¹ Mga kauturan namon, indì na kahinangyan nga sulatan ko pa kamo kung san-o matatabò ini nga mga butang. ² Kay sayod na nindo nga ang adlaw ng pagbalik ng Ginoo hay pareho sa pag-abot ng mangangawat sa kagab-ihon nga indì naton masayuran. ³ Mintras ang mga wayà nagatuo nagahambay, “Ay salamat! Katawhay ang aton kahimtangan kag wayà kita ning may ginakahadlukan,” imaw da adto ang oras nga gulpi lang mag-abot ang kadakò nga parusa ng Dios sa inda nga indì gid ninda malikawan. Pareho ini sa nababatyagan ng isa nga babayi nga paungaon.

⁴ Pero kamo, mga kauturan, wayà na kamo sa kaduyom. Nganì indì kamo dapat mangayag sa adlaw ng pag-abot ng aton Ginoo nga pareho ng isa nga mangangawat. ⁵ Kay kamo tanan nga nagakaisa na kay Hesu-Kristo hay yarà na sa kahayag. Ang tanan nga mga butang hay naging klaro na sa indo pareho sa kahayag ng adlaw. Nganì wayà na gid kita sa kaduyom.^{a 6} Nganì indì kita dapat magkatuyog pareho ng iban nga wayà nagapati, kundì dapat permi kita alisto kag antigo magpugong sa aton sarili. ⁷ Kay kung gab-i nagakatuyog ang mga tawo kag ang iban nagabinayong. ⁸ Pero kita naman nga yarà na sa kahayag hay dapat antigo magpugong ng aton sarili. Gamiton naton bilang panagang sa dughan ang aton pagtuo sa Dios kag ang paghigugmà sa aton isigkatawo. Kag gamiton naton bilang helmet ang aton paglaom nga luwason kita ng Dios. ⁹ Kay wayà kita gingpilia ng Dios para parusahan kundì luwason paagi sa aton Ginoong Hesu-Kristo. ¹⁰ Namatay siya para sa aton, para maski buhì pa kita o patay na sa iya pagbalik, magakabuhì kita kaibahan niya. ¹¹ Nganì pakusugon gid nindo ang buot ng isa kag isa kag patibayon ang indo pagtuo pareho ng ginahuman na nindo niyan.

¹² Niyan, mga kauturan, nagapangabay kami sa indo nga respetuhon nindo ang mga nagapangabudlay para sa indo. Gingpilì sinda ng Ginoo para maglaygay kag magtudlò sa indo kung pauno magkabuhì bilang mga nagatuo sa iya. ¹³ Tahuron gid nindo sinda kag higugmaon kay mahugod sinda sa inda pagserbisyo kay Hesu-Kristo. Magkabuhì kamo nga may maayo nga pagsinundanan. ¹⁴ Kag nagapangabay kami, mga kauturan, paandaman nindo ang mga tamad paisugon nindo ang mga mahinadlukon kag buligan ang mga maluya ang pagtuo.^b Kag isa pa maging mapinasensyahon kamo sa tanan. ¹⁵ Kung igwa may naghuman ning malain sa indo, ayaw kamo magbayos kundì tinguhaon nindo permi nga maghuman ning maayo sa isa kag isa kag sa tanan nga tawo.

¹⁶ Magkalipay gid kamo permi; ¹⁷ ayaw kamo magduyog sa pagpangamuyò. ¹⁸ Magpasalamat kamo sa Dios abir ano ang indo kamutangan, kay imaw ini ang kabubut-on ng Dios para sa indo nga mga nagakaisa kay Hesu-Kristo.

¹⁹ Ayaw nindo pagpugungi ang ginapahuman ng Espiritu Santo. ²⁰ Ayaw nindo pagtamaya ang mga mensahe halin sa Dios, ²¹ kundì usisaa anay ning maayo ang tanan nga mensahe kung matuod o bukon. Ang maayo, tumana gid nindo permi ²² kag likawi ang tanan nga malain.

²³ Kabay pa buligan kamo ng Dios nga nagatao sa aton ning katawhayan, para malimpyo gid ang indo kabuhì kag wayà may makità nga salà. Kag kabay pa nga bantayan niya ang indo espiritu, tagipusuon kag lawas agud pagbalik ng aton Ginoong Hesu-Kristo hay wayà gid sa indo ning may ikasaway. ²⁴ Ang Dios nga nagtawag sa aton para magtuo sa iya hay masaligan, nganì humanon gid niya ang amon ginahambay.

²⁵ Mga kauturan, ipangamuyò gid nindo kami. ²⁶ Kamustaha gid ang tanan nga kauturan dirà sa indo kag hambaya nga ginapalanggà gid namon sinda.^{c 27} Paagi sa otoridad nga gingtao sa akon ng Ginoo, ginasugò ko kamo nga basahon nindo ini nga sulat sa tanan nga nagatuo kay Hesu-Kristo dirà sa Tesalonica.

²⁸ Kabay pa nga mabaton nindo ang grasya ng aton Ginoong Hesu-Kristo.