¹ Ako si Pablo nga gingpilì nga apostol,^a bukon paagi sa mga tawo o sa otoridad ng abir sin-o, kundì paagi kay Hesu-Kristo kag sa Dios nga Amay nga nagbuhì liwat sa iya halin sa kamatayon.

² Ang tanan nga mga kauturan kay Kristo diri nga kaibahan ko hay nagapangamusta sa mga nagatuo dirà sa probinsya ng Galacia.

³ Kabay pa nga mabaton nindo ang grasya kag katawhayan nga halin sa Dios nga aton Amay kag sa Ginoong Hesu-Kristo.

⁴ Gingsakripisyo ni Hesu-Kristo ang iya kabuhì tungod sa aton mga kasal-anan, agud tabangan kita sa kalainan nga nagagahom sa ini nga tiyempo sa kalibutan. Ginghuman niya ini sunò sa kabubut-on ng Dios nga aton Amay. ⁵ Sa Dios ang pagdayaw hasta sa wayà katapusan! Kabay pa!

⁶ Natingaya gid ako nga kadalì kamo nga nagtalikod sa Dios nga nagpilì sa indo paagi sa kaluoy ni Kristo, kag nagapati kamo sa iban nga maayo kuno nga balità. ⁷ Ang matuod hay wayà na ning iban nga maayo nga balità. Pero may mga tawo dirà nga nagapagulo ng indo isip kag ang gusto ninda hay ilisan ang Maayo nga Balità parti kay Kristo. ⁸ Pero abir kami o ang anghel halin sa langit ang magwali ning iba kaysa sa Maayo nga Balità nga amon gingwali sa indo nang una, sumpaon gid siya ng Dios! ⁹ Pareho ng amon ginghambay dati kag niyan ginahambay ko liwat, “Ang abir sin-o ang magwali sa indo ng maayo nga balità nga iba kaysa sa indo gingbaton, sumpaon gid siya ng Dios!”

¹⁰ Niyan, nagahandom ba ako ning pagdayaw ng mga tawo? Wayà! Ang ginatinguhà ko hay ang pagdayaw ng Dios! Kung ang ginapalipay ko hay ang mga tawo, bukon na ako matuod nga ulipon ni Kristo.

¹¹ Mga kauturan, gusto ko nga masayuran nindo nga ang Maayo nga Balità nga gingwali ko sa indo hay bukon humanhuman ng tawo. ¹² Kay wayà ko ini nabaton halin sa tawo, o gingtudlò sa akon ng tawo, kundì si Hesu-Kristo ang nagpasayod ini sa akon.

¹³ Nabatian na nindo ang akon gingpanghuman nang ako hay nagasunod pa sa relihiyon ng Judio. Wayà gid ning kaluoy nga gingpasakitan ko ang mga nagatuo sa Dios kag gingtinguhà ko nga siraon sinda. ¹⁴ Subra ako ka dibuto kaysa madamò nga mga kaedad ko nga Judio. Gingtinguhà ko gid nga tumanon ang mga tradisyon ng amon mga kalulo-lulohan.

¹⁵ Pero paagi sa kaluoy ng Dios, nalipay siya sa pagpilì sa akon bago pa ako ging-ongà. Kag gingtawag niya ako para magserbisyo sa iya. ¹⁶ Nang gingpakilaya niya ang iya Ongà nga si Hesus sa akon agud iwali ko ang Maayo nga Balità sa mga bukon Judio, wayà gid ako nagpangutana abir kanin-o. ¹⁷ Wayà da ako nagkadto sa Jerusalem para magpakigkità sa mga apostol nga nauna sa akon. Kundì nagkadto ako sa Arabia kag pagkatapos nagbalik ako sa Damasco. ¹⁸ Pagkatapos nang tuyo ka tuig, nagkadto ako sa Jerusalem agud magpakigkità kay Pedro^b kag nagtinir ako didto ning kinse ka adlaw. ¹⁹ Wayà ko makità ang iban nga apostol puyra lang kay Jacobos^c nga manghod ng Ginoo.

²⁰ Niyan matuod ang tanan nga akon gingsulat, kag nasayuran ng Dios nga wayà ako nagapinusong.

²¹ Pagkatapos, nagkadto ako sa probinsya ng Siria kag Cilicia. ²² Pero nang adto nga tiyempo, wayà pa ako makilaya ng mga nagatuo kay Kristo sa Judea. ²³ Nabalitaan na lang ninda nga ang dati anay nga nagapasakit ning subra sa inda, niyan hay nagawali na ng parti sa pagtuo nga dati iya ginatinguhà nga siraon. ²⁴ Nganì gingdayaw ninda ang Dios tungod sa ginghuman niya sa akon.