¹ Abir makahambay pa ako ning iban nga mga lingguahe ng mga tawo kag ng mga anghel, pero kung wayà ako ning paghigugmà sa akon isigkatawo, pareho lang ako sa tambor nga malingaw o bagtingan nga matingil. ² Kag abir makabalità ako ning mensahe halin sa Dios kag makasayod ng tanan nga tinagò nga mga kamatuuran patì ang iba-iba nga mga kamayad, kag bisan mapasaylo ko ang mga bukid tungod sa akon dakò nga pagtuo, pero kung wayà ako ning paghigugmà, wayà gid ako ning puyos. ³ Abir ipanao ko sa mga pubre ang tanan ko nga mga pagkabutang, kag abir ihalad ko ang akon lawas para sunugon,^a kung wayà ako ning paghigugmà wayà gihapon ako ning puyos.

⁴ Ang tawo nga nagahigugmà hay mapinasinsyahon, mabuot sa iya isigkatawo, bukon mailihon, bukon mahambog o hadakon, ⁵ bukon bastos, bukon maiyaiyahon sa kaugalingon nga kaayuhan, bukon madalì mahangit, bukon madinumuton sa salà ng iban, ⁶ wayà nalipay sa mga malain nga ginghuman kundì nalilipay sa kamatuuran, ⁷ permi mainantuson, permi may pagsalig, permi may paglaom, kag permi matiniison.

⁸ Ang paghigugmà hay wayà gid katapusan, pero may katapusan ang mga pagbalità ning mensahe halin sa Dios kag ang mga paghambay sa iban nga mga lingguahe nga wayà nasayuri, patì ang mga pag-isplikar ng kamayad ng Dios. ⁹ Kay ang mga butang nga aton nasayuran patì ang aton pagbalità ning mensahe halin sa Dios hay bukon pa gid kumplito. ¹⁰ Pero pag mag-abot ang adlaw nga makumplito na ang tanan, maduduyà na ang bukon kumplito.

¹¹ Nang ongà pa ako, ang akon paghambay, ang akon paghunahunà, kag ang akon pang-intindi hay pareho ng ongà. Pero niyan nga may edad na ako, gingbayaan ko ang batasan ng pagiging ongà. ¹² Sa niyan, daw nagasirò kita sa espiho nga malabò; pero magaabot ang adlaw nga maging klaro gid ang tanan. Niyan limitado ang aton nasayuran; pero magaabot ang adlaw nga masasayuran ta ang tanan parti sa Dios, pareho ng pagkakilaya ng Dios sa aton.

¹³ Nganì, tuyo ka butang ang nagapadayon: ang pagtuo, paglaom, kag paghigugmà. Pero ang paghigugmà gid ang pinakaimportante.