¹ Ginghilway na kita ni Kristo para magkaigwa ning matuod nga kahilwayan, nganì magpakatibay kita kag indì na magpaulipon liwat sa Kasuguan.

² Tandai nindo, ako mismo ang nagahambay ini: Ang abir sin-o nga gusto magpapaltak para masunod ang Kasuguan, indì gid niya mababaton ang mga espiritwal nga binipisyo halin kay Kristo. ³ Ginahambay ko liwat, kung ginatinguhà ng abir sin-o sa indo nga magpapaltak, obligado siya nga sundon ang tanan nga Kasuguan. ⁴ Ang nagatinguhà para idiklara ng Dios nga matarong paagi sa pagsunod sa Kasuguan, gingbaliwayà na niya ang iya relasyon kay Kristo kag indì na siya angay magbaton ng kaluoy ng Dios nga makaluwas sa iya.

⁵ Pero kita, paagi sa bulig ng Espiritu Santo kag sa aton pagtuo kay Kristo hay nagahuyat gid kag nagalaom nga ididiklara kita nga matarong. ⁶ Kay kita nga nagpakig-isa kay Kristo Hesus hay bukon na importante kung paltak o bukon, kundì ang pagtuo nga nakikità paagi sa paghigugmà sa isa kag isa.

⁷ Maayo na kuntà ang indo ginghuman nang una. Sin-o ang nagharang sa indo, nganì indì na kamo magsunod sa kamatuuran? ⁸ Ini nga pagkakumbensi sa indo hay bukon halin sa Dios nga imaw ang nag-agda sa indo para magkaigwa ning kahilwayan. ⁹ Mag-andam kamo, abir may isa lang ka tawo nga malain sa indo, maaapiktuhan ang tanan nga maging malain, pareho sa maisot nga pangpaalsa sa tinapay nga napapaalsa ang madakò nga arina. ¹⁰ Tungod sa indo pakig-isa sa Ginoo, sigurado gid ako nga indì kamo magpati sa iban nga pagpanudlò. Pero pagaparusahan ng Dios ang abir sin-o dirà nga nagapanggulo sa indo.

¹¹ Pero para sa akon, mga kauturan, kung ginatudlò ko gihapon nga kahinangyan ang pagpaltak, basì nakakaagi pa ako ning pasakit sa mga tawo? Kung imaw inà ang akon ginatudlò, wayà na kuntà may natitisod sa akon pagwali parti sa pagkamatay ni Kristo! ¹² Adtong mga tawo nga nagapanggulo sa indo pagtuo hay indì lang kuntà magpapaltak kundì magpautod na sinda!

¹³ Pero kamo mga kauturan, ging-agda kamo ng Dios nga maging hilway. Nganì ayaw nindo paggamita ang indo kahilwayan nga nabaton para maging kabangdanan agud sundon nindo ang gusto ng indo lawas. Kundì bilang ulipon ni Kristo, magserbisyo kamo nga may paghigugmà sa isa kag isa. ¹⁴ Kay ang tanan nga Kasuguan hay napinsan sa isa na lang nga sugò, ‘Higugmaa ang imo isigkatawo pareho ng imo kaugalingon.’^{a 15} Pero kung kamo hay nagainaway kag nagasinakitan sa isa kag isa pareho ng mga hayop, pag-andam! Basì kung ang kada isa sa indo hay masisirà ang pagtuo.

¹⁶ Ang akon gusto nga hambayon hay imaw ini: Magkabuhì kamo sunò sa bulig ng Espiritu, agud indì nindo mahuman ang ginahandom ng indo lawasnon nga kinaugalì. ¹⁷ Kay ang ginahandom ng lawasnon nga kinaugalì hay kuntra sa gusto ng Espiritu. Kag ang gusto ng Espritu hay kuntra sa lawasnon nga kinaugalì. Nganì ining duha hay nagakinuntrahan sa isa kag isa, nganì indì nindo mahuman ang mga bagay nga gusto nindo humanon. ¹⁸ Pero kung ang Espiritu ang indo sundon, bukon na kamo obligado sa pagsunod sa Kasuguan.

¹⁹ Niyan, ang mga ginahuman ng lawasnon nga kinaugalì hay imaw ini: ang pag-iba nga wayà pa makasay, pagbinastos, pag-inuyag, ²⁰ pagsamba sa mga dios-diosan, pagkababaylan, pagkahangit, pagpang-away sa isigkatawo, pagkaili, pagdumot, paghinakog, pag-iniyaiya, paggrinupo-grupo, ²¹ pagkasina, pagbinayong, pagkahilig sa kalibutanon nga kalipay, kag iban pa nga mga bagay nga tiyad ini. Ginapaandaman ko kamo pareho nang una. Ang abir sin-o nga nagahuman ng tiyad ini nga mga bagay indì gusto magharì ang Dios sa iya.

²² Pero ang bunga ng Espiritu hay imaw ini: mahigugmaon, malipayon, matawhay; mapasinsyahon sa isigkatawo, mabuot, maayo; matutom, ²³ madahan kag antigo magpugong ng kaugalingon. Wayà ning kasuguan nga puydi magkuntra sa mga tawo nga nagakabuhì sa tiyad ini nga mga kinaugalì.

²⁴ Gingpatay na ng abir sin-o nga may relasyon kay Kristo Hesus ang inda lawasnon nga kinaugalì, kaibahan ang subra nga mga hilig kag malain nga mga handom. ²⁵ Kung gingtao ng Espiritu ang bag-o nga kabuhì sa aton, kahinangyan magsunod kita sa iya. ²⁶ Indì kita magpahambog, magpinangbuysit kag magkaili sa isa kag isa.