Ang Sulat ni Pablo sa mga
Taga-Filipos
Ang Pang-una nga Hambay
A. Ang Lugar Ng Filipos
Ang siyudad ng Filipos hay makikità sa probinsya ng Masedonya, nga sakop ng Roma. Ini ang pinakamabahoy kag sintro sa lugar ng Europa nga gingwalihan ni Pablo ng Maayo nga Balità. Isa ini sa pinakamadugay kag pinakabantog nga siyudad nang nag-abot si Pablo didto.
B. Ang Relihiyon Ng Mga Tawo Sa Filipos
Abir pa maimpluwinsya ang Roma, ang relihiyon sa Filipos hay sarìsarì. Sa ini nga siyudad, makikità ang mga tawo nga dibuto sa inda ginapatihan kag makikità da ang iba-iba nga ginasamba ninda nga mga dios-diosan.
Ang mga Judio sa ini nga siyudad hay malakà lang kag wayà sinda ning permamenti nga lugar nga ginatipunan. Nganì si Pablo nagakadto sa lugar nga sayod niya nga didto nagapangamuyò ang mga Judio. (Ginghuman 16:13)
K. Ang Pagwali Ng Ebanghelyo Sa Filipos
Nag-abot sina Pablo daya ang Maayo nga Balità sa Filipos nang pangaduha nga misyon kaibahan si Silas. Ini hay mga A.D. 49 kag 52 paghalin ninda sa Sirya kag Silisya kung sa diin gingpakusog ninda ang nagatuo didto sunò sa gingsulat ni Lukas sa Libro ng Mga Ginghuman.
Isa ka gab-i, may panan-awon si Pablo kag nakità niya ang tawo nga taga-Masedonya nga ang hambay, ‘Kari diri sa Masedonya, buligi kami.’ (Ginghuman 16:9-10)
Pareho ng iya permi ginahuman sa pagwali ng Maayo nga Balità, ginauna niya ang mga Judio. Nganì nagpangità siya ning lugar nga inda ginatipunan, pero wayà siya may nakità.
Ang una nga nakumbertir sa Kristiyanismo sa Filipos hay si Lydia. (Ginghuman 16:14) Kag ang pinakapambihirà nga natabò sa una nga pagbisita ni Pablo sa Filipos hay ang istorya ng guwardya sa prisuhan. (Ginghuman 16:25-34)
D. Ang Mga Palatandaan Ng Ini Nga Libro
Mintras nagasulat si Pablo sa mga taga-Pilipos, ang iya nababatyagan hay indì gid niya mapugong. Mababasa sa iya sulat ang ‘kalipay’ o ‘malipay’ ng 16 ka beses. (1:4, 18, 25; 2: 2, 13, 18, 19, 28, 29; 3:1; 4:1, 3, 4, 10,18) Mababasa da sa iya sulat ang iya pagsalig kag pagpasalamat sa mga nagatuo didto nga mabubuligan gid siya sa iya mga kahinangyan. Mababatyagan da ang iya paghigugmà kag ang maayo nga relasyon sa inda.
Ang Mga Suyod
I. Ang Pagpangamusta (1:1-2)
II. Ang Pagpangamuyò nga May Pagpasalamat (1:3-11)
III. Ang Gahom ng Maayo nga Balità (1:12-19)
IV. Ang Kabuhì Naton para kay Kristo (1:20-30)
V. Ang Halimbawà nga Pagpakababà ni Hesu-Kristo (2:1-11)
VI. Ang Pagsunod sa Kabubut-on ng Dios (2:12-18)
VII. Ang Plano kay Timoteo (2:19-24)
VIII. Ang Plano kay Epafrodito (2:25-30)
IX. Ang Pagkamatarong paagi sa Pagtuo kay Kristo (3:1-11)
X. Ang Pagtinguhà sa Pagtuman sa Kabubut-on ng Dios (3:12-21)
XI. Ang mga Bilin (4:1-9)
XII. Ang Pagpasalamat sa mga Bulig (4:10-20)
XIII. Ang Pang-ulihi nga Pagpangamusta (4:21-23)