⁵ Nganì isikway na nindo ang kinaugalì nga dati hay kalibutanon nga pareho ng: pag-iba nga wayà pa makasay kag pagpangawatan, pag-inuyag, lawasnon nga handom, paghunahunà ning higkò. Kag indì da kamo maghinakog kay ini hay pareho ng pagsamba sa dios-diosan. ⁶ Tungod sa ini nga mga bagay, magaabot ang kaugot ng Dios sa mga masuwayon sa iya. ⁷ Bago kamo nagtuo kay Kristo, ang indo pagkabuhì hay tiyad da inà.

⁸ Pero niyan, indì na dapat nindo humanon ini tanan nga butang sa indo isigkatawo, pareho ng: kaugot, kahangit, pagdumot, pag-insulto kag paghambay ning kabastos. ⁹ Indì kamo magpinusong sa isa kag isa kay ang indo dati nga kinaugalì kag ang malain nga ginahuman hay ging-uba na nindo pareho sa barò. ¹⁰ Kag niyan, gingsuksok na nindo ang bag-o nga pagkatawo nga padayon nga ginabag-o ng Dios paagi sa pagkakilaya parti kay Kristo, para maging kapareho kita niya nga naghuman sa aton. ¹¹ Tungod sa aton bag-o nga kinaugalì, wayà na ning pagkakaiba ang bukon Judio o Judio, paltak o bukon, ang nitibo nga wayà tinun-an, ang tribu sa bukid, ulipon o bukon. Ang tanan hay pareho sa paniro ng Dios kay si Kristo hay labaw sa tanan kag siya hay nagaistar da sa aton tanan.

¹² Nganì bilang mga gingpilì ng Dios, nga ginglain para sa iya kag ginghigugmà, isuksuk nindo ini nga bagay pareho sa barò: ang maluluy-on, mabuot, mapainubuson, malamig ning uyo kag mapasinsyahon sa isigkatawo. ¹³ Maging matiniison kamo kag mapinatawaron sa isa kag isa kung may nagapalain sa indo buot. Pareho ng Ginoo nga nagpatawad sa indo, nganì imaw da ang humanon nindo. ¹⁴ Labaw sa tanan, idugang ang paghigugmà kay paagi diri magkaigwa kamo ning perpikto nga pagkakaisa sa isa kag isa. ¹⁵ Kag pagharia sa indo tagipusuon ang indo maayo nga relasyon nga ginatao ni Kristo, kay ang pagkatawag ng Dios sa indo hay maging kaibahan sa isa nga lawas para maagihan nindo ang katawhayan. Kag magpasalamat kamo permi sa Dios.

¹⁶ Itanom gid nindo sa indo tagipusuon ang mga mensahe ni Kristo. Itudlò kag ilaygay ini sa isa kag isa sunò sa kamayad halin sa Dios, kaibahan ang mga salmo, mga imno kag iban pa nga mga kanta nga ginatao ng Espiritu Santo. Kantahon nindo ini nga may pagpasalamat sa Dios halin sa indo tagipusuon. ¹⁷ Kag ano man ang indo ginahambay o ginahuman, himua ang tanan bilang tagasunod ng Ginoong Hesus. Magpasalamat kamo sa Dios nga Amay paagi sa iya.

¹⁸ Mga asawa nga babayi, magpasakop kamo sa indo mga asawa kay imaw ini ang tamà bilang mga tagasunod ng Ginoo. ¹⁹ Kamo naman mga asawa nga lyaki, higugmaa nindo ang indo mga asawa kag indì nindo sinda pagtrataron nga ulipon kundì may pagkabuot.

²⁰ Mga ongà, sunda nindo ang indo mga ginikanan sa tanan, kay ginakalipay ini ng Ginoo. ²¹ Mga tatay, ayaw nindo pagnginuyabi ang indo mga ongà, basì kung mabuy-an sinda ning pagsalig sa inda sarili.

²² Mga ulipon, sunda nindo ang indo mga amo sa kalibutan sa tanan nga bagay, bukon lang kung sinda hay nagatan-aw para madayaw ninda kamo. Kundì halin sa tagipusuon nga sinsiro ang indo pagtuman nga may pagtahod sa Ginoo. ²³ Ano man ang indo ginahuman, himua ini sa indo tanan nga kusog, nga bukon lang kamo sa tawo nagaserbisyo, kundì sa Ginoo. ²⁴ Sayod nindo nga may mababaton kamo nga panublion halin sa Ginoo bilang bayos kay ginaserbisyuhan nindo si Kristo nga Ginoo. ²⁵ Pero ang abir sin-o nga nagahuman ning malain hay sukuton ng Dios tungod sa iya mga kasal-anan kay ang Dios hay wayà ning may ginapaburan.