Ang Sulat ni Pablo sa mga
Taga-Colosas
Ang Pang-una nga Hambay
A. Ang Lugar Sa Colosas
Gingdikta ini ni Pablo para sa iglesya sa Colosas, isa ka siyudad sa Asya Menor mga 175 kilometro sa esti ng Efeso kag mga 17 kilometro sa esti ng Laodicea. Bukon kuno si Pablo ang nagpatindog ng iglesya sa ini nga lugar, pero sakop ini ng iya responsibilidad sa pagsugò ng mga miyugserbisyo. Ini nga siyudad hay kapital ng probinsya ng Roma sa Asya. Niyan ini nga lugar hay parte ng nasyon sa Turkey.
B. Ang Kabangdanan Ni Pablo Sa Pagsulat
Nagsulat si Pablo kay nasayuran niya nga may mga manunudlò nga bukon matuod didto sa iglesya sa Colosas. Nagsulat siya para dipinsahan ang Maayo nga Balità kuntra sa salà nga pagpanudlò kay ginatudlò ng adto nga mga tawo nga kahinangyan sambahon ‘ang mga espiritu’ para magkaigwa ning relasyon ang tawo sa Dios kag magkaigwa ning kaluwasan.
Ginatudlò pa ninda nga kahinangyan maghuman ning mga rituwal pareho ng: pagpaltak, parti sa Adlaw nga Inugpahuway, sa mga pista, sa pagkaon kag iban pa para ilayò ang mga tawo sa pagtuo kay Hesu-Kristo.
Ini ang kabilugan ng iya sulat:
a. Si Hesu-Kristo lang ang makakatao ning kaluwasan paagi sa aton pagtuo sa iya.
b. Paagi sa iya, ginghuman ng Dios ang kalibutan kag ang tanan nga bagay.
k. Gingklaro gid ni Pablo kung sin-o si Hesus, pareho ng: ang iya kinaugalì bilang Dios, siya ang naghuman ng tanan, kag siya ang una nga nabuhì liwat.
d. Tungod sa iya kinaugalì, dapat magkabuhì kapareho niya.
Ang Mga Suyod
I. Ang Pagpangamusta (1:1-2)
II. Ang Pangamuyò ni Pablo para sa mga Nagatuo (1:3-14)
III. Si Kristo hay Pinakataas sa Tanan nga mga Ginghuman (1:15-23)
IV. Nalipay si Pablo sa iya Kahugaan (1:24-2:5)
V. Pagkabuhì ng Bag-o nga Kabuhì kay Kristo (2:6-15)
VI. Ang Paandam Kuntra sa mga Manunudlò nga Bukon Matuod (2:16-23)
VII. Ang Tamà nga Kabuhì ng mga Nagatuo (3:1-4:6)
VIII. Ang Pang-ulihi nga Pagpangamusta (4:7-18)