Ang Tesalonica hay mabahoy kag bantog nga siyudad sa probinsya ng Macedonia nga sakop ng gingharian ng Roma. Didto nagatudlò si Pablo ng mensahe parti kay Hesu-Kristo nga Ginoo sa iba-iba nga lugar. Ang Tesalonica ang isa sa iya gingkadtuan kaibahan sina Timoteo kag Silas. Nagtudlò siya sa sinagoga^a ng tuyo ka Adlaw nga Inugpahuway ng mga Judio. Nganì may mga Judio kag bukon Judio nga nagtuo kay Hesu-Kristo, nga ang kadamuan sa inda hay mga bukon Judio.^b Pero may mga iban da nga mga Judio nga wayà nagtuo nganì nagpanggulo kag nagpangbugoy sinda kay Pablo tungod naili sinda sa iya. Naglikaw sina Pablo nganì nagkadto sinda sa isa pa nga siyudad nga ginatawag Berea.^c Pero nagsunod sa inda ang mga nagakuntra nga mga Judio nga taga-Tesalonica kag nagpanggulo da didto. Nganì gingpakadto nga daan sa Atenas si Pablo ng mga nagatuo kay Hesu-Kristo. Ang iya mga kaibahan naman hay nagpabilin sa Berea.^d Wayà magdugay hay nagkadto da sinda didto sa Atenas.^e Nang yadto na sinda sa Atenas, ginalibogan si Pablo kay ginaisip niya basì kung magluya ang inda pagtuo, tungod nga ginahingabot sinda ng adto nga mga Judio. Nganì gingpakadto ni Pablo si Timoteo didto para pakusugon ang inda tagipusuon nga magpadayon sa inda pagtuo. Si Pablo naman hay nagkadto sa Corinto. Maayo ang balità ni Timoteo nang pagbalik niya kay Pablo nang yadto pa siya sa Corinto, nganì nagpadaya si Pablo ning sulat sa mga nagatuo didto sa Tesalonica kag imaw ini ang iya una nga sulat sa inda. Sa iya sulat, nagpasalamat si Pablo tungod nga maayo gihapon ang inda pagtuo sa Dios kag paghigugmà sa isa kag isa. Pagkatapos gingsabat niya ang inda pangutana parti sa pagbalik diri ni Hesu-Kristo kag kung ano ang matatabò sa mga nagatuo nga namatay na.

Kag nasayuran pa ni Pablo nga may mga tawo sa Tesalonica nga nagapanirà sa iya pagserbisyo sa Ginoo. Naghambay sinda nga nagapangwarta lang si Pablo. Nganì ging-isplikar niya sa mga nagatuo didto nga bukon matuod ang mga istorya ninda kay maayo gid ang iya motibo.

Gingtugon pa niya nga ang inda mga kabuhì hay dapat nga makapalipay sa Dios.

Ini hay gingsulat niya nang tuig singkwenta y uno o singkwenta y dos pagkatapos nga ging-ongà si Hesus (AD 51-52).