawo kung Espiritu Santo o bukon. May ginataw-an da ng abilidad nga magahambay ning iban nga mga lingguahe nga wayà ninda nasayuri, kag igwa da ginataw-an ng abilidad sa pagpasaylo ng adto nga mga lingguahe. ¹¹ Pero isa lang gid ka Espiritu ang nagatao ini tanan, kag ginapanao niya ini sa kada tawo sunò sa iya gusto.

¹² Niyan isipa ang lawas ng tawo, isa lang ini pero madamò nga parte. Bisan iba-iba ang kada parte, isa lang gid ini ka lawas. Pareho da ini sa aton nga mga nagatuo nga madamò pero isa lang ka lawas ni Kristo. ¹³ Kay isa lang gid ka Espiritu ang gingbawtismo sa aton tanan, Judio man o Griego, ulipon man o hilway, agud maging isa ka lawas. Kag isa da ka Espiritu ang gingbaton naton tanan.^a

¹⁴ Ang lawas ng tawo hay isa lang pero may madamò nga mga parte. ¹⁵ Kung maghambay ang siki, “Tungod ako hay bukon kamot, bukon ako parte ng lawas,” abir tiyad inà, sa matuod lang siya hay parte gihapon ng lawas. ¹⁶ Kag kung maghambay ang talinga, “Tungod ako hay bukon mata, bukon ako parte ng lawas,” abir tiyad inà, sa matuod lang, siya hay parte gihapon ng lawas. ¹⁷ Kay kung ang bilog nga lawas ng tawo hay puro lang mata, pauno ang iya pagkabatì? Kag kung ang bilog nga lawas hay puro lang talinga, pauno ang iya pagpanimahò? ¹⁸ Pero wayà kita paghumana ng Dios nga tiyad inà, gingbutang niya ang iba-iba nga parti sa aton lawas sunò sa iya gusto. ¹⁹ Kung ang lawas hay isa lang ka parte, indì na inà matatawag nga lawas. ²⁰ Ang matuod, madamò ang mga parte ng aton lawas, pero isa lang gid ka lawas.

²¹ Kag ang mata hay indì makahambay sa kamot, “Indì ko ikaw kahinangyan,” kag ang uyo indì da makahambay sa siki, “Indì ko ikaw kahinangyan.” ²² Sa matuod lang, ang mga parte ng lawas nga daw maluya hay kahinangyan ta gid. ²³ Ang mga parte ng lawas nga daw bukon gid importante, aton ginadipara ning maayo; kag ang mga parte nga makahuhuyà nga indì dapat makità, aton da ini ginatabunan ning maayo. ²⁴ Indì na naton kahinangyan nga humanon ini sa aton mga parte nga kaayo na siruon. Pero gingbutang ng Dios sa tamà nga lugar ang mga parte ng lawas, agud mataw-an ning dangal ang mga parte nga daw bukon gid importante. ²⁵ Ginghuman ini ng Dios agud wayà ning mag-iyaiya, kundì dapat magbinuligan ang kada parte ng lawas. ²⁶ Nganì kung ang isa ka parte hay nagaantos, ang tanan nga parte hay nagaantos da. Kag kung ang isa ka parte hay ginadayaw, ang tanan nga parte hay nalilipay da.

²⁷ Ang gusto ko hambayon imaw ini: kita nga mga nagatuo hay imaw ang lawas ni Kristo, kag ang kada isa sa aton hay parte ng iya lawas. ²⁸ Kag sa ini nga lawas, nga imaw ang iglesya, nagbutang ang Dios, una sa tanan, ning mga apostol; ikaduha, mga propeta;^b ikatuyo, mga manunudlò ng hambay ng Dios; pagkatapos mga miyughuman ning mga milagro, mga miyug-ayo ng mga may sakit, mga miyugbulig sa mga nagatuo, mga administrador, kag mga miyughambay ning iban nga mga lingguahe nga wayà ninda nasayuri. ²⁹ Nasayuran da nindo nga bukon kita tanan hay mga apostol, bukon da kita tanan hay mga propeta, bukon da kita hay mga manunudlò, bukon da kita tanan hay mga miyughuman ning mga milagro. ³⁰ Kita tanan hay wayà da pagtaw-i ning abilidad sa pag-ayo ng may sakit, kita tanan hay wayà da pagtaw-i ning abilidad sa paghambay sa iban nga lingguahe nga wayà nasayuri, kag kita tanan hay wayà da pagtaw-i ning abilidad sa pagsaylo ng adto nga mga lingguahe.

³¹ Pero handuma gid nindo nga mabaton halin sa Dios ang mga importante gid nga mga abilidad.

Kag niyan itudlò ko sa indo ang pinakamaayo nga paagi ng pagkabuhì sa tanan.