4
Ang Pagkakaisa ng mga Nagatuo sa Isa ka Lawas
1 Nganì ako nga gingpriso tungod sa pagserbisyo sa Ginoo, nagapangabay sa indo nga magkabuhì kamo ning tamà bilang mga tinawag ng Dios. 2 Maging mapainubuson kamo kag madahan, maging matiniison kag batunon nindo ang kakuyangan ng isa kag isa nga may paghigugmà. 3 Nagtao ang Espiritu Santo sa indo ng pagkakaisa, nganì tinguhai gid nindo nga maipadayon ini paagi sa matawhay nindo nga pagkakaibahanan. 4 Kita hay isa nga lawas, may isa nga Espiritu Santo. Isa ang aton paglaom, kay pareho da kita nga nagahuyat sa gingpromisa ng pagkatawag ng Dios sa aton. 5 Isa ang aton Ginoo, isa ang pagtuo, kag isa ang bawtismo. 6 Kag may isa kita nga Dios nga Amay ng tanan. Siya ang nagaharì, nagahikot kag nagaistar sa tanan nga nagatuo.
7 Pero gingtaw-an ang kada isa sa aton ni Kristo ning iba-iba nga abilidad sunò sa iya kabuot. 8 Pareho ng nakasulat sa Kasulatan,
“Nang nagsakà siya sa langit, gingdaya niya ang madamò nga mga bihag.
Kag gingtaw-an niya ning mga regalo ang mga tawo.”a
9 Niyan ano ang gusto hambayon ng ‘nagsakà siya sa langit?’ Ang gusto hambayon ini, nagpanaog siya sa mababà nga lugar, nga imaw ang kalibutan. 10 Kag siya nga nagpanaog, imaw da ang nagsakà sa ibabaw ng tanan nga kalangitan, agud mapunò niya ang tanan abir diin kaibahan ang iya kaugalingon. 11 Siya ang naghuman sa iban bilang apostol, ang iban bilang miyugbalità ng mensahe ng Dios, ang iban bilang miyugwali ng Maayo nga Balità kag ang iban bilang pastor kag manunudlò. 12 Ginghuman niya ini agud ipreparar ang mga banal nga tawo ng Dios sa pagserbisyo para maging malig-on ang mga nagatuo bilang lawas ni Kristo. 13 Sa ini nga paagi, maabot naton tanan ang pagkakaisa sa pagtuo kag pagkakilaya sa Ongà ng Dios, agud maging pareho ng may edad nga tawo sa espiritwal, kapareho ni Kristo nga wayà kuyang ang pagkatawo. 14 Kung ini matabò, bukon na kita pareho sa maisot nga mga ongà nga madalì mapatayang ng iba-iba nga pagpanudlò, nga daw ang ginasakyan sa dagat nga ginaanod ng humbak kag ginapadpad ng hangin. Indì na kita maluluko ng mga tawo nga nagadinayà nga ang gusto hay day-on kita sa kalainan paagi sa inda pagpanudlò nga bukon matuod. 15 Kundì, kahinangyan magsunod kag maghambay kita ng kamatuuran nga may paghigugmà, agud sa tanan nga bagay maging kapareho kita ni Kristo nga imaw ang aton uyo. 16 Paagi sa iya pagdumaya, ang tanan nga parte ng lawas nga imaw ang mga nagatuo sa iya hay nagakasugdong-sugdong, kag ang kada parte hay nakakabaton ning sustansya. Nagagana ning tamà ang kada parte, nagabahoy ang bilog nga lawas kag nagakusog. Ini hay matabò kung ginahigugmà naton ang isa kag isa.
Ang Bag-o nga Kabuhì Paagi kay Kristo
17 Niyan sa otoridad nga gingtao ng Ginoo sa akon, ini ang akon ginapaandam: ayaw na kamo magkabuhì pareho ng mga tawo nga wayà relasyon sa Dios. Wayà ning puyos ang inda ginaisip 18 kay naduyman ang inda pang-intindi. Nagbuyag sinda sa kabuhì nga halin sa Dios tungod sa inda pagiging ignoranti, kay subra katugas ang inda uyo. 19 Wayà na gid sinda ning huyà. Ang tanan ninda nga oras hay puro na lang pag-inuyag kag padayon ang inda paghuman ng tanan nga mga kalaw-ay nga handom. Wayà gid sinda ning pagpugong sa paghuman ini.
20 Pero kamo, bukon tiyad inà ang natun-an nindo parti kay Kristo. 21 Kung napamatian gid nindo ang pagpanudlò parti sa iya, kag paagi sa iya hay natudluan kamo ng mga kamatuuran nga makikità gid sa iya kabuhì, 22 dapat lang ilisan nindo ang dati nindo nga pamatasan pareho sa pag-uba ng lumà nga barò, kay ini hay himò ng lawasnon nindo nga kinaugalì nga nagasirà sa indo paagi sa malain nga mga hilig nga nagadayà sa indo. 23 Pabag-uha nindo ang indo tagipusuon kag hunahunà. 24 Kahinangyan iilis nindo ang bag-o nga kinaugalì kay ginghuman ng Dios nga bag-o ang aton kabuhì pareho sa iya nga imaw ang matuod nga kabuhì nga matarong kag wayà ning kasal-anan.
25 Tungod diri, indì na kamo magpinusong kag dapat maghambay ang kada isa ning matuodb sa iya mga kauturan kay kaibahan kita tanan sa isa ka lawas. 26 Kung mahangit man kamo, likawi nindo nga indì kamo makasalà. Kag ayaw nindo pagpadugaya ang indo kahangit sa bilog nga adlaw. 27 Ayaw nindo pagtaw-i ning lugar si Satanas nga matintar kamo. 28 Ang mga miyugpangawat hay indì na dapat magpangawat, kundì magtrabaho sinda mismo sa maayo nga paagi, agud makabulig da sinda sa mga nagakahinangyan. 29 Ayaw kamo maghambay ning malain, kundì tinguhaa nindo nga maghambay ning makakabulig kag angay sa sitwasyon, agud makatao ning kaayuhan sa mga makakabatì. 30 Ayaw nindo pagpalisura ang Espiritu Santo ng Dios kay ang Espiritu Santo imaw ang tandà nga kamo hay sa Dios, kag ang katibayan ng pagtubos sa indo sa paabuton nga adlaw. 31 Buy-a sa indo kabuhì ang tanan nga paglain ng buot, pagkahangit, kag pagdumot. Ayaw na kamo magpanghayagak o magpangtsismis, kundì buy-a ang tanan nga kalainan. 32 Kag maging mabuot kamo sa isa kag isa kag maging maluluy-on. Magpinatawaran kamo pareho ng pagpatawad sa indo ng Dios paagi kay Kristo.