¹ Niyan, mga kauturan, gingtudluan na namon kamo kung pauno magkabuhì nga makapalipay sa Dios, kag imaw gid ang indo ginahuman. Pero ginapangabay namon sa indo, paagi sa otoridad nga gingtao sa amon ni Ginoong Hesus, nga dugangan pa nindo ang indo ginahuman. ² Kay nasayuran na nindo kung ano ang amon gingsugò sa indo sa otoridad nga halin kay Ginoong Hesus.

³ Gusto ng Dios nga malimpyo kag wayà ning kasawayan ang indo kabuhì. Nganì dapat gid nga maglikaw ang liyake kag babayi nga mag-ubay kung bukon pa sinda kasay. ⁴ Ang kada isa sa indo hay dapat antigo magpugong sa indo sarili^a para respetuhon kamo ng mga tawo kag maging malimpyo nga wayà nagakasalà sa Dios. ⁵ Indì nindo dapat sundon ang indo lawasnon nga pamatyagon pareho ng ginahuman ng mga tawo nga wayà nagatuo sa Dios. ⁶ Indì kamo dapat magpakasalà kag manlamang sa indo utod sa Ginoo paagi sa pag-ubay sa inda asawa kay parusahan ng Dios ang nagahuman ng tiyad ini. Ginghambay na namon ini sa indo kag gingpaandaman na namon kamo nang una pa. ⁷ Kay gingpilì kita ng Dios bukon para maghuman ning imoralidad kundì magkabuhì kita nga malimpyo kag wayà ning salà. ⁸ Nganì kung wayà nindo ginabatuna ini nga pagtudlò, bukon tawo ang indo ginapaindian kundì ang Dios nga nagatao sa indo ng Espiritu Santo.

⁹ Kung parti sa paghigugmà sa indo mga kauturan kay Hesu-Kristo, indì na kahinangyan nga sulatan pa kamo nga maghinigugmaanan kamo kay ang Dios imaw gid ang nagtudlò ini sa indo. ¹⁰ Kag imaw gid nganì ini ang indo ginahuman sa tanan nindo nga kauturan kay Hesu-Kristo sa bilog nga probinsya ng Macedonia. Pero ginapangabay namon mga pinalanggà nga kauturan, dugangan pa gid nindo ang indo paghigugmà.

¹¹ Tinguhaa gid nindo nga magkabuhì nga wayà ning gulo. Indì kamo magpasinglabot sa pagpangabuhì ng iban, kundì magtrabaho kamo para igwa kamo ning sarili nga ikapangabuhì pareho ng amon gingtudlò sa indo nang una pa. ¹² Kung humanon nindo ang tiyad ini, indì na kamo magsalig sa iban para sa indo pagpangabuhì kag respetuhon pa kamo ng mga tawo nga wayà pa nagatuo sa Dios.

¹³ Mga kauturan, gusto gid namon nga ipasayod sa indo ang kamatuuran kung ano ang matatabò sa mga namatay na nga nagtuo kay Hesu-Kristo para indì kamo magkalisod pareho ng iban nga wayà ning paglaom nga mabubuhì sinda liwat pagkatapos ninda mamatay. ¹⁴ Nagapati kita nga si Hesus namatay kag nabanhaw. Nganì nagapati da kita nga buhion liwat ng Dios ang mga nagtuo sa iya nga namatay na. Kag panunton sinda ng Dios kay Hesus sa pagbalik niya sa kalibutan. ¹⁵ Ang gingpasayod sa amon ng Ginoo nga amon ginabalità sa indo hay imaw ini: Sa pagbalik ng Ginoo diri, kita nga mga nabilin nga buhì pa hay indì mauna sa mga namatay na. ¹⁶ Ang Ginoo imaw ang magababà halin sa langit nga may sugò nga nagasinggit. May mababatian pa nga boses ng arkanghel kag tunog ng trumpeta ng Dios. Pagkatapos, ang tanan nga namatay na nga nagtuo kay Hesu-Kristo sinda anay ang una nga buhion liwat. ¹⁷ Niyan kita nga buhì pa nang adto nga tiyempo, kaibahan ng mga tawo nga gingbuhì liwat hay gulpi nga day-on paibabaw sa panganod kag didto makikità naton ang Ginoo. Kag makakaibahan na naton ang Ginoo hasta sa wayà katapusan. ¹⁸ Nganì pakusuga nindo ang buot ng isa kag isa paagi sa ginahambay namon sa indo.