¹ Mga kauturan, gusto ko ipadumdom sa indo ang Maayo nga Balità nga akon gingpasayod sa indo. Ini hay ang gingbaton nindo kag hasta niyan imaw da ang indo ginatindugan. ² Paagi sa ini nga Maayo nga Balità, maluluwas kamo kung ginapanghawiran gid nindo ning maayo ang akon gingpasayod sa indo, puyra lang kung bukon matuod ang indo ginatuuhan. ³ Gingtudlò ko sa indo ining pinakaimportante nga mga butang nga gingtudlò sa akon: si Kristo hay namatay agud mapatawad ang aton mga salà, ini hay natabò sunò sa Kasulatan. ⁴ Kag ginglubong siya kag nabanhaw sa ikatuyo ka adlaw, sunò da sa Kasulatan. ⁵ Kag nagpakità siya una kay Pedro^a kag pagkatapos hay sa 12 nga apostol. ⁶ Pagkatapos nagpakità da siya sa iya mga tagasunod nga subra 500 sa isa ka beses. Kag kadamuan sa inda hay buhì pa niyan, pero ang iban hay patay na. ⁷ Pagkatapos nagpakità da siya kay Santiago^b kag sa tanan nga apostol. ⁸ Sa katapusan nagpakità da siya sa akon. Ako hay pareho sa lapsag nga ging-ongà nga bukon pa oras.

⁹ Kay ako ang pinakamahinà sa mga apostol kag indì nganì angay nga tawagon nga apostol, tungod gingpasakitan ko ang mga nagatuo sa Dios. ¹⁰ Pero sa kaluoy ng Dios sa akon, niyan apostol na ako. Kag wayà ning may makahambay nga wayà ning puyos ang kaluoy ng Dios nga gingtao sa akon, tungod ang matuod, mas madamò ang akon gingpangabudlayan kung ikumpara sa nahuman ng akon kapareho nga mga apostol. Pero bukon sa akon kaugalingon, kundì tungod sa kaluoy ng Dios. ¹¹ Pero wayà ning deperensya kung ako o sinda ang nagatudlò sa indo, ang importante hay pareho ang amon ginawali kag pareho da ang indo ginatuuhan.

¹² Kung ginawali sa indo nga nabanhaw si Kristo halin sa mga namatay, basì ang iban dirà sa indo hay nagahambay nga wayà ning pagkabuhì liwat? ¹³ Kung wayà ning pagkabuhì liwat, gusto hambayon si Kristo hay wayà da kuntà nabanhaw. ¹⁴ Kag kung wayà nabanhaw si Kristo, wayà kuntà ning puyos ang amon pagwali, kag wayà da ning puyos ang indo pagtuo. ¹⁵ Bukon lang inà, kundì ang gusto hambayon nagapinusong kami sa amon pamatuod parti sa Dios, kay nagpamatuod kami nga gingbanhawa niya si Kristo. Kag wayà kuntà niya gingbanhawa si Kristo, kung indì da pagabuhion liwat ang mga namatay. ¹⁶ Kay kung wayà ning pagkabuhì liwat ang mga patay, wayà da kuntà nabanhaw si Kristo. ¹⁷ Kag kung si Kristo hay wayà nabanhaw, ang indo pagtuo hay wayà ning puyos kag wayà pa kuntà kamo napatawad sa indo mga salà. ¹⁸ Kag ang gusto pa hambayon ang mga nagatuo kay Kristo nga nagkamatay na hay parusahan da sa impyerno abir san-o. ¹⁹ Kung ang aton paglaom sa pagtuo kay Kristo hay para lang sa aton kabuhì diri sa kalibutan, mas kaluluoy gid kita kaysa sa tanan nga tawo.

²⁰ Pero ang matuod, nabanhaw liwat si Kristo halin sa mga namatay kag imaw ini ang garantiya nga buhion da liwat ang mga namatay. ²¹ Tungod sa isa ka tawo, nag-abot ang kamatayon sa tanan nga tawo, nganì tungod da sa isa ka tawo, mabuhì liwat ang mga namatay. ²² Kung ang tanan nga tawo mamatay tungod sa aton relasyon kay Adan, tungod da sa aton relasyon kay Kristo kita tanan hay mabuhì liwat. ²³ Ang pagkabuhì liwat hay may iba-iba nga tiyempo. Ang una gid nga nabanhaw hay si Kristo. Pagkatapos pagbalik niya, mabuhì da liwat ang iya mga gingpilì. ²⁴ Kag pagkatapos magaabot ang katapusan. Duyaon niya ang tanan nga ginaharian, ginadumayahan, kag ginagahuman, kag itugyan niya ang paghaharì sa Dios nga Amay. ²⁵ Kay dapat magharì si Kristo hasta mapasukò ng Dios sa iya ang tanan niya nga kaaway.^{c 26} Ang katapusan gid nga kaaway nga duyaon hay ang kamatayon. ²⁷ Nakasulat sa Kasulatan nga gingpasakop ng Dios kay Kristo ang tanan nga butang.^d Pero siyempre bukon ini gusto hambayon nga patì ang Dios nga nagpasakop ng tanan kay Kristo hay kaibahan da. ²⁸ Kundì kung ang tanan hay gingpasakop kay Kristo, si Kristo nga Ongà ng Dios hay magapasakop da sa Dios nga nagpasukò ng tanan sa iya, agud ang Dios imaw na ang magagahom sa tanan.

²⁹ Niyan may mga tawo nga nagapabawtismo para sa mga namatay. Dì ano ang puyos ng inda ginahuman kung indì lang da pagbuhion liwat ang mga patay? Basì nagapabawtismo pa sinda para sa mga namatay? ³⁰ Kag para sa amon, kung wayà ning pagkabuhì liwat, ano ang amon mabubuoy sa mga peligro nga amon naagihan? ³¹ Mga kauturan, kung pauno matuod nga ginaatubang ko kada adlaw ang peligro ng kamatayon, matuod da nga ginapahambog ko kamo tungod sa indo pakig-isa kay Kristo Hesus nga aton Ginoo. ³² Nahugaan gid ako diri sa Efeso, tungod nagakuntra sa akon ang mga tawo nga pareho sa mapintas nga mga sapat. Pero kung indì pagbuhion liwat ang mga namatay, wayà kuntà ako ning may mabuoy sa ini nga mga pag-antos ko sunò sa panirò ng tawo. Mas maayo pa nga sundon ta na lang ang hambayanon nga nagahambay, “Magkaon kag mag-inom hasta gusto naton, kay basì kung mamatay na kita buwas.”^{e 33} Indì kamo magpadayà sa tiyad inà nga mga ginahambay kay “kung magkinaibahan kamo sa mga malain nga tawo, magapalain ini sa indo maayo nga batasan.” ³⁴ Maghunahunà na kamo ning tamà kag bayai na nindo ang pagpakasalà. Ginahambay ko ini sa indo agud mapahuyà kamo, kay ang iban sa indo hay wayà gid nakakilaya sa Dios.

³⁵ Niyan kung igwa ning magpangutana kung pauno buhion liwat ang mga patay kag kung ano nga klasi ng hitsura magakaigwa sinda. ³⁶ Kalukuhan nga pangutana! Yari ang akon sabat sa inà nga tawo nga wayà gid ning may nasayuran: kung magtanom kita ning isa ka binhì sa dutà, inà nga binhì hay malunot anay ang panit bago magtubò. ³⁷ Kag bisan ano nga binhì ang imo itanom, halimbawà ang binhì ng trigo o ang iban pa nga klasi ng mga binhì, ang korte ng binhì hay bukon pareho ng hitsura ng tanom pag nagatubò na ini. ³⁸ Pero ang korte ini hay gingtao ng Dios sunò sa iya kabubut-on, kag kada binhì hay may iba-iba nga hitsura kung magtubò.

³⁹ Imaw da ang lawas ng tanan nga may kabuhì, kay ang mga lawas hay wayà da nagaparepareho. Iba ang lawas ng mga tawo kag iba da ang lawas ng mga hayop, iba ang lawas ng mga pispis, kag iba da ang lawas ng mga isdà.

⁴⁰ Iba-iba ang ginghuman ng Dios diri sa dutà kag didto sa langit, kag ang tanan nga iya ginghuman hay kaayo-ayo. Pero ang kaayo ng mga butang nga yadto sa langit hay iba kaysa kaayo kaysa mga butang diri sa dutà. ⁴¹ Iba ang kaayo ng adlaw, kag iba da ang kayo ng bulan. Ang mga bituon hay may iba da nga kaayo. Kag bisan pa nganì ang mga bituon hay iba-iba ang inda kaayo.

⁴² Imaw da kung buhion na liwat ang mga namatay. Ang ginalubong nga lawas hay malunot, pero kung mabuhì na liwat, indì na gid ini malunot hasta san-o. ⁴³ Ang ginalubong nga lawas malaw-ay siruon kag maluya, pero kung buhion na liwat, ini hay kaayo-ayo kag makusog. ⁴⁴ Ang ginalubong nga lawas hay dutan-on, pero kung buhion na liwat, ini hay maging langitnon nga lawas. Kay kung may dutan-on nga lawas, may langitnon da nga lawas. ⁴⁵ Kay nakasulat sa Kasulatan, “Ang una nga tawo nga si Adan hay gingtaw-an ning kabuhì.”^f Pero ang ulihi nga Adan nga imaw si Kristo hay naging espiritu nga nagatao ning kabuhì. ⁴⁶ Bukon ang langitnon nga lawas ang una nga gingtao sa aton kundì ang dutan-on nga lawas, kag pagkatapos ang langitnon nga lawas. ⁴⁷ Ang una nga tawo nga si Adan hay dutan-on. Ginghuman siya halin sa dutà. Pero ang ikaduha nga tawo nga imaw si Kristo hay halin sa langit. ⁴⁸ Ang mga lawas nga dutan-on hay pareho gid sa lawas ng tawo nga ginghuman halin sa dutà; pero ang mga lawas nga langitnon hay pareho gid sa lawas ng tawo nga halin sa langit. ⁴⁹ Nganì kung pauno nga ang aton lawas hay pareho kay Adan nga halin sa dutà, magaabot gid ang adlaw nga ang aton lawas hay maging pareho da kay Kristo nga halin sa langit.

⁵⁰ Mga kauturan, ang gusto ko hambayon imaw ini: ining aton lawas nga dutan-on hay indì makapanublì sa gingharian ng Dios. Ining lawas nga malunot hay indì makapanublì ng langit nga indì maduduyà kag wayà katapusan.

⁵¹ Pamatì kamo kay balitaan ko kamo ng ining kamatuuran nga wayà gingpasayod nang una: indì kita tanan mamatay, pero bag-uhon ng Dios ang aton lawas tanan. ⁵² Ini hay gulpi lang matabò, sa isa lang ka pisok ng mata. Pagtunog nang ulihi gid nga trumpeta, buhion nga daan liwat ang mga namatay kag taw-an ning lawas nga indì na malunot. Kag kita nga buhì pa hay bag-uhon da ang aton mga lawas. ⁵³ Kay ini nga lawas nga malulunot kag mamamatay hay kahinangyan bayluhan ng lawas nga indì na malunot kag indì na mamatay. ⁵⁴ Nganì kung ini nga lawas nga malunot kag mamatay hay mabayluhan na ng indì malunot kag indì mamatay, matutuman na ang nakasulat sa Kasulatan,

⁵⁸ Nganì, mga pinalanggà ko nga kauturan kay Kristo, magpakalig-on kamo kag indì gid magduhaduha sa indo pagtuo. Magpakahugod kamo sa ginapahuman sa indo ng Ginoo, kay nasayuran nindo nga may puyos gid ang indo mga pagpangabudlay para sa Ginoo.