¹ Niyan, mga kauturan ko kay Kristo, magkalipay kamo sa indo pakig-isa sa Ginoo! Wayà ako ginasubhi nga liwat-liwaton ini nga isulat sa indo, kay ini hay para da sa indo kaayuhan.

² Mag-andam kamo sa mga tawo nga ang mga batasan hay daw sa mapintas nga ayam. Ini nga mga tawo hay malain nga miyugserbisyo kay nagapangpilit sinda nga dapat kamo magsunod sa layi ng pagpaltak^a para maluwas. ³ Kita ang matuod nga ginabilang ng Dios nga mga paltak kay ang aton pagsamba hay paagi sa bulig ng iya Espiritu. Ang aton ginapakadakò hay ang aton kabuhì nga may relasyon kay Hesu-Kristo. Wayà kita nagadipindi sa mga seremonya o sa aton mga ginahuman, agud maluwas kita. ⁴ Abir igwa ako ning pagsalig sa pangluwas nga seremonya, gingbaliwayà ko ini. Kung igwa ning iban nga tawo nga nagahunahunà nga siya hay nagasalig sa seremonya, mas labi na ako. ⁵ Kay gingpaltak ako nang wayo pa lang ka adlaw, ging-ongà ako nga Israelita, halin sa tribo ni Benjamin, kag ang tanan nakon nga kalulo-lulohan hay Hebreo. Parti sa pagsunod sa Kasuguan ng mga Judio, gingsunod ko gid ini kay ako hay Pariseo. ⁶ Parti sa pagiging dibuto ko sa rehiliyon, gingpasakitan ko ang mga nagatuo kay Hesu-Kristo. Kung parti sa pagiging matarong sa pagsunod sa Kasuguan, wayà ning may maipintas sa akon.

⁷ Pero adto nga mga bagay nga gingkabig ko nga importante nang una, niyan para sa akon hay wayà na ning puyos tungod sa ginghuman ni Kristo sa akon. ⁸ Bukon lang inà, abir pa gid ang tanan nga bagay hay ginakabig ko nga wayà na ning puyos kung ikumpara ko sa pinakamaayo, ang makilaya si Kristo Hesus nga akon Ginoo. Tungod sa iya, gingsikway ko ang tanan kag ginakabig ko nga daw basura agud kabaylo sa pinakaimportante, ang akon relasyon kay Kristo ⁹ kag magpakig-isa sa iya. Nganì naging matarong ako, bukon sa pagsunod sa Kasuguan kundì paagi sa akon pagtuo kay Hesu-Kristo, kay ang pagkamatarong sa atubangan ng Dios hay sunò sa pagtuo. ¹⁰ Ang ginahandom ko niyan hay ang makilaya pa gid si Kristo kag maagihan ko da ang gahom ng iya pagkabuhì liwat, kag maging kaparte sa iya mga kasakit kag maging kapareho sa iya kamatayon, ¹¹ sa paglaom nga ako da hay buhion liwat halin sa mga patay.

¹² Wayà ko ginahambaya nga natuman ko na ang kabubut-on ng Dios o perpikto na ako. Pero nagatinguhà gid ako para mahuman ang tanan nga gusto ni Kristo Hesus sa akon kay imaw ini ang iya plano. ¹³ Mga kauturan ko, wayà ko ginaisipa nga naabot ko na ini. Pero isa ka butang ang akon ginahuman: ginakalimutan ko ang mga bagay nga nagligad kag ang ginatinguhà ko niyan hay matapos ang dapat ko nga humanon sa paabuton. ¹⁴ Ang ginatinguhà ko gid hay makaabot sa katapusan, pareho ng karera agud mabaton ang premyo ng Dios nga kabuhì didto sa ibabaw paagi kay Kristo Hesus.

¹⁵ Tyad ini ang dapat naton nga isipon abir kita hay mga matibay na sa pagtuo. Kung bukon tiyad ini ang indo kaisipan, ipaintindi ini sa indo ng Dios. ¹⁶ Ang kahinangyan lang hay ipadayon naton nga sundon ang kamatuuran nga naton natun-an.

¹⁷ Mga kauturan ko, sundi nindo ang akon pagkabuhì kag obserbahi nindo maayo ang mga tawo nga nagasunod sa amon halimbawà. ¹⁸ Pareho ng permi nakon ginahambay sa indo kag niyan nagahambay ako liwat nga nagatangis, madamò ang nagahuman ning mga seremonya nga kuntra naman ini sa gusto hambayon ng pagkamatay ni Kristo sa krus. ¹⁹ Ang destinasyon ninda hay sa impyerno, kay ang ginapakadios ninda hay ang ginahandom ng inda tiyan, kag ang ginapahambog ninda hay ang parti sa kalibutanon nga mga bagay nga dapat kuntà ninda ikahuyà. Ang gina-inisip ninda hay ang mga bagay sa kalibutan. ²⁰ Pero kita hay pumuluyò ng kalangitan, halin didto ginahuyat naton nga may madakò nga handom ang pagbalik diri ng Ginoong Hesu-Kristo, ang aton Manluluwas. ²¹ Pag-abot niya diri, bayluhan niya ang aton lawas nga dutan-on kag ilisan niya ning lawas nga langitnon pareho ng iya lawas. Himuon niya ini paagi sa iya otoridad nga makasakop ng tanan nga bagay sa idayom ng iya pagdumaya.