¹ Mga kauturan, kung may makità kamo nga kaibahan nindo nga nagahuman ning kasal-anan, kamo nga nagakabuhì sunò sa Espiritu ang magbulig sa iya agud mapabalik siya sa tamà nga pagkabuhì, pero sa maayo nga paagi. Kag mag-andam kamo kay basì kung kamo naman ang makasalà. ² Magbinuligan kamo sa indo mga kahugaan. Kung indo ini humanon, ginasunod nindo ang kasuguan ni Kristo.^{a 3} Kung igwa sa indo ning nagahunahunà nga siya hay importante, pero bukon da galì, ginaluko lang niya ang iya sarili.

⁴ Nganì kahinangyan ang kada isa hay mag-usisà sa iya sarili. Kung ang iya ginahuman hay tamà, dapat malipay na lang siya, kag indì na kahinangyan ikumpara ang iya sarili sa iban. ⁵ Kay manabat sa Dios ang kada isa sunò sa iya ginghuman.

⁶ Ang nagatudlò ng hambay ng Dios hay kahinangyan partehan ng ginatudluan ng tanan nga maayo nga bagay.

⁷ Ayaw nindo paglukuha ang indo sarili, ang Dios hay indì puydi madayà abir nin-o. Kay kung ano ang ginatanom ng tawo, imaw da ang iya anihon. ⁸ Ang nagatinguhà nga magkabuhì sa lawasnon nga kinaugalì hay makakabaton ning kamatayon. Pero ang nagatinguhà nga magkabuhì sa Espiritu hay makakabaton ning kabuhì nga wayà katapusan. ⁹ Nganì, indì kita pagtak-an sa paghuman ning maayo kay pag-abot nang tamà nga oras, makakabaton gid kita ning maayo kung indì kita magpara. ¹⁰ Nganì kung igwa ning opurtunidad nga makahuman ning maayo sa tanan nga tawo, labi na gid sa mga kauturan sa pagtuo, dapat naton ini humanon.

¹¹ Mahahalatà nindo nga madagkò ang litra ng ini nga sulat, ako mismo ang nagsulat ini. ¹² Ang mga tawo nga nagapangpilit sa indo nga magpapaltak hay gusto lang magpakità nga sinda hay mas maayo kay nagasunod sinda sa seremonya. Ang rason hay ginahadlukan sinda nga pasakitan kung itudlò ninda nga ang kahilwayan hay paagi lang sa kamatayon ni Kristo. ¹³ Kay abir nganì sinda mismo nga nagpapaltak hay wayà nagasunod sa Kasuguan. Gusto lang ninda nga kamo hay ipapaltak agud may maipahambog sinda nga kamo hay nagasunod sa inda seremonya.

¹⁴ Para sa akon, wayà ako ning iban nga puydi ipahambog kundì ang krus kung sa diin namatay ang aton Ginoong Hesu-Kristo. Tungod sa iya kamatayon, ang mga bagay parti sa relihiyon nga ginabilang nga importante ng mga tawo hay wayà na ning puyos sa akon kag imaw da ako sa ini nga mga bagay.^{b 15} Bukon importante kung ang tawo hay paltak o bukon. Pero ang importante sa tawo hay ang bag-o nga kabuhì halin sa Dios. ¹⁶ Sa tanan nga nagatuman sa ini nga pagpanudlò kag sa Israelita nga gingpilì ng Dios, kabay pa nga mabaton nindo ang katawhayan kag kaluoy.

¹⁷ Nganì tunà niyan, wayà na ning abir sin-o dirà sa indo nga manggulo sa akon paagi sa salà nga pagpanudlò. Kay ang mga pinalian ng pilas sa akon lawas hay tandà nga ginatudlò ko ang kamatuuran parti kay Kristo.

¹⁸ Mga kauturan, kabay pa nga ang grasya ng aton Ginoong Hesu-Kristo hay magpakusog sa indo tagipusuon. Kabay pa!