Ini nga libro hay una sa duha nga gingsulat ni Apostol Pablo para kay Timoteo, isa nga kabataan nga miyugdumaya ng iglesya.

Ang tatay ni Timoteo hay isa nga Griego kag ang iya naman nanay hay Judio. Ang iya nanay kag iya lula hay pareho nga nagatuo kay Hesus. (2 Timoteo 1:5) Tunà nang ongà pa siya, hay ginatudluan na siya ng iya nanay kag ng iya lula ng Kasulatan. (2 Timoteo 3:15)

Si Timoteo hay halin sa banwa ng Listra nga sakop ng Asya Menor. Diri nga banwa nakilaya siya ni Pablo kag tunà adto nakaibahan na siya ni Pablo sa iba-iba nga lugar agud magbulig kay Pablo sa pagwali ng Maayo nga Balità parti kay Hesu-Kristo. (Ginghuman 16:1-5)

Sa bilog nga rehiyon ng Masedonya, hayos permi nakaibahan ni Pablo si Timoteo. (Ginghuman 17:14-15, 18:5) Kaibahan da siya ni Pablo sa Efeso, (Ginghuman 19:22) tapos sinda hay nagkadto sa madamò nga lugar. (Ginghuman 20:4) Kadamò nga beses siya gingpadaya ni Pablo agud magpanudlò kag magpakusog ng pagtuo sa mga nagatuo sa iba-iba nga lugar. (1 Korinto 4:7, 16:10; Filipos 2:19; 1 Tesalonika 3:2, 3:6)

Pagkatapos nga makaluwas si Pablo sa prisuhan sa Roma, nagkità liwat sina Pablo kag Timoteo sa Efeso. Gingbilin siya ni Pablo didto kag nagkadto si Pablo sa Masedonya. (1 Timoteo 1:3) Mintras si Pablo hay yadto sa Masedonya, gingsulat niya ini nga libro para kay Timoteo. Gingsulat ini ni Pablo siguro mga A.D. 63-65 kag pareho ang tiyempo nga gingsulat ang Tito.

May tuyo nga sulat si Pablo nga ginatawag nga ‘Mga Sulat para sa Pastor’, ang duha hay para kay Timoteo kag ang isa kay Tito. Sa una nga sulat ni Pablo kay Timoteo, may tuyo ka butang siya nga gingsulat:

Ang una hay ang mga paandam laban sa mga salà nga pagpanudlò sa iglesya, pareho ng pagpati nga ang kaluwasan hay mababaton lang paagi sa ‘kamayad’ nga bukon matuod kag paghuman ng mga seremonya, halimbawà: ang indì pagkaon sa iban nga klasi ng pagkaon kag ang pagbawal sa pag-asawa.

Ang ikaduha hay ang mga bilin parti sa pagdumaya ng iglesya kag sa pagsamba, kaibahan ang mga listahan kung ano ang dapat nga maging batasan ng mga pinunò kag ng mga nagaserbisyo sa iglesya.

Kag ang ikatuyo hay ang mga laygay para kay Timoteo nga maging maayo nga ulipon ni Hesu-Kristo kag ang mga bilin parti sa responsibilidad niya sa mga grupo nga nagatuo kay Kristo.