¹ Ako si Pablo nga naging apostol^a ni Kristo Hesus paagi sa kabubut-on ng Dios. Nagapangamusta ako sa indo nga mga banal nga tawo ng Dios dirà sa siyudad ng Efeso kag mga nagatuo kay Kristo Hesus.

² Kabay pa nga mabaton nindo ang grasya kag katawhayan halin sa Dios nga aton Amay kag sa Ginoong Hesu-Kristo.

³ Dayawon ang Dios, nga imaw ang Dios ng aton Ginoong Hesu-Kristo kag iya da Amay. Tungod sa aton pakig-isa kay Kristo, gingtaw-an niya kita ng tanan nga espirituhanon nga pagpakamaayo nga halin sa kalangitan. ⁴ Nang wayà pa mahuman ang kalibutan, gingpilì na kita ng Dios paagi sa aton pakig-isa kay Kristo, agud maging malimpyo ang aton pagkatawo kag wayà ning kasawayan sa iya atubangan. Tungod sa paghigugmà ng Dios, ⁵ gingplano na niya nga daan nang una pa nga kita maging iya mga ongà paagi kay Hesu-Kristo. Ginghuman niya ini sunò sa iya kagustuhan kag kabubut-on, ⁶ agud madayaw ang Dios tungod sa iya makatitingaya nga pagpakamaayo nga gingtao sa aton paagi sa iya pinalanggà nga Ongà. ⁷ Tungod sa pagkamatay^b ni Kristo, natubos kita kag gingpatawad sa aton mga kasal-anan sunò sa iya subra-subra nga kaluoy ⁸ nga gingtao sa aton nga wayà gid ning limitasyon!

Gingtao da ng Dios sa aton ang tanan nga kamayad kag pang-intindi, ⁹ agud maintindihan naton ang iya kagustuhan nga wayà gingpasayod nang una nga iya paghumanon paagi kay Kristo sunò sa iya kabubut-on nga iya gingplano dati. ¹⁰ Kag imaw ini ang iya plano: Kung mag-abot na ang tamà nga oras, pagaisahon niya ang tanan sa dutà kag sa kalangitan sa idayom ng pagdumaya ni Kristo. ¹¹ Ang tanan nga natabò hay sunò sa plano kag kabubut-on ng Dios. Tungod sa iya kagustuhan nga iya gingplano nang una, gingpilì niya kami agud maging iya mga tawo paagi sa amon pakig-isa kay Kristo. ¹² Ginghuman ini niya agud madayaw ang mahimayaon nga Dios tugod sa amon nga una nga naglaom kay Kristo. ¹³ Kag kamo da, nang indo nabatian ang mensahe ng kamatuuran, ang Maayo nga Balità, nagtuo kamo kay Kristo nga nagtao ning kaluwasan sa indo. Nganì gingtaw-an kamo ng Dios ning Espiritu Santo nga iya gingpromisa bilang tandà nga kamo hay sa iya na. ¹⁴ Ang Espiritu Santo hay pareho sa pauna nga bayad ng Dios nga nagasiguro sa aton nga mabaton ta ang pagpakamaayo nga gingpangakò ng Dios, hasta kita matubos. Tungod diri, dayawon naton ang mahimayaon nga Dios.

¹⁵ Nganì nang mabatian ko ang indo pagtuo sa Ginoong Hesus kag ang indo paghigugmà sa tanan nga banal nga tawo ng Dios, ¹⁶ permi ako nagapasalamat para sa indo. Ginadumdom ko kamo sa akon mga pangamuyò, ¹⁷ nga kabay pa ang Dios ng aton Ginoong Hesu-Kristo, ang mahimayaon nga Amay, hay magtao sa indo ning kamayad kag magpasayod ng kamatuuran parti sa iya paagi sa bulig ng Espiritu Santo, agud makilaya gid nindo siya. ¹⁸ Kabay pa nga mahayagan ang indo hunahunà agud masayuran gid nindo kung ano ang aton ginalauman sa iya pagkatawag sa indo nga maging iya mga ongà kag para masayuran da nindo kung mauno kadakò kag pambihirà ang pagpakamaayo nga gingpangakò ng Dios para sa iya mga banal nga tawo. ¹⁹ Ginapangamuyò ko da nga kabay pa nga maintindihan nindo ang gahom ng Dios nga indì mapantayan nga para sa aton nga nagatuo sa iya. Ini da nga pambihirà nga gahom nga nagabulig sa aton ²⁰ ang ginggamit niya sa pagkabuhì liwat ni Kristo kag sa pagpapungkò niya sa iya tuo hampig^c didto sa kalangitan. ²¹ Nganì sa idayom ng gahom ni Kristo ang tanan nga espiritu nga pinunò, may otoridad, may gahom kag nagadumaya sa ibabaw. Ang otoridad nga gingtao sa iya hay mas mataas kaysa otoridad ng abir sin-o sa ini nga tiyempo kag imaw da sa paabuton. ²² Gingpaidayom ng Dios ang tanan nga mga butang sa gahom ni Kristo, kag ginghuman siya nga uyo nga labaw sa tanan nga butang, para sa mga nagatuo sa iya, ²³ nga imaw ang iya lawas nga naging kumplito kaibahan niya. Siya imaw da ang nagapunò ng tanan-tanan abir diin kaibahan ang iya kaugalingon.