¹ Tungod sa ini nga kabangdanan, ako hay nagapangamuyò sa Dios para sa indo. Gingpriso ako kay nagaserbisyo ako kay Kristo Hesus paagi sa pagwali sa indo nga mga bukon Judio. ² Sigurado gid nga nabatian nindo nga sa pagpakamaayo ng Dios, gingsaligan niya ako nga maging miyugwali para sa indo. ³ Gingpasayod sa akon ng Dios ang iya plano nga wayà gingpasayod nang una, para sa indo kaayuhan. Gingsambit ko dati ini ning matag-od sa ini nga sulat. ⁴ Kung nabasa nindo ini, masasayuran nindo nga naiintindihan ko gid ang plano ng Dios nga wayà gingpasayod nang una, nga ginghuman ni Kristo niyan. ⁵ Nang una, wayà gid gingpasayod ng Dios sa mga tawo ini nga plano, pero niyan gingpasayod na niya ini sa iya gingpilì nga mga apostol kag mga mensahiro ng Dios paagi sa Espiritu Santo. ⁶ Kag ini ang iya plano: ang mga bukon Judio hay makaibahan sa panublion kag makaibahan bilang miyembro sa isa ka lawas kag pareho nga makabaton sa pangakò halin sa Dios tungod sa inda pakig-isa kay Kristo Hesus paagi sa Maayo nga Balità.

⁷ Tungod sa pagpakamaayo ng Dios nga gingtao sa akon, ginghuman niya ako nga miyugserbisyo para iwali ang Maayo nga Balità paagi sa iya gahom nga nagahikot sa akon. ⁸ Ako ang pinakamababà gid sa tanan nga banal nga tawo ng Dios, pero gingtaw-an niya ako ning prebilihiyo nga maiwali sa mga bukon Judio ang Maayo nga Balità parti sa indì matungkad nga pagpakamaayo halin kay Kristo. ⁹ Wayà gid nagbalità tunà nang una ang Dios nga naghuman ng tanan nga butang kung ano ang iya plano nga wayà gingpasayod nang una. Pero niyan gingsugò niya ako sa pag-isplikar sa tanan nga tawo kung pauno niya ginatuman adto nga plano, ¹⁰ agud paagi sa mga nagatuo kay Kristo, maipasayod niyan ng Dios sa mga espiritu nga pinunò kag sa mga may otoridad sa ibabaw kung ano ang iya kamayad nga ginapakità sa iba-iba nga paagi. ¹¹ Natabò ini sunò sa plano ng Dios tunà pa nang una nga iya ginghuman paagi kay Kristo Hesus nga aton Ginoo. ¹² Tungod sa aton pagtuo kay Kristo kag sa aton pakig-isa sa iya, makakapalapit na kita sa Dios nga wayà ning kahadlok o pagkatahap. ¹³ Nganì nagapangabay ako sa indo nga indì kamo maduyaan ning paglaom tungod sa pagtiis sa mga kasakit nga akon naaagihan kay para ini sa indo kaayuhan.

¹⁴ Nganì pag nadudumduman ko ini nga plano ng Dios, nagaluhod ako sa pagpangamuyò sa aton Amay, ¹⁵ nga imaw ang nagagahom sa tanan.^a sa kada grupo sa kalangitan kag sa kada nasyon sa dutà. ¹⁶ Ginapangamuyò ko nga pakusugon niya ang suyod ng indo pagkatawo paagi sa iya Espiritu, sunò sa iya kadakò kag pambihirà nga gahom, ¹⁷ agud magaistar ning permamenti si Kristo bilang tag-iya sa indo tagipusuon paagi sa indo pagtuo sa iya. Ginapangamuyò ko da nga kamo hay maging malig-on tungod sa paghigugmà, pareho sa maayo nga tanom nga madayom ang gamot kag pareho sa malig-on nga bayay nga matibay ang pundasyon. ¹⁸ Ang resulta, magkaigwa kamo ning pang-intindi kaibahan ng tanan nga banal nga tawo ng Dios, kung mauno gid kalapad kag kahabà, kataas kag kadayom ang paghigugmà ni Kristo sa aton. ¹⁹ Abir indì pa gid ini maintindihan ning maayo, kabay pa nga mabatyagan nindo ang paghigugmà ni Kristo agud mapunò kamo ng tanan nga kinaugalì ng Dios hasta kamo maging kumplito.

²⁰ Dayawon ta ang Dios nga nakakahuman ng mas subra pa sa aton ginapangabay o ginahunahunà paagi sa iya gahom nga nagahikot sa aton. ²¹ Kita nga nagatuo kag nagapakig-isa kay Kristo, hay magdayaw sa Dios abir san-o hasta sa wayà katapusan. Kabay pa!