¹ Kamo nga mga kabataan, tumana nindo ang indo mga ginikanan kay imaw ini ang tamà nga humanon, tungod sa indo pakig-isa sa Ginoo. ^2,3 “Tahura ang imo tatay kag nanay, agud magiging maayo ang imo paabuton kag magahabà ang imo kabuhì diri sa dutà.”^a Imaw ini ang una nga sugò nga may kaibahan nga pangakò. ⁴ Kamo naman nga mga ginikanan,^b ayaw nindo pagpahangita ang indo mga ongà, kundì pabahuya sinda sa pagdisiplina kag pagpanudlò sunò sa gusto ng Ginoo sa inda.

⁵ Kamo nga mga ulipon, tumana ang indo mga amo diri sa dutà nga may pagtahod kag pagsunod nga hugot sa tagipusuon, nga daw si Kristo ang indo ginaserbisyuhan. ⁶ Nganì magserbisyo kamo bukon lang kung nagasirò ang indo amo agud malipay, kundì halin sa tagipusuon bilang mga ulipon ni Kristo nga nagahuman ng kabubut-on ng Dios. ⁷ Magserbisyo kamo nga may maayo nga kabubut-on nga daw ang Ginoo mismo ang indo ginaserbisyuhan kag bukon lang ang mga tawo. ⁸ Tandai nindo, ang kada isa nga nagahuman ning maayo hay may mababaton halin sa Ginoo, ulipon man siya o bukon.

⁹ Kamo naman nga mga amo, tratuha nindo ning maayo ang indo mga ulipon. Ayaw nindo sinda pagpahuga kay sayod nindo nga sinda kag kamo hay may pareho nga amo sa kalangitan, kag wayà siya ning may ginapalabi abir sin-o.

¹⁰ Mga kauturan, ang pinakaulihi nga mahahambay ko sa indo hay imaw ini, magpakalig-on kamo sa indo pakig-isa sa Ginoo paagi sa iya pambihirà nga gahom. ¹¹ Gamita nindo ang tanan nga armas kag pangprotekta nga gingtao ng Dios agud indì kamo maperdi sa mga plano nga pagpangluko ni Satanas. ¹² Kay ang aton kaaway bukon mga tawo, kundì ang mga espiritu nga pinunò, mga may otoridad sa espirituhanon, mga nagagahom sa mga tawo nga sakop ng kaduyom, malain nga mga espiritu nga nagagahom sa ibabaw. ¹³ Nganì gamita nindo ang tanan nga armas kag pangprotekta nga gingtao ng Dios, agud pag-abot nang adlaw nga ang matatabò sa kalibutan hay malain, makabatò kamo kag pagkatapos ini tanan, magiging malig-on gihapon kamo.

¹⁴ Nganì magpakatibay kamo! Isuksok nindo bilang paha ang kamatuuran ng Dios. Gamita nindo bilang panagang para sa dughan ang pagkamatarong halin sa Dios. ¹⁵ Kag isuksok nindo bilang sapatos ang Maayo nga Balità kung sa diin naibalik ang aton bag-o nga relasyon sa Dios, agud maging preparado kita para magbatò. ¹⁶ Bukon lang inà, gamita da nindo bilang panagang ang indo pagtuo, agud indì kamo madutlan ng mga pagtintar ni Satanas nga daw sa nagadayab nga mga panà. ¹⁷ Kag gamita nindo bilang helmet ang pagkilaya nga kamo gingluwas na. Gamita da nindo ang hambay ng Dios pareho ng espada nga ginatao ng Espiritu Santo sa indo. ¹⁸ Himua nindo ini tanan sa pangamuyò kag sa tanan nga klasi ng pangabay sa Dios. Mangamuyò kamo sa tanan nga oras sa bulig ng Espiritu Santo. Maging alerto kamo kag magpadayon kamo nga magpangamuyò labi na para sa mga banal nga tawo ng Dios. ¹⁹ Kag ipangamuyò da nindo ako nga kada ako magwali hay mataw-an ako ng Dios ning tamà nga ihambay, agud maipasayod ko nga may kaisog ang Maayo nga Balità nga wayà gingpasayod nang una. ²⁰ Kay gingsugò ako ng Dios para magwali ng Maayo nga Balità kag ini ang kabangdanan nga ako hay napriso. Nganì ipangamuyò nindo ako nga maihambay ko ini nga may kaisog sunò sa dapat ko hambayon.

²¹ Si Tiquico, nga palanggà nga utod kag matutom nga miyugserbisyo sa Ginoo, ang magabalità sa indo parti sa tanan nga akon kamutangan kag ginahuman diri. ²² Ini ang kabangdanan kung basì gingsugò ko siya dirà para masayuran nindo ang parti sa amon kag mapakusog ang indo tagipusuon.

²³ Mga kauturan, kabay pa nga mabaton nindo ang katawhayan, imaw da ang paghigugmà kag pagtuo halin sa Dios nga Amay kag sa Ginoong Hesu-Kristo. ²⁴ Kabay pa nga mabaton ang grasya ng Dios ng tanan nga nagahigugmà abir san-o sa aton Ginoong Hesu-Kristo.