Ang Sulat ni Pablo sa mga
Taga-Efeso
Ang Pang-una nga Hambay
A. Ang Lugar Kag Ang Rehihiyon Sa Efeso
Ang Efeso hay pinakaimportant nga siyudad ng Roma sa probinsya ng Asya.a Ini hay sentro nga lugar ng negusyo kag ng relihiyon.
Sa Efeso makikità ang templo nga ginghuman para sa dios-diosan nga si Diana (Ginghuman 19:27). Ini hay isa sa mga kaayo-ayo nga templo nang una sa bilog nga kalibutan.
B. Ang Pagwali Ng Maayo Nga Balità Sa Efeso
Pag-abot ni Pablo sa Efeso, may mga nagatuo na didto. Nag-istar siya didto kag nagwali ning subra duha ka tuig (Ginghuman 19:1-20:1).
Paagi sa iya pagwali, kadamò ang mga madyikero nga nagtuo, nganì gingdaya ninda ang inda mga libreta kag gingsunog nga nakikità ng tanan (Ginghuman 19:19).
K. Ang mga Palatandaan Ng Ini Nga Libro
Gingsulat ini ni Pablo para sa mga nagatuo sa Efeso mintras siya nakakulong (3:1, 4:1, 6:20) sa lugar ng Roma nang mga tuig AD 60-61. Ini nga sulat hay gingpadaya niya kay Tiquico sa mga taga-Efeso. (6:21-22).
Madamò ka beses sa ini nga sulat hay parti sa pakipag-isa naton kay Kristo kag sa tanan nga mga kaayo-ayo nga binipisyo nga gingtao ng Dios sa abir sin-o nga nagtuo kay Kristo. Gingsulat da ni Pablo ang pila ka mga butang nga indì makità. Kaibahan diri adtong mga natabò bukon lang sa pinakamataas nga langit kung sa diin nagaistar ang Dios, kundì kaibahan da ang sa ibabaw kung sa diin yadto ang tanan nga klasi ng espiritu patì ang mga espiritu nga sakop ni Satanas.
Sa kapitulo uno hasta tres, gingtudlò ni Pablo nga mahuhuman lang ang plano ng Dios paagi kay Kristo. Paagi kay Kristo, gingluwas ng Dios ang mga Judio kag mga bukon Judio kag ging-isa sinda bilang isa ka lawas, nga imaw ang mga nagatuo sa iya. Kag sa ini nga mga kapitulo, mababasa ang duha nga kaayo-ayo nga pangamuyò ni Pablo para sa mga nagatuo didto.
Sa kapitulo kuwatro hasta sais, gingtaw-an ning importansya ni Pablo ang pagkakaisa ng mga nagatuo, kag gingtudlò da niya kung pauno ang pagkabuhì ng mga Kristyano, kag gingpadum-dom da niya sa mga nagatuo nga dapat ninda gamiton ang tanan nga armas kag pangprotekta nga gingtao ng Dios agud maperdi si Satanas.
Naggamit si Pablo ning tuyo nga bagay para ipakità ang pagkakaisa ni Kristo kag ng mga Nagatuo sa iya:
a. Ang mga Nagatuo hay pareho ng lawas kag si Kristo ang uyo. (1:23)
b. Ang mga Nagatuo hay pareho ng templo kag si Kristo ang pundasyon. (2:21-22)
k. Ang mga Nagatuo hay pareho ng babayi kag si Kristo ang iya asawa. (5:25-32)
Ang mga Suyod
I. Ang Pagpangamusta (1:1-2)
II. Ang mga Espiritwal nga Pagpakamaayo Paagi kay Kristo (1:3-23)
III. Ang Pagluwas ng Dios sa mga Judio kag mga bukon Judio nga Nagtuo kag Ang Pag-isa sa inda (2:1-3:13)
IV. Ang Pangamuyò ni Pablo sa mga Nagatuo (3:14-21)
V. Ang Tamà nga Pagkabuhì ng mga Kristyano (4:1-6:9)
VI. Ang Pagpanudlò ni Pablo kung Pauno Batuan si Satanas (6:10-20)
VII. Ang Bendisyon ni Pablo sa mga Nagatuo (6:21-24)