¹ Niyan, mga kauturan namon, parti sa pagbalik^a ng aton Ginoong Hesu-Kristo kag sa Adlaw nga pagatipunon kita para makaibahan siya, igwa pa kami ning may ihambay sa indo; ² ayaw kamo mataranta nga daan o mangayag parti sa mga istorya nga kami kuno ang naghambay o nagsulat o may ispirituwal nga mensahe halin sa Dios nga nag-abot na kuno ang Adlaw ng pagbalik ng Ginoo. Bukon ina matuod kag wayà kami naghambay ning tiyad adto. ³ Ayaw gid kamo magpaluko sa inda abir ano pa ang ginahambay ninda. Kay indì pa magbalik ang Ginoo mintras wayà pa magakontra sa Dios ang kadamuan nga mga tawo kag kung wayà pa nagapakità adto nga tawo nga siya ang pinakapunò ng kalainan. Ini siya hay wayà na gid ning iba nga kadtuan kundì sa impyerno. ⁴ Pagakuntrahon niya ang Dios kag ang tanan nga mga bagay nga ginasamba ng mga tawo kag itataas niya ang iya sarili labaw sa tanan. Magapungkò pa siya sa suyod ng templo^b ng Dios kag magpamalità nga, "Ako na gid niyan ang Dios!"

⁵ Wayà ba nindo nadumdumi? Indì ba, permi ko nganì ginatudlò sa indo ang parti sa ini nga mga bagay nang magkaibahan pa kita? ⁶ Kag niyan sayod na nindo kung ano ang nagapugong^c sa adto nga pinakapunò ng kalainan para indì pa siya magpakità hasta wayà pa ang tamà nga tiyempo nga gingplano ng Dios. ⁷ Sa niyan, igwa na nganì ning mga tawo nga patago nga nagakuntra sa Dios, pero igwa pa may nagapugong sa inda ginahuman nga malain. Nganì indì pa makità kung mauno nga kalain ini sa ulihi. Pero magaabot ang oras nga adtong nagapugong sa inda kalainan hay bubuy-on na. ⁸ Imaw na adto nga makikità na ang pinakapunò ng kalainan. Pero sa pagbalik ni Ginoong Hesus, patyon gid niya ini sa huyop lang kag paagi sa iya kasilaw-silaw nga presinsya. ⁹ Kung magpakità na ining malain nga tawo, pagagamiton niya ang gahom ni Satanas. Magahuman siya ning tanan nga klase ng milagro, mga tandà kag makatitingaya nga mga bagay nga daw halin sa Dios pero bukon. ¹⁰ Kag pagagamiton niya ang tanan nga klase ng kalainan para lukuhon ang mga tawo. Mapapakadto ini sinda sa parusa nga wayà katapusan kay wayà ninda batuna ang kamatuuran parti kay Hesu-Kristo para maluwas sinda. ¹¹ Nganì pagaguluhon gid ning tudo ng Dios ang inda isip para patihan ninda ang bukon matuod, ¹² kag paparusahan sinda tanan ng Dios sa ulihi kay wayà gid sinda magpati sa kamatuuran kundì nagakalipay pa sinda sa paghuman ning salà.

¹³ Mga kauturan, nagapasalamat kami permi sa Dios tungod sa indo nga ginahigugmà ng Ginoo. Kag dapat kami magpasalamat sa iya kay gingpilì niya kamo nang una pa gid para maluwas sa parusa ng indo kasal-anan paagi sa indo pagpati sa kamatuuran kag sa gahom ng Espiritu Santo nga naglimpyo sa indo kabuhì kag naglain sa indo para sa Dios. ¹⁴ Gingpilì kamo ng Dios para magpati sa Maayo nga Balità nga amon gingtudlò sa indo, para makaibahan kamo sa kahimayaan ng aton Ginoong Hesu-Kristo. ¹⁵ Nganì, mga kauturan, padayuna ang indo pagtuo kag butangan gid sa indo tagipusuon ang amon gingtudlò sa indo nga amon ginghambay kag gingsulat nga amon natun-an nang una pa gid.

^16,17 Kabay pa nga ang Dios nga aton Amay kag ang aton Ginoong Hesu-Kristo, magpakusog ng indo buot kag buligan kamo para permi maayo ang tanan nindo nga ginahuman kag ginahambay. Ginahigugmà kita ng Dios, kag tungod sa iya pagkamaluluy-on, gingpakusog gid niya sa wayà katapusan ang aton buot kag gingtaw-an kita ning paglaom nga may kasiguraduhan.