Ang Sulat ni Pablo sa mga
Taga-Galacia
Ang Pang-una nga Hambay
A. Ang Nagsulat kag ang Lugar ng Galacia
Ang nagsulat ng ini nga libro hay si Pablo, para sa mga Kristyano sa probinsya ng Galacia nga sakop ng Roma. Niyan ini nga lugar hay parte ng nasyon sa Turkey. Gingsulat niya ini mga A.D. 49.
B. Ang Pagwali ng Ebanghelyo sa Galacia
Ang mga Judio hay kadamò sa siyudad ng Iconio. Sa pagwali ni Pablo sa sinagoga, madamò ang mga bukon Judio nga naging Kristyano, pero madamò da ang mga Judio nga nagakuntra sa Maayo nga Balità nga ginatudlò niya.
Sa Listra kag sa Derbe nga sakop ng probinsya ng Galacia hay kadamò ang mga bukon Judio kung sa diin ang mga dios-diosan ng Roma ang inda ginasamba. (Ginghuman 14:1-20)
K. Ang Rason ng Pagsulat ni Pablo sa taga-Galacia
Nagsulat si Pablo sa mga nagatuo sa Galacia para sabyawon ang mga nagpati kag nagsunod sa salà nga pagpanudlò. Kay may pila nga mga Judio nga maimpluwensiya ang naging Kristyano kag ginapaobliga ninda nga ang mga bukon Judio nga nagatuo hay kahinangyan magpapaltak kag magsunod sa mga layi kag mga seremonya ng Judio agud maging matuod nga Kristyano.
Ginatinguhà ni Pablo nga kumbensihon ang tanan nga Kristyano sa Galacia nga indì magsunod sa salà nga pagpanudlò kag magbalik sa matuod nga mensahe ng Maayo nga Balità. (1:6-7)
Sa ini nga sulat, ginaisplikar niya nga ang kaluwasan hay mababaton lang paagi sa kaluoy ng Ginoo kag ang pagkamatarong hay bukon paagi sa pagsunod sa mga Kasuguan kundì paagi sa pagtuo kay Hesu-Kristo.
Ang mga Suyod
I. Ang Pagpangamusta (1:1-5)
II. Ang Pagdepinsa ni Pablo sa iya paka-Apostol (1:6-2:21)
III. Ang Pag-isplikar ni Pablo parti sa Kasuguan kag sa Kaluoy ng Dios (3:1-4:31)
IV. Ang Kahilwayan kag Responsibilidad ng Kristyano (5:1-6:10)
V. Ang Pang-ulihi nga Paandam kag ang Pangkatapusan nga Hambay (6:11-18)