13
Ang Pangkatapusan nga mga Laygay kag mga Bilin
1 Imaw na ini ang akon magiging ika-tuyo nga pagkarà dirà sa indo. Nakasulat sa Kasulatan,
“Ang akusasyon hay dapat mapamatuuran ng duha o tuyo ka testigo.”a
2 Niyan, abir wayà ako dirà sa indo, gusto ko nga paandaman liwat ang mga nakasalà nang una, kag patì da ang tanan, nga ang mga butang nga akon ginghambay nang ikaduha ko nga pagkarà dirà. Pag-abot ko liwat dirà, wayà gid ning may makalikaw sa akon pagdisiplina. 3 Himuon ko ini agud pamatuuran sa indo nga si Kristo ang nagahambay paagi sa akon, kay imaw da ini ang indo ginapangità. Bukon siya maluya sa iya pagpanghikot sa indo kundì siya hay makagagahom sa indo. 4 Sa matuod lang, ginglangsang si Kristo sa krus kay gingpakababà niya ang iya kaugalingon, pero niyan buhì siya tungod sa gahom ng Dios. Kag tungod nakipag-isa kami kay Kristo, nagapakababà kami sa amon kaugalingon pareho sa iya. Pero kung sa amon pagpanghikot sa indo, makità nindo nga ang gahom ng Dios hay yari da sa amon kay siya hay kaibahan namon.
5 Usisaa nindo ang indo kaugalingon kung may pagtuo gid kamo kay Kristo. Tistinga nindo! Dì ba nasayuran nindo nga si Hesu-Kristo hay nagaistar sa indo? Puyra lang kung wayà kamo ning matuod nga pagtuo. 6 Nagasalig ako nga makità nindo nga kami hay matuod gid nga mga apostol ni Kristo. 7 Nagapangamuyò kami sa Dios nga indì kamo maghuman ning abir ano nga malain. Ginahuman namon ini bukon kay gusto namon nga pamatuuran sa indo nga kami hay matuod gid nga mga apostol. Pero gusto lang namon maghuman kamo ning maayo, bisan indì nindo kami pagkilayahon nga mga apostol ni Kristo. 8 Kay indì kami makahuman ng abir ano nga kuntra sa kamatuuran, kundì ang para lang gid sa kamatuuran. 9 Nagakalipay kami kay sa pagpakababà namon ng amon kaugalingon hay naging malig-on kamo sa indo pagtuo. Ang amon ginapangamuyò hay maging tadlong ang indo pagkabuhì. 10 Ginasulat ko ini sa indo mintras wayà pa ako dirà, agud sa pag-abot ko, indì na ako mapilitan nga maggamit ng akon otoridad paagi sa masakit nga mga hambay. Kay gingtao sa akon ng Ginoo ang otoridad nga ini para palig-unon kamo, kag indì para siraon.
Ang Pangkatapusan nga Pagpangamusta
11 Hasta diri na lang ang akon sulat sa indo. Bilang katapusan, mga kauturan, magkalipay kamo, tadlungon nindo ang indo pagkabuhì, sunda nindo ang akon mga laygay, magkaisa kamo, kag dapat maayo ang indo relasyon sa isa kag isa. Kag kung humanon nindo ini, ang Dios nga ginahalinan ng paghigugmà kag katawhayan ang magaiba sa indo.
12 Magkamustahanan kamo bilang kauturan nga may matuod nga paghigugmà.b Ang tanan nga mga banal nga tawo ng Dios diri hay nagapangamusta sa indo.
13 Kabay pa nga magkaigwa kamo ng tanan nga pagpakamaayo ng aton Ginoo nga Hesu-Kristo, ng paghigugmà ng Dios, kag ng pakig-isa ng Espiritu Santo.