¹ Kung parti sa indo inugbulig sa mga banal nga tawo ng Dios didto sa Judea, himua da nindo ang akon gingsugò sa mga nagatuo sa Galacia. ² Kada Dominggo,^a ang kada isa sa indo hay maglain na ning kantidad sunò sa indo kinità. Pagkatapos taguon nindo ini agud sa pag-abot ko dirà, preparado na ang indo inugtao. ³ Pag-abot ko, dirà suguon ko sa Jerusalem ang mga tawo nga indo gingpilì para magdaya ng indo mga bulig kag ng akon sulat nga magapakilaya sa inda. ⁴ Pero kung kahinangyan gid nga magkadto da ako didto sa Jerusalem, day-on ko na lang sinda.

⁵ Paghalin ko sa probinsya ng Macedonia, makarà ako dirà sa Corinto kay plano ko nga maagi sa Macedonia. ⁶ Basì kung magadugay ako dirà sa indo, kag puydi nga dirà na ako magpaligad ning tiglalamig, agud mabuligan nindo ako sa akon mga kahinangyanon sa akon pagbiyahe kung diin ako makadto. ⁷ Indì ko gusto nga mag-agi lang ako sa indo ning madalì, kundì gusto ko nga kung yarà na ako sa indo, makatiner ako ning madugay, kung itugot ng Ginoo.

⁸ Pero niyan matiner anay ako diri sa Efeso hasta sa adlaw ng Pentecostes, ⁹ tungod madamò diri ang gusto magpamatì ng akon ginatudlò nga Maayo nga Balità kag nagapati ako nga madamò ang magatuo diri, bisan madamò ang nagakuntra.

¹⁰ Kung mag-abot dirà si Timoteo, pakipagayi nindo siya agud indì siya matahap sa indo, kay pareho da siya sa akon nga nagapangabudlay sa Ginoo. ¹¹ Nganì indì nindo siya ibaliwayà. Kag kung maghalin na siya dirà, buligi da nindo siya sa iya mga kahinangyanon sa iya pagbiyahe agud makabalik siya diri sa akon. Ginapaabot ko siya kaibahan ng iban pa nga mga kauturan kay Kristo.

¹² Kung parti sa aton utod nga si Apolos, gingpangabay ko gid siya nga magbisita dirà sa indo kaibahan ng iban nga mga kauturan kay Kristo. Pero bukon pa siya niyan sigurado nga makakarà dirà. Makarà lang ugaling siya dirà kung may opurtunidad siya.

¹³ Magbantay kamo permi kag magpakalig-on sa indo pagtuo kay Hesu-Kristo. Magpakaisog kag magpakatibay kamo. ¹⁴ Kag abir ano ang indo ginahuman, himua nindo inà nga may paghigugmà.

¹⁵ Mga kauturan, nasayuran nindo nga ang una gid nga mga nagatuo dirà sa Acaya hay wayà ning iban kundì si Estefanas kag ang iya pamilya. Ginghalad ninda ang inda kaugalingon para magserbisyo sa mga banal nga tawo ng Dios. Imaw inà nga nagapangabay ako sa indo ¹⁶ nga magpasakop kamo sa inda kag patì da sa tanan nga pareho sa inda nga nagapangabudlay para sa Ginoo.

¹⁷ Nalipay gid ako nang pag-abot nina Estefanas, Fortunato, kag Acaico. Kay bisan wayà kamo diri, yari sinda, nganì nahuman ninda sa akon ang indì nindo mahuman. ¹⁸ Ginapakusog ninda ang akon hunahunà kag patì da sa indo. Ang mga tawo nga pareho sa inda hay dapat nga respetuhon sa inda mga ginahuman.

¹⁹ Ang mga nagatuo diri sa probinsya ng Asya hay nagapangamusta sa indo. Si Aquilo kag si Priscila kag ang mga nagatuo nga nagatipon sa inda bayay sa pagsamba sa Dios hay nagapangamusta gid sa indo sa pangayan ng Ginoo. ²⁰ Nagapangamusta da sa indo ang tanan nga kauturan kay Kristo diri.

Magkamustahanan kamo bilang kauturan nga may matuod nga paghigugmà.^b

²¹ Ako mismo si Pablo ang nagasulat ini nga pagpangamusta: Kamusta sa indo tanan.

²² Kabay pa nga parusahan ng Ginoo ang bisan sin-o nga wayà nagahigugmà sa iya.

O Ginoo, magbalik ka na!

²³ Kabay pa nga mabaton nindo ang grasya ni Hesus nga Ginoo.

²⁴ Ginahigugmà ko kamo tanan sa aton pakig-isa kay Kristo Hesus.