¹ Mga amo sa kalibutan, dapat maging tamà kag patas ang indo pagtratar sa indo mga ulipon. Dumduma nindo kamo da hay may Amo sa langit.

² Magpadayon kamo sa pagpangamuyò nga may pagpasalamat. Bantayi ang indo ginahambay sa pangamuyò. ³ Kada pangamuyò nindo, dumduma da kami nga maghuman ning paagi ang Dios para makawali kami parti sa plano ng kaluwasan para sa indo da nga bukon Judio nga halin kay Kristo nga dati anay hay wayà gingpasayod. Tungod sa akon pagwali kay Kristo, ako niyan hay nakakulong. ⁴ Ipangamuyò nindo nga maipasayod ko ini nga mensahe ning klaro, kay ini ang kahinangyan.

⁵ Magkabuhì kamo nga may kamayad sa atubangan ng mga tawo nga wayà nagatuo. Ayaw mag-uyaki ang indo oras agud ipakità nga kamo hay tagasunod ni Kristo. ⁶ Kung kamo nagahambay, kahinangyan may kaluoy, pareho ng asin nga nagatao ning sabor sa pagkaon, agud magkaigwa sinda interis sa indo gingwali. Paagi sa ini, masayuran nindo kung pauno sabaton ning tamà ang pangutana ng kada isa.

⁷ Si Tiquico nga aton palanggà nga utod, ang mabalità sa indo parti sa tanan nga kamutangan ko diri. Siya hay matutom nga miyugserbisyo kag ulipon ng Ginoo. ⁸ Gingsugò ko siya dirà sa indo kaibahan ang sulat para masayuran nindo ang parti sa amon sitwasyon diri, agud mapakusog ang indo mga tagipusuon. ⁹ Kaibahan niya si Onesimo, ang matutom kag palanggà nga utod nga indo kasimanwa. Sinda ang mabalità sa indo tanan ng natatabò diri.

¹⁰ Nagapangamusta sa indo si Aristarco, ang kaibahan ko nga priso kag si Marcos nga pakaisa ni Bernabe. (Igwa na ako ning gingbilin sa indo parti kay Marcos. Batuna nindo siya ning maayo, kung mag-abot dirà.) ¹¹ Nagapangamusta da sa indo si Hesus nga ginatawag da nga Justo. Sinda lang ang mga Judio nga naging Kristyano nga kaibahan ko sa pagserbisyo sa gingharian ng Dios. Sinda ang nagatao ning kusog sa akon tagipusuon.

¹² Nagapangamusta sa indo si Epafras, ang indo kasimanwa nga ulipon ni Kristo Hesus. Permi siya nagapangamuyò ning hugot para sa indo, agud maging perpikto ang indo pagtuo kag wayà kamo nagaduha-duha sa kabubut-on ng Dios sa tanan nga bagay. ¹³ Ako mismo hay makapamatuod nga siya hay nagapangabudlay gid para sa indo kag sa mga nagatuo sa Laodicea kag sa Hierapolis.

¹⁴ Si Demas kag si Lucas nga palanggà nga doktor hay nagapangamusta sa indo. ¹⁵ Ikamusta da nindo kami sa mga kauturan sa Laodicea. Imaw da kay Ninfas kag sa mga nagatuo nga nagatipon sa iya bayay para magdayaw sa Dios.

¹⁶ Pag nabasa na nindo ini nga sulat, siguraduha gid nga mabasa da ini sa mga nagatuo sa Laodicea. Kag dapat da nindo mabasa ang akon sulat nga halin sa Laodicea. ¹⁷ Hambaya si Arquipo nga kahinangyan ipadayon niya ang trabaho nga gingtao sa iya ng Ginoo hasta nga matapos ini.

¹⁸ Nagapangamusta ako sa indo. Dumduma da ako diri sa prisuhan sa indo pangamuyò. Kabay pa nga mabaton nindo ang grasya nga halin sa Dios.

Ini ang akon pirma -- Si Pablo.