¹ Nganì pinalanggà ko nga mga kauturan, kahinangyan magpakatibay kamo nga nagapakig-isa sa Ginoo. Ginahigugmà ko kamo kag gusto ko gid kamo makità! Kamo ang akon kalipay kag ginapakadakò ko gid kamo.

² Ginapangabay ko gid sina Euodia kag Sintique nga indì na kamo mag-away kay mag-utod kamo sa Ginoo. ³ Nagapangabay ako da sa imo, matutom ko nga kaibahan sa pagserbisyo, buligi ining duha nga babayi. Kay sinda hay nakabulig ko da sa pagpangabudlay para ipalapnaag ang Maayo nga Balità. Kaibahan si Clemente kag ang iban nga mga kapareho ko nga miyugserbisyo nga ang mga pangayan hay nakasulat na sa Libro ng Kabuhì.^a

⁴ Magkalipay kamo sa indo pakig-isa sa Ginoo. Ginahambay ko liwat, “Magkalipay kamo!” ⁵ Ipakità nindo nga kamo hay mabuot sa tanan nga tawo. Malapit na ang pag-abot ng Ginoo.

⁶ Indì kamo magpangalibog, kundì ang tanan nga bagay nga indo ginapangabay hay ipasayod nindo sa Dios paagi sa pangamuyò. Pangayò kamo nga may pagpapasalamat. ⁷ Kag ang katawhayan ng Dios nga indì maabot ng aton kaisipan ang magabantay sa aton tagipusuon kag hunahunà paagi sa aton pakig-isa kay Kristo Hesus.

⁸ Mga kauturan, ang pinakaulihi nga mahahambay ko sa indo, isipon nindo ang anuman nga mga bagay nga matuod, ginatahod kag tamà. Hunahuna-on gid nindo ang anuman nga mga bagay nga malimpyo, nakakapalipay kag nakakaili. Isipon nindo ang anuman nga mga bagay nga kaayo-ayo kag ginadayaw ng mga tawo. ⁹ Himua nindo ang tanan nga indo natun-an, nabaton, nabatian kag nakità sa akon. Kag ang Dios nga nagatao ning katawhayan hay magaistar sa indo tagipusuon.

¹⁰ Tudo gid ang akon kalipay sa Ginoo kay nadumduman nindo ako liwat. Sayod ko nga permi nindo ako ginadumdom pero wayà lang kamo ning kahigayunan para mabuligan ako. ¹¹ Ginahambay ko ini bukon tungod kay nagakahinangyan ako. Natun-an ko na nga makuntinto anuman ang akon kamutangan. ¹² Naagihan ko ang wayà-wayà gid kag ang maging abunda. Natun-an ko nga atubangon ang anuman nga sitwasyon sa akon kabuhì, ang mabusog o magutom, ang maging abunda o kakulì. ¹³ Ang tanan nga bagay hay akon mahuhuman paagi sa gahom ni Kristo nga ginatao sa akon.

¹⁴ Pero salamat gid, kaayo-ayo ang indo ginghuman kay gingbuligan nindo ako sa akon mga kahugaan. ¹⁵ Sayod da nindo nga kamo lang mga taga-Filipos ang nagbulig sa akon kahinangyanon nang una nga gingwali ko ang Maayo nga Balità. Nang paghalin ko sa Macedonia, wayà ning iban nga kongregasyon ng mga nagatuo ang naghuman ini, kundì kamo lang gid. ¹⁶ Abir nang yadto ako sa Tesalonica, bukon lang isa ka beses nindo ako gingpaday-an ning bulig. ¹⁷ Sa bagay, wayà ako nagahandom ng indo bulig, pero ginabaton ko ini agud mas labi pa gid nga makabaton kamo ning premyo.

¹⁸ Arinyan, bastanti na ako sa tanan nga bagay kag subra pa gid. Nabaton ko ang tanan nga akon kahinangyan nga indo gingpadaya paagi kay Epafrodito. Ini nga mga bulig hay pareho ng mahumot nga halad sa Dios nga ginabaton niya nga may kalipay. ¹⁹ Kag tungod may relasyon kamo kay Kristo, itatao ng Dios nga akon ginaserbisyuhan ang kada kahinangyan nindo sunò sa iya abunda nga manggad. ²⁰ Sa Dios nga aton Amay ang pagdayaw hasta sa wayà katapusan! Kabay pa.

²¹ Kamusta sa tanan nga banal nga tawo ng Dios kay Kristo Hesus. Ang mga kauturan nga kaibahan ko diri hay nagapangamusta sa indo. ²² Nagapangamusta da sa indo ang tanan nga banal nga tawo ng Dios, labi na gid ang nagaserbisyo sa palasyo ng Emperador.

²³ Kabay pa nga ang grasya ni Hesu-Kristo nga aton Ginoo yarà sa indo tanan.