¹ Mga kauturan, sa katapusan, ipangamuyò abi nindo kami nga ang mensahe parti sa Ginoo hay madalì maipamalità sa mga tawo sa tanan nga mga lugar kag ini hay batunon kag tahuron ninda ning maayo pareho sa natabò sa indo. ² Ipangamuyò da nindo nga luwason kami ng Dios sa mga tawo nga malain kag mapintas, kay bukon tanan hay nagapati sa aton Ginoo. ³ Pero ayaw kamo magkalibog, kay ang Ginoo hay masaligan gid kag siya ang magapakusog sa indo kag buligan niya kamo para indì kamo madaog ni Satanas. ⁴ Nagasalig kami nga ginatuman nindo kag padayon nga humanon ang amon ginasugò sa indo kay igwa kamo ning pagtuo sa Ginoo. ⁵ Kabay pa nga buligan kamo ng Ginoo para mabatyagan nindo ang paghigugmà ng Dios kag isa pa para maging matiniison kamo pareho ng Kristo.

⁶ Mga kauturan, sa pangayan ng aton Ginoong Hesu-Kristo, ginasugò namon kamo nga likawan mga kauturan nga matamad kag wayà nagasunod sa amon mga gingtudlò sa indo tanan nga amon natun-an nang una pa. ⁷ Kay sayod da nindo nga dapat nindo patuyaran ang amon halimbawà nga wayà kami nagatinamad nang yarà pa kami sa indo. ⁸ Wayà kami nagakaon sa indo nga wayà nagabayad kundì adlaw-gab-i nagatrinabaho gid kami ning tudo-tudo para indì kami magpabug-at sa indo. ⁹ Ginahuman namon ini tanan, abir igwa kami ning poder nga magpangayò ning bulig sa indo para sa amon mga pang-adlaw-adlaw nga kahinangyanon. Pero wayà gid kami nagahingabot ning bulig nindo kay gusto lang namon nga taw-an kamo ning maayo nga halimbawà nga dapat nindo sunuron. ¹⁰ Nang yarà pa kami sa Tesalonica kaibahan nindo, ginghambay namon kamo nga kung sin-o sa indo ang indì magtrabaho, indì dapat pakaunon.

¹¹ Ginahambay namon ini kay may nagbalità sa amon nga igwa dirà sa indo ning nagatinamad. Wayà sinda nagatrabaho kundì nagapasinlabot sa ginahuman ng iban. ¹² Nganì paagi sa otoridad nga gingtao sa amon ng aton Ginoong Hesu-Kristo, ginasugò kag ginalaygayan namon inang mga matamad nga magpangità ng inda sarili nga ikapangabuhì kag indì na magpasinlabot. ¹³ Pero kamo naman mga kauturan, ayaw gid kamo magpangluya sa paghuman ning maayo.

¹⁴ Kung igwa dirà sa indo nga indì magtuman sa ginatudlò namon nga yari sa amon sulat, tandai gid nindo kung sin-o siya kag likawi agud mapahuyà siya. ¹⁵ Pero ayaw nindo siya pagkabiga nga indo kaaway kundì paandaman siya bilang utod.

¹⁶ Niyan, kabay pa nga ang Ginoo nga ginahalinan ng katawhayan, magtao sa indo tanan ng katawhay ng hunahunà sa tanan nga oras abir ano ang indo kamutangan. Kag kabay pa nga padayon kamo tanan ibhan ng Ginoo.

¹⁷ Ako si Pablo, ang nagsulat ng ini nga bendisyon. Imaw da ini ang akon paagi para mapapamatuuran nga halin gid sa akon ang tanan ko nga sulat. Tiyad ini ako kung nagasulat. ¹⁸ Kabay pa nga mabaton nindo tanan ang grasya ni Hesu-Kristo nga aton Ginoo.