¹ Pagkaligad ng 14 ka tuig, nagbalik ako liwat sa Jerusalem. Kaibahan ko si Bernabe kag gingdaya ko da si Tito. ² Nagtukad ako kay gingpasayod sa akon ng Dios nga kahinangyan magbalik ako didto. Nagpakigkità ako sa mga ginakilaya nga miyugdumaya ng mga nagatuo kay Kristo. Nang kami na lang, ging-isplikar ko sa inda ang Maayo nga Balità nga akon ginawali sa mga bukon Judio. Ginghuman ko adto kay indì ko gusto nga ang akon pagpangabudlay tunà nang una hasta arinyan hay mawad-an ning puyos. ³ Kag kumpormi sinda sa akon ginawali, nganì abir si Tito nga Griego nga akon kaibahan hay wayà ninda pagpilita nga magpapaltak.^{a 4} Pero may iban nga nakasuyod sa aton grupo nga wayà madiparahi, sinda hay nagapakuno-kuno nga mga kauturan agud obserbahan ang aton kahilwayan paagi kay Kristo Hesus. Kay gusto ninda nga ulipunon kita sa idayom ng Kasuguan ni Moises. ⁵ Wayà gid kami nagsugot sa inda gusto abir maisot lang nga oras, agud madahanan namon nga indì mahaluan ning salà nga pagpanudlò ang Maayo nga Balità para sa indo.

⁶ Ang mga ginakilaya nga miyugdumaya ng mga nagatuo sa Jerusalem hay wayà gid ning may gingdugang sa akon ginatudlò. (Abir miyugdumaya pa sinda, wayà ning ano man sa akon kay sa Dios kami hay pare-pareho lang.) ⁷ Kundì, nasayuran ninda nga ako ang gingtugyanan ng Dios agud magtudlò ng Maayo nga Balità sa mga bukon Judio, pareho kay Pedro^b nga gingtugyanan nga magtudlò sa mga Judio. ⁸ Kay ang Dios nga nagpilì kay Pedro^c nga maging apostol para sa mga Judio, imaw da ang nagpilì sa akon nga maging apostol para sa mga bukon Judio. ⁹ Nasayuran ng ginakilaya nga mga miydgdumaya ng mga nagatuo nga sina Jacobos,^d Pedro^e kag Juan nga ang Dios imaw ang nagtao sa akon ini nga responsibilidad. Nganì ginglamano ninda kami bilang tandà nga gingbaton ninda kami ni Bernabe bilang kaibahan sa pagtudlò ng Maayo nga Balità. Kag amon gingkasugtanan nga kami ni Bernabe hay magawali sa mga bukon Judio kag sinda naman sa mga Judio. ¹⁰ Ang inda lang gingpangabay sa amon hay buligan ang mga pubre nga nagatuo sa Jerusalem, nga imaw gida ang akon ginatinguhà nga humanon.

¹¹ Niyan, nang nagbisita si Pedro sa Antioquia, gingprangka ko siya kay salà ang iya ginghuman. ¹² Kay nang wayà pa makaabot ang mga tawo nga gingsugò ni Jacobos sa Antioquia, nagakaon si Pedro kaibahan ng mga nagatuo nga bukon Judio. Pero pag-abot ng mga gingsugò, nagpalayò siya kag nagbuyag sa mga bukon Judio kay nahadlok siya sa grupo ng mga Judio nga nagapangpilit sa pagsunod sa layi ng pagpaltak para maluwas. ¹³ Kag kaibahan da niya ang iban nga mga Judio nga nagatuo kay Kristo, patì si Bernabe hay nagsunod kay Pedro, abir sayod ninda nga bukon tamà ang inda ginghuman nga pagpakuno-kuno. ¹⁴ Nang makità ko nga ang inda ginahuman hay bukon tamà sunò sa kamatuuran ng Maayo nga Balità, ginghambayan ko si Pedro sa atubangan ninda tanan, “Kung ikaw nga Judio hay nagakabuhì pareho sa bukon Judio kung sa diin ginabaliwayà mo ang mga kaugalian ng Judio, pauno mo mapilit ang mga bukon Judio nga magkabuhì pareho ng mga Judio?”^f

¹⁵ Abir kami hay ging-ongà nga mga Judio kag bukon mga Hentil nga mga makasasalà, ¹⁶ sayod namon nga ang tawo hay ginadiklara nga matarong sa panirò ng Dios paagi sa pagtuo kay Hesu-Kristo kag bukon sa pagsunod sa Kasuguan ni Moises. Nganì kami da nga mga Judio nga nagtuo kay Kristo Hesus hay gingdiklara kami nga matarong na sa panirò ng Dios paagi sa pagtuo kay Kristo kag bukon paagi sa pagsunod sa Kasuguan. Kay wayà ning bisan sin-o nga ididiklara nga matarong sa panirò ng Dios paagi sa pagsunod sa Kasuguan. ¹⁷ Kung sa amon pagtinguhà hay ginadiklara kami nga matarong sa panirò ng Dios paagi sa amon pakig-isa kay Kristo kag ang kinaluwasan hay makasal-anan gihapon kami, ang gusto ba hambayon si Kristo ang nagahuman ning paagi para kami magkasalà? Syempre bukon! ¹⁸ Niyan kung balikan ko pa liwat ang pagtuman sa Kasuguan nga akon gingtalikuran, ako na ang nagapamatuod nga ako hay masinuwayon. ¹⁹ Nganì bukon na ako obligado nga magsunod sa Kasuguan. Daw pareho na ako ni Kristo nga ginglangsang sa krus, agud magkabuhì ako sunò sa kabubut-on ng Dios.

²⁰ Mintras ako hay buhì pa, bukon na ako ang nagakabuhì kundì si Kristo ang nagakabuhì sa akon. Niyan mintras ako hay buhì sa ini nga lawas, nagakabuhì ako nga nagatuo sa Ongà ng Dios nga naghigugmà sa akon kag naghalad ng iya kabuhì para sa akon. ²¹ Indì ko gusto nga ibaliwayà ang kaluoy ng Dios. Kay kung ang pagtuman sa Kasuguan imaw ang paagi para madiklara nga matarong, wayà na ning puyos ang pagkamatay ni Kristo.