¹ Sayod ko nga wayà ning puyos ang akon pagpinahambog, pero napipilitan ako. Niyan ang ihahambay ko sa indo hay ang mga butang nga gingpakità kag gingpasayod ng Ginoo sa akon. ^2-3 Nagatuo na ako kay Kristo nang matabò ini sa akon kag 14 na ka tuig ang nakaligad. Gingdaya ako paibabaw sa ika-tuyo nga langit,^a sa Paraiso. Ilam lang kung ang akon lawas yadto gid o ang espiritu ko lang. Ang Dios lang gid ang nakakasayod. ⁴ Nakaabot ako sa paraiso kag nabatian ko ang mga butang nga indì makakaya nga ihambay kag indì dapat ibalità sa mga tawo. ⁵ Adtong akon naagihan hay imaw ang akon ipakadakò. Pero kung parti sa akon kaugalingon, indì ako magpakadakò puyra lang kung parti sa akon mga kaluyahon. ⁶ Kung sa bagay, kung magpahambog gida ako, indì ako magiging buang-buang kay magabalità gid ako ning matuod. Pero malikawan ko nga ginapakadakò kay basì kung magsubra ang pagtan-aw ng abir sin-o sa akon. Gusto ko nga ang inda pagtan-aw sa akon hay sunò lang sa inda nakità kag nabatian sa akon.

⁷ Pero agud indì ako magpahambog ning subra tungod sa makatitingaya nga mga gingpasayod ng Dios sa akon, ang iya ginghuman hay gingtugutan niya nga taw-an ako ning deperensya sa akon lawas. Gingpabay-an lang niya nga paantuson ako ng mensahiro ni Satanas sa ining akon deperensya, agud indì ako magpakadakò. ⁸ Tuyo gid ka beses nga gingpangayò ko sa Ginoo nga buy-on niya ini sa akon. ⁹ Pero wayà niya pagbuy-a. Kundì ang hambay niya, “Ang akon bulig hay igò para sa imo agud makatiis ka sa imo kahugaan. Kay makikità ning tudo ang akon gahom kung maluya ka.” Nganì malipayon gid ako sa pagpahambog parti sa akon mga kaluyahon, agud mabatyagan ko permi ang gahom ni Kristo sa akon. ¹⁰ Nganì malipayon ako sa akon mga kaluyahon, sa mga pag-insulto sa akon, sa mga kahugaan, sa mga pagpasakit kag sa mga kasakit tungod sa akon pagsunod kay Kristo. Kay kada ako maluya, ginapakusog ako ng Dios.

¹¹ Ako hay daw sa buang-buang sa pagpinahambog, pero kamo mismo ang nagpilit sa akon nga magpahambog. Kamo kuntà ang dapat magdayaw sa akon, pero wayà nindo ako pagdayawa. Abir nasayuran ko nga sa akon kaugalingon wayà ako ning may ipakadakò, bukon ako ulihi sa mga nagahambay nga sinda gid ang pinakamaayo nga mga apostol. ¹² Nang yarà ako sa indo, padayon ang akon paghuman ng mga milagro, makatitingaya nga mga butang kag pambihirà nga gahom, abir pa nga may mga pagtiis nga nag-abot sa akon. Kag ini hay nagapamatuod nga matuod gid ako nga apostol. ¹³ Ang akon ginghuman dirà sa indo hay pareho da sa akon ginahuman sa iban nga mga nagatuo, puyra lang nga wayà ako nagpabug-at sa indo paagi sa pagpangayò ng indo bulig sa akon. Kung sa inà nga butang nakasalà ako sa indo, patawara lang nindo ako!

¹⁴ Niyan preparado na ako nga magkarà dirà sa indo kag ini na ang magiging ika-tuyo ka beses. Indì gihapon ako magpangayò ng bulig sa indo, kay bukon da ang indo pagkabutang ang akon ginapangità kundì kamo mismo. Kay daw mga ongà ko kamo, kag dì ba ang mga ongà hay wayà nagasuporta para sa inda mga ginikanan kundì ang mga ginikanan imaw ang nagasuporta para sa inda mga ongà? ¹⁵ Sa matuod lang, malipayon pa nganì ako kung makatao ako ng tanan para sa indo. Basì nga bisan dakò ang akon pagpalanggà sa indo, kaisot lang gid ang indo pagpalanggà sa akon?

¹⁶ Kamo mismo hay nakakasayod nga wayà ako nagpabug-at sa indo. Pero basì may maghambay sa indo nga miyugpangluko ako kag gingluko ko kamo. ¹⁷ Pero pauno? Nasayuran da nindo nga wayà ko kamo pagdayaa paagi sa abir kanin-o nga akon gingsugò dirà. ¹⁸ Gingpangabay ko da si Tito nga magkarà dirà kag gingpanunot ko da sa iya ang isa pa gid ka utod kay Kristo. Nagpanguwarta ba si Tito sa indo? Indì puydi nga lukuhon niya kamo kay nakità da nindo nga pareho ang amon pagkabuhì kag katuyuan.

¹⁹ Basì kung madugay na ang indo ginaisip nga wayà kami ning iban nga ginahuman kundì ang pagdepensa lang ng amon kaugalingon sa indo. Mga pinalanggà, kami nga nagpakig-isa kay Kristo hay nagahambay sa indo sa atubangan ng Dios nga wayà kami ning iban nga katuyuan sa tanan nga amon ginahambay kundì ang pagpalig-on ng indo pagtuo. ²⁰ Nababayaka ako, kay basì kung pag-abot ko dirà, makità ko nga ang indo ginahuman hay iba kaysa sa akon ginaasahan sa indo. Kag kung inà ang matabò, makità da nindo nga iba da ako kaysa sa indo ginaasahan sa akon. Nababayaka ako, kay basì kung maabutan ko kamo nga nagainaway, nagainilihan, nagahinangitan, nagahandom lang para sa indo kaugalingon, nagahambay ning malain kuntra sa iban, nagatsinismis, nagapinahambog, kag nagaginulo. ²¹ Nababayaka da ako, kay basì kung pag-abot ko dirà, mapahuyà naman ako ng akon Dios tungod sa indo. Kag basì kung magakalisod lang ako kay madamò sa indo ang nagpakasalà nang una, kag hasta niyan wayà pa nagtalikod sa inda mga mahigkò nga ginghuman pareho ng imoral nga pakipag-relasyon kag pagusto sa paghuman ng kalainan.