¹ Nganì tungod mga pinalanggà kamo nga mga ongà ng Dios, sundi nindo ang iya halimbawà. ² Dapat padayon nindo nga higugmaon ang indo isigkatawo pareho ng paghigugmà ni Kristo sa aton. Tungod sa iya paghigugmà, gingtao niya ang iya kabuhì para sa aton bilang isa ka halad kag ini nga sakripisyo hay mahumot sa Dios nga nakakapalipay sa iya.

³ Tungod kamo mga banal nga tawo ng Dios, bukon angay abir mamitlang sa indo ang parti sa pagpangawatan o pag-iba nga wayà pa makasay, ang tanan nga paghuman ning malaw-ay o ang padayon nga paghuman ng malain nga mga handom. ⁴ Imaw da ang abir ano nga mga hambay ning kabastos o wayà puyos nga istorya kag tiaw-tiaw nga malain, kundì dapat maghambay kamo ng pagpasalamat sa Dios. ⁵ Kay sayod nindo nga ang pagpangawatan o ang nagaiba nga wayà pa makasay, ang nagahuman ning malaw-ay o ang nagapadayon ning paghuman ng malain nga mga handom hay indì gid magkaigwa ning kaparte kaibahan ng mga tawo nga ginaharian ni Kristo kag ng Dios. Kay ang tawo nga permi nagahandom ning abir ano para sa iya sarili, ini nga paghinakog hay pareho sa pagsamba sa mga dios-diosan.

⁶ Ayaw kamo magpadayà abir kanin-o paagi sa mga hambay nga wayà ning kamatuuran, kay nahahangit ang Dios sa ini nga mga tawo nga masinuwayon nga nagahuman ng mga ini. ⁷ Ayaw da kamo maglakot sa ginahuman ng ini nga mga tawo. ⁸ Dati, nagakabuhì kamo sa kaduyom, pero niyan nagakabuhì kamo sa kahayag kay nagpakig-isa na kamo sa Ginoo. Nganì dapat ipakità nindo sa indo pagkabuhì nga nahayagan na kamo. ⁹ Kay kung ang tawo nahayagan na, masasayuran mo ini tungod ang iya pamatasan hay maayo, matarong, kag masinundanon sa kamatuuran. ¹⁰ Tinguhaa nindo nga makatuon kung ano ang nakakapalipay sa Ginoo. ¹¹ Ayaw kamo maglakot sa wayà puyos nga mga ginahuman ng iban nga nagakabuhì sa kaduyom. Kundì, dapat ipakità nindo sa inda nga malain ang inda ginahuman. ¹² Makahuhuyà abir imitlang ang mga bagay nga inda ginahuman ning sekrito. ¹³ Pero kung mabulgar ang tanan nga inda ginahuman nga sekrito, masasayuran ninda kung mauno ini kalain! ¹⁴ Kay ang tanan nga nahayagan hay nakikità na. Nganì may iban nga nagahambay,

¹⁵ Nganì dahani nindo kung pauno kamo magkabuhì. Ayaw kamo magpatuyad sa mga tawo nga wayà pang-intindi, kundì magkabuhì kamo bilang mga tawo nga nakakaintindi sa kabubut-on ng Dios. ¹⁶ Gamiton nindo ning maayo ang indo oras^a kay ang mga adlaw nga natatabò sa kalibutan hay malain. ¹⁷ Ayaw kamo magpinaluko, kundì intindihon nindo kung ano ang gusto ng Ginoo nga ipahuman sa indo.

¹⁸ Ayaw kamo magpabayong kay nakakasirà ini sa indo. Kundì magpapunò kamo ng Espiritu Santo. ¹⁹ Tungod ang Espiritu Santo ang tuytoy sa indo, dapat imaw ini ang humanon nindo: pag nagatipon kamo, kumanta kamo sa isa kag isa ning mga salmo, mga imno kag iban nga mga kanta nga ginatao ng Espiritu Santo. Kung magkanta kag magkumpuso kamo hay dapat halin gid sa indo tagipusuon, kay ini hay pagdayaw sa Ginoo. ²⁰ Magpasalamat kamo permi sa Dios nga Amay sa tanan nga bagay tungod sa indo relayson sa aton Ginoong Hesu-Kristo.^{b 21} Kag magpasakop kamo sa isa kag isa tungod sa indo pagrespito kay Kristo.

²² Kamo nga mga babayi, magpasakop kamo sa indo asawa, pareho ng indo pagpasakop sa Ginoo. ²³ Kay ang lyaki ang uyo ng iya asawa, pareho ni Kristo nga imaw ang aton uyo, kita ang iya lawas, kag siya da ang Manluluwas ng mga nagatuo. ²⁴ Kung pauno nga ang mga nagatuo nagapasakop kay Kristo, ang mga babayi hay dapat da nga magpasakop sa inda asawa paagi sa pagsunod sa tanan nga bagay.

²⁵ Kamo naman nga mga lyaki, higugmaa nindo ang indo asawa pareho ng paghigugmà ni Kristo sa mga nagatuo. Tungod sa iya paghigugmà gingsakripisyo niya ang iya kabuhì para sa mga nagatuo, ²⁶ agud ilain ang mga nagatuo para sa Dios, pagkatapos nga nalimpyuhan paagi sa tubì kag sa hambay ng Dios. ²⁷ Ginghuman niya ini agud mabaton niya ang mga nagatuo bilang iya asawa nga wayà ning kasal-anan kag wayà ning kapintasan. Kita hay pareho sa babayi nga ikakasay nga subra gid kagwapa kay wayà gid ning may makità nga buling o kurinot o ano pa nga mga deperensya. ²⁸ Imaw da ang mga lyaki, kahinangyan higugmaon ninda ang inda asawa, pareho ng paghigugmà ninda sa inda sarili nga lawas. Ang nagahigugmà sa iya asawa hay nagahigugmà sa iya sarili kay sinda hay naging isa na. ²⁹ Wayà ning tawo nga wayà nagahigugmà sa iya sarili nga lawas, kundì ginapakaon niya ini kag ginadipara. Imaw da ini ang ginahuman ni Kristo sa iya mga nagatuo, ³⁰ kay kita nga mga nagatuo kay Kristo hay kaparte ng lawas niya. ³¹ Nakasulat sa Kasulatan, “Ini ang kabangdanan kung basì bayaan ng lyaki ang iya tatay kag nanay, kag magaiba siya sa iya asawa, kay maging isa na sinda nga duha.”^{c 32} Makatitingaya ini nga madayom nga kamatuuran nga ginapasayod na, kag ang ginahambay ko diri hay ang pagiging isa ni Kristo kag ng mga nagatuo sa iya. ³³ Nganì imaw da kamo mga lyaki, higugmaa nindo ang indo asawa, pareho ng paghigugmà nindo sa indo sarili. Kag kamo mga babayi, tahura nindo ang indo asawa.